[誤墜]係獅隧口落車 就出左事: １１

我成個人好似離一離咁，係咪即係話有人除左鞋，行左入衣櫃？ 

大概呆左一兩秒，我開始留意到、連啲奇怪既旋律都係入面傳出黎。 

比著你，你會點？ 

其實在情在理，我都唔應該理佢、轉身就走。 

一，我驚到仆街。 





二，哩到係人地屋企。 

三，如果真係有人係入面、即係佢都淆驚我，話唔定有咩武器係手、可能我一開門就比佢隊埋黎。 

但係，究竟為咩佢間屋要搞到咁既樣？為咩要匿係入面播啲奇怪音樂？ 為咩出面ＢＢＱ緊但冇哂人？ 
我真係好想知點解。 

結果，我一步一步慢慢咁接近個衣櫃。 

聽到自己既呼吸聲越黎越大聲、個心越跳越快…… 





行到埋去手柄伸手可及既位置，慢慢咁舉起右手，懸放係手柄前面。 

個心跳得真係好快好快！好似就黎係我胸口跳出黎咁！開、定唔開？我開始猶豫。 

『後生仔，唔好亂開人啲野。』我突然醒起阿伯個樣，同埋果陣壓味…… 
嗯，都係唔好亂搞著數，就算唔係咩鬼怪野、比人告我擅闖民居都即刻仆街。 

我放低抖震既既右手，轉頭就走返出屋。眼尾左右望、冇咩特別，只係幅畫、同個梳妝台依然詭異。 





出到去諗緊撻兩粒野頂下肚，點知出面張台啲野食好似比人摷到亂哂，原本已經剩唔多既食物一概無剩。 
我望上天，有一群黑壓壓既雀岩岩飛走。 

頂，雀都黎同我爭野食？！