[前傳]是咁的，我嘅職業係幫想自殺嘅人寫遺書: 97.諗清楚

佢自殺，係啱定錯？我唔識判斷。

作為正常人，我地可以相信自己日後會有個更好嘅伴侶，懷抱住希望咁捱落去，被逼接受多一道傷痕嘅自己。

但如果bobo無辦法相信未來嘅可能性，又憑咩覺得佢係懦弱？

未來會更好，真係咁咩？

起碼喺我第一個客人眼中，佢認為自己無可能再搵到一個更好嘅男人，佢無辦法相信未來會更好，所以先真係實行自我毀滅。





而未來會唔會更好，亦永遠只係個問題，因為bobo已經無未來去驗證答案。

雖然無未來，但起碼，佢唔會再痛苦。

就算我可以承受，我可以捱落去，都唔代表佢可以承受。

更何況我本來就捱唔到落去，我仲生存，只係因為家姐嘅詛咒。

諗清楚，以後要點樣面對搵我寫遺書嘅客人。





然後，補寫bobo嘅遺書，為第一個客人嘅故事畫上句號。