[前傳]是咁的，我嘅職業係幫想自殺嘅人寫遺書: 5.麻木
開始認命，同時開始⋯⋯覺得麻木。
我發現自己對金弦死亡嘅傷痛，竟然一點一滴，隨住時日流逝減退。
骨頭碎裂嘅聲音又好、下墮嘅畫面又好，通通開始變得模糊。
唔可以咁樣。
一旦遺忘傷痛，靈魂就會預備迎接新生活。
我唔容許自己有新生活。
由嗰陣開始，我每晚都會拎金弦封遺書出嚟睇一次。遺書嘅內容，每晚都重新強化我嘅悲傷。
可惜嘅係，遺書已死。情況就好似人類無可能喺同一部作品之中，不停獲得感動。
再好笑嘅《整蠱專家》，睇一千次，已經唔會好似睇第一次咁，笑得咁大聲。
再悲痛嘅遺書，睇一千次，心痛都會減弱。