[前傳]是咁的，我嘅職業係幫想自殺嘅人寫遺書: 4.放棄
期待世界末日根本無意義，嗰陣夠話2012年係世界末日啦，結果個地球仲好地地。
期待意外比較實際，但兩個星期以嚟，我身邊都風平浪靜。最接近出事嗰次，都係得個細路高空擲物，掟咗堆波子落我個頭度。
小朋友，下次要掟，搵啲掟得死我嘅雜物好無？
佢結果又真係有下次，掟咗盆花落街，我嗰日竟然因爲去7仔買水而喪失咗依個大好機會。
除咗中波子頭獎之外，就咩意外都無發生。
我試過連環衝紅燈都無被車撞，淨係被警察見到追咗我九條街，最後我匿喺大家樂人群之中先避得開佢。
慢慢，就會死心。
主動尋求意外，只係將自己暴露喺危險之中咁解。但時辰未到，就真係被車撞都可以無事。
相反時辰一到，我綠燈過馬路都可以踩狗屎跣低撞頭重傷不治。
我斷定自己時辰未到，終於放棄等待意外。