《人類基因篩選計劃》: 第九章：A0

# 世上有甚麼事，值得你用生命去換取？ #

「柏月，你想唔想知點解我叫你A0？」我還未來得及反應，Calvin又多問了一次。

「⋯」我再次不懂得反應，無言以對。

「因為你個樣似毒男，唔會有人鍾意，哈哈。」

「⋯」他這是認真的嗎？





「跟我過嚟，你仲有嘢喺D幢未做完。」

見我一臉茫然，他堅定的向我點點頭，示意我跟著他走。他帶著我走到了D幢，Project Noah的小島範圍，再緩緩的說。

「有件事，我想你知道。我做嘅一切都係為你好，我唔希望你去查真相。但係事已至此，我覺得要將決定權交返比你。」

說真的，我對他的說話毫無頭緒，完全不知道他在說什麼，也不知道他哪句是真話。只能靜靜的站在他旁邊，看著他深鎖的眉頭。

「因為CRIB嘅規矩，我無辦法同你坦白所有嘢，你都見到華叔發生咗咩事。」





甚麼？華叔果然是知道內情的，但我萬萬想不到他的墮樓原來是跟我有關。

「我可以引導你自己去尋找真相。咁樣對你同我都係最好嘅做法。不過你要有心理準備，你嘅人生將會就此顛倒，甚至瓦解，崩潰。你亦都好有可能會陷入各樣嘅危險。即使係咁，你都想搵真相？」
「係，我想知道事實。特別係同我有關嘅事實。不過我唔明⋯」

「咁你比啲耐性，慢慢就會搵到答案，跟著一切都會變得合理。你仲有森麻幫你，唔洗擔心。」

「你點知道森麻嘅事？」我還想起當時我與森麻

「我仲知道張風蒔依家住喺你屋企。」他轉過頭來給我一個奸狡的笑容。





這下子，我驚呆了，原來Calvin什麼都知道⋯那麼，為何他不向上級匯報⋯

「你一定諗緊點解我唔供你出嚟。我講過，我做嘅一切都係為你好。加上我都有我嘅原因。」

我深呼吸了一下，強逼自己冷靜下來。

「知道。但你可唔可以話我聽，你係點知道呢啲事？」

「你記唔記得森麻講過佢寧願信比我監聽，都唔信有內鬼？」

「你⋯你又點會知？森麻明明係我工作室講嘅。唔通你真係偷偷地監聽我哋？」

「部分正確。喺B幢，因為有好多pellet同貴重儀器，所以高層提議設置監聽器係大家嘅工作室，用嚟保護公司財產。呢一點喺員工手冊都有寫清楚。所以我係光明正大監聽你哋。」





「你話喺B幢，咁其他幢呢？」

「A，B，C幢如無意外都有設置監聽器，各個部門嘅主管有權收聽相關嘅語音檔案。唯獨係依家我哋身處嘅D幢內部，並無任何監聽器或者監視器。所以我頭先會先帶你嚟呢度傾。」

「哦，所以你係靠監聽⋯」

只見Calvin微微一笑「乜有關我偷文件嘅事，係可以靠監聽得知咩？」

他又問倒我。在印象中，我倆只在家中提過這事⋯他該不會也能監聽我家中的情況吧⋯

「呢樣嘢，係你另一個要搵嘅答案。」他壞壞的一笑，像個大孩子成功作弄他的朋友一樣。

我倆相對無言了好一陣子，而在那段沉默中，我用盡了所有心力嘗試去整理一下當前的事。

首先是已知的事實




1）Calvin 一直也知道一切，由張風蒔至森麻，和我想查明的真相。
2）他聲稱自己並無惡意，想要幫助我。
3）A，B，C幢裝有監聽器。

我⋯可以信任眼前的這個天才嗎？

「咁，我跟著應該要點做？」

Calvin看著我，看來他剛才也在腦海中整理著一切。他再靜靜的想了一會兒，說道：「你返屋企休息一下啦，你近排已經夠攰。有咩，都聽日先算。」

十分神奇地，我認為他的這個建議實在不錯，我的身體已經被連日來的衝擊折磨得不像話，思緒也越發混亂。休息一下也不失為一個好選擇。

「Calvin，我可唔可以信你？」哈，這個問題實在是問得毫無意義。試問有那個壞人會跟你坦白，叫你不要相信他，又有哪個醉漢會承認自己醉？

他點頭，「都係果句，我所做嘅所有嘢都係為你好，你可以信我。唯一我唔可以保證到嘅，係你嘅安全。你都見到華叔⋯」Calvin眼眸中閃過一絲的痛苦。





「嗯，我明白，我會自己負責自己嘅安全。」

望著我漸漸遠去的背影，Calvin在心中默念「當初就該把你趕走⋯」

———

「我返嚟啦。」

一推開門，一陣食物的香氣撲鼻而來。是南瓜湯跟其他餸菜混合的香味。我的肚皮已經在咕嚕咕嚕叫個不停。風蒔手上捧著湯煲從廚房出來，給我一個大大的笑容。「森麻呢？」

「佢今晚有嘢做，會遲啲到。我返房做埋啲嘢，順便等埋森麻。」說罷，我就回到房間中，看著剛才拍攝的照片—被Calvin收起的，我的pellet檔案。

檔案中的內容大概正確，除了我父母和我綜合測試的結果外，資料十分準確。我不禁感嘆偽造文件的團體的專業，資料搜集得十分徹底。在資料中，我的創意並非現時的9.5分，反而只有3分。如果那個數據是正確的話，我絕對會成為pellet。也許這文件就是造來把我變成不法pellet的，有人想把我靜靜的「處理」掉。





咯咯，門打開後，森麻走了進來。

「月，做緊咩？」

我揉揉眼睛，把照片遞給森麻。只見他臉色一下子變沉，眼神中充滿著疑惑。

「你覺得係唔係有人想將我變成不法Pellet？」我向森麻

「有可能⋯係駱先生同佐藤一雄？」

我搖搖頭「我完全唔識佢哋，佢哋應該唔會有動機⋯不過講開又開，我面試嘅時候，佐藤一雄已經好怪。好似好唔想我加入公司咁。」

「太混亂啦⋯所有嘢好似有關，但又好似無關咁⋯」森麻搔著頭。

「頭先，Calvin同我講咗好多嘢。」

「Calvin？佢偷文件嘅事都未查清楚。」

「頭先份文件，係喺Calvin辦公室搵到嘅。佢同我講，A,B,C幢都裝有監聽器⋯」我把剛才得到的資訊一字不漏的與森麻分享。

「咁你相信佢？」

「我覺得佢無必要扼我，如果佢覺得我礙事，大可以炒咗我，唔需要用到不法pellet，偽造文書之類嘅手段。」

「我對佢仲有保留。你都係小心啲好。」

「喂！食得飯啦！」飯廳中傳來風蒔的聲音。我倆決定跟著calvin的建議，把事情留到明天才處理。先讓自己休息一下。

———

嗶嗶

一大清早，就收到了Calvin的信息。「D幢2/F，盡快。」

勿勿準備好，就趕到D幢會合Calvin。

「早晨。」

「你咁早叫我嚟做咩？」我輕輕喘著氣，想必是剛才半跑過來導致的。我瞟一瞟手錶。「嘩，依家5點半咋。你唔洗瞓㗎？」

「因為早，仲未有人返工，所以我可以帶你去睇啲嘢。」說罷就徑自走進了2/F的仿大自然地區。

這層的主題是樹林，是早在數十年前就從香港消失的生態環境。四周茂密的綠林高矗入雲，Calvin在樹幹之間穿插，因為樹林中，並沒有石舖的小路，樹根彼此亂纏，我差點兒就絆倒了跟不上他。走了數分鐘，看到calvin停下了腳步，我小跑幾步站在他跟旁。隨著他的視線，看到了令我心臟幾乎停止跳動的一座建築物。

它並沒有壯麗的外貌，也沒有華麗的設計。能使我如此震驚的原因，全是因為是我之前曾經見過它。
它，這是在張風蒔的虛空裏⋯

的那所林中小屋。

（待續）

———————————
如果覺得故事寫得正就去Facebook比個讚啦！
你的支持是我繼續寫下去的原動力！
Facebook：https://www.facebook.com/woodensunn/
———————————