《人類基因篩選計劃》: 第五章：喚醒
———————————
如果覺得故事寫得正就去Facebook比個讚啦！
你的支持是我繼續寫下去的原動力！
Facebook：https://www.facebook.com/woodensunn/
———————————
#假若人生真的如戲，那麼導演會是誰？#
「柏月⋯？」
「你點會知道我叫咩名？」
她緩緩坐直身體，歪著頭看著我。「你咪林柏月囉。」
「你識我？」
「柏月，你講咩呀？」聲音依舊虛弱顫抖，她輕輕摸著頭，眉頭輕皺，表情略帶點痛苦。
「你係點識我架？」
「我哋咪⋯我哋咪⋯我⋯我唔記得⋯我個頭好痛⋯」頭痛？難不成是強行喚醒pellet的副作用？「我淨係記得小屋⋯同埋你⋯」說著說著她竟然哭了起來。弄得我手足無措，很是狼狽。
「唔緊要，我哋有嘅係時間，慢慢嚟。」先安撫一下她吧，再慢慢查明真相⋯反正事已至此，我也不可能再把她麻醉。反而我倒該想想應怎麼處置她，總不能把她困在這裡。
咯咯！
糟糕！這時候到底會是誰敲門？
「等等！唔好入黎住！」
我急忙把張風蒔和鐵床一併推到分隔儲物櫃的簾子後，拜託她先靜一靜。然後稍作整理便去應門。
「喂！你攪咩呀，咁耐嘅？」一開門，森麻已急不及的衝了進來。
「我呀⋯係囉⋯慢咗⋯你又會係呢個時候嚟嘅？」我支吾而對，幸好森麻也沒有追問。
「我帶另一個見習導航師嚟，順便睇吓你近排有無留意到奇怪嘅Pellet 。」森麻想走向儲物櫃的方向。我急忙檔在他身前，裝作整理簾子上的污漬。
「近排？無呀。咩事都無。」要自然！一定要自然！
「咁你放工之後有無野做？聽講華叔搬翻去普通病房，你洗唔洗探下佢？」
「哦，好呀。」
「你做咩好似心不在焉咁？」森麻好像看出些端倪。
「我？無呀！」
「係唔係同你收埋嘅pellet有關？」
「吓？」我實在不知道該如何反應，只能呆呆的看著他。
「頭先攪咁耐先開門，房入面又有部pellet儀器，又唔比我行近簾附近，你緊係收埋咗個pellet係房啦。」他一把拉開了布簾，露出了女孩和她的鐵床。女孩坐得直筆的看著他，而森麻臉上盡是震驚。他把布簾再次拉起，急忙把門鎖上，然後將我拉到房間的另一角。
「你到底諗緊乜野？竟然喚醒咗佢？」他強行壓低的聲音中滲透著一點疑惑、一點不解和更多的害怕。「明明導航師中意點對pellet都得！唯一唔可以做嘅事，就係喚醒佢哋！點解你連唯一嘅規矩都要犯？」
「我有必須要知道嘅答案。可能仲牽涉到華叔墮樓嘅真相。」我只好如實相告，希望森麻能助我一臂之力。至少，也不要把我供出。「佢識我架！我一定要攪清楚咩事。可能⋯佢同公司背後嘅陰謀有關。」
「咁你有無諗過要點處置佢？如果有人發現咗，後果不堪設想架！」森麻睜大眼睛瞪著我。
「呢間公司咁多Pellet，少咗一個都唔會有人懷疑。」
「你諗野咁唔全面，唔怪得你智慧得5分，你咁樣遲早會比人發現！」
「咁依家反正都喚醒咗佢，我已經無得翻轉頭，只可以見步行步。」我話語中帶點無可奈何。
森麻搖搖頭嘆了口氣。「嗱，我幫你偽造一份佢嘅焚化證明，就算有人發現佢唔見咗，你都有得解釋。」
「我都知道你會企喺我呢邊，唔該哂你呀森麻。」有了他的協助，令我如釋重負。
「唔好咁開心住，你仲有好多問題要處理。首先，你想點處置佢？運佢出公司？住你屋企呀？」
「我⋯打算等佢身體好翻啲之後先算。今晚住係呢度先？我會搵機會帶佢翻我屋企。如果話佢係我朋友，我媽應該唔介意。」
我掀開了布簾，映入眼簾的女孩依然是一臉茫然。
「柏月⋯」
「你覺得點？個頭仲痛？」
她搖搖頭。
「咁就好。呢位係我朋友，森麻，佢會幫我地手。」
森麻向她微微點頭，又轉過頭來看著我。「柏月，我真係無你咁好氣。我仲有野做，要走先。今次幫你，如果發生左咩事嘅話，你同我都好大件事。」他一臉憂心的說。
「我應承你，唔會發生任何事。」我堅定的望著他。
「唉，記得鎖門，有咩事都要同我商量。」說罷，他便離開了。
我聽從他的吩咐，仔細把門鎖上，做好心理準備去迎接我的答案。房間內只剩我和張風蒔，一個既熟悉又陌生的女孩。我簡單向她解釋了目前的情況和她是pellet的事。
「即係我之前經歷既一切都係假嘅？我爸爸媽媽⋯我哥哥⋯我所有嘅朋友⋯」無數的淚珠從她面上流下。
這消息對她來說，太沉重。其實不光是她，任何人也不可能接受自己的世界竟然只是別人創造出來的故事。世界的神，只不過是一個平凡的導航師。自己珍惜的人，也不過是別人筆下的一個角色。
「我嘅友誼⋯我努力維繫同保護著嘅一切⋯都只係一個笑話。」她的眼淚就如缺堤一樣，一發不可收拾。
看著她哭得歇斯底里、撕心裂肺，我實在不知道該如何給予安慰⋯難道喚醒她真的是一個錯誤的選擇？是我太自私了嗎？
「咁我依家點算好？我已經無哂所有野。就連回憶都係假嘅⋯我生存仲有意義咩？」她的哭聲叫我揪心。
我走到她旁邊輕輕摟著她的肩膀，任由她在我懷中哭了好一會兒。直至涰泣聲慢慢減弱，直至她的呼吸變得平穩，直至被眼淚沾濕的襯衣乾了大半，我才把睡著了的她抱到沙發上，蓋上毛氈。然後收拾心情繼續工作。
———
「柏月。」
「咦？你醒嗱？茶几有少少野食，同水。你食住先，等我一陣。」我急忙完成手頭上的「虛空」便走到女孩旁，在沙發對面坐下來。
「你⋯感覺好啲未？」我戰戰兢兢的問道，生怕又說錯了什麼使她情緒失控。
「嗯，柏月，對唔住，我頭先聽完你講真係好迷惘，好絕望⋯所以先會⋯」她低下頭。
「任何人經歷呢啲事都會情緒崩潰，你已經做得好好。」我微微一笑。「係呢，我可唔可以叫你做風蒔？」她默默地點頭。
「風蒔，你肯定你之前見過我？」我用另一個方法，嘗試從她口中問出一些答案。
「嗯，我知道你叫林柏月，成日話自己係拍案叫絕—林柏月。中意聽懷舊廣東歌⋯」風蒔說的一點也沒錯，但另一方面，我也肯定我並不認識眼前的這個女孩。
「但係你唔記得我地係點識嘅？」
「我淨係記得小屋⋯我地喺小屋度見⋯仲有其他人⋯」她閉上眼專心的回想着。「對唔住⋯我唔記得。」
「唔緊要，唔好勉強自己，我地一步步嚟。」
那天之後，我們仍試過數次想幫風蒔回憶起我倆的相遇。但偏偏要找出那段記憶，就像用破爛的瓢子撈水一樣，以為撈了一瓢水，豈知水突然就嘩啦一聲全流走，總是徒勞無功。
而漸漸加重的工作量和私下的調查已使我心力交瘁，加上調查處處碰壁，使得我先把查找真相這件事暫時擱置，先專注在工作上。
另一邊廂，我把張風蒔暫時安置在我家。隨著我們仨越漸熟落，森麻也幾乎每晚也到我家吃晚餐。其實這平淡而穩定的生活，正正就是我所追求的，好想好想就這樣無憂無慮的過一輩子。短短半個月的安逸已漸漸令我淡忘了當初對真相的渴求，對事實的堅持。
直至一天晚上，森麻如常來我家晚餐時⋯
「林柏月，你之前同我講過風蒔嘅檔案比人撕毀，於是我稍作調查。點知比我喺監視器度見到呢樣野。」
他給我展示了一條片段，看上去是監視器的畫面，畫面內的地方很熟悉⋯呀！想起了，是我早前到過的二樓的資料庫。監視器中顯示一個男人進了資料庫，但他用外套的兜帽擋住了臉，所以看不清是誰。
「吓？有個男人入左去，咁又點？」我向森麻表示不解。
「你睇埋先啦。我懷疑佢就係撕毀檔案嘅人。」
過了大概十分鐘，男人又從監視器畫面中出現。這次他是從資料庫中走出來，背向著監視器，也許因為查找文件的不便，他離開時並沒有戴起兜帽。只見男人的手上多了數份文件。
「資料庫嘅文件，公司規定唔可以帶走。」我突然想起了當時自己只能拍攝低張風蒔的檔案。
「無錯，不過仲有樣更爆嘅野，你繼續睇埋先。」森麻語氣中帶點不耐煩。
那男人正在等候著升降機，不知是否因為等太久還是因為心虛，他開始到處張望。
男人在一刻轉了身，令樣貌暴露在監視器鏡頭之下。雖然下一瞬間他已立刻轉回去，但那短短的一秒鐘已足夠令我看清他的模樣。
那個我不可能忘記的模樣⋯
我的上司⋯
「王梓楓，Calvin。」
（待續）