時空之門: 重新出發
「Sam，多謝你，雖然只係好短暫，但，呢兩日係我最開心既日子」阿思講完呢句後就衝左出露台跳左落去...
我完全俾唔切反應去救佢...只可以眼白白咁睇住阿思跳落去....我腦入面只係再次啟動時空之門救返阿思既諗法...我望住嚇到呆左既阿Yan，Amy同「阿思」
「兄弟，Take Care! 永遠記住我同你講既，所有野順其自然，唔好過於強求你想要既結果，所有野，冥冥中都有主宰。」突然腦入面，百年後既「我」係我臨走時既呢番說話再次湧現，我強忍淚水行左入廁所，再次啟動時空之門，但，時間係我初次遇到佢地三個既大梅沙現場....
回到熟悉但又陌生既場景，我遠遠咁望住佢地3個純真既笑容，我冇再好似之前咁諗住去幫佢地，只係默默咁望住阿Yan跟住歷史既劇本俾玻璃界傷腳，之後另外兩個傻妹就好騰雞咁唔知點好...雖然心痛，但呢一刻我乜都唔可以做，只可以遠遠咁望住佢地...
事情發展如我已知既歷史咁發展，夜晚Amy一個人出左黎買野....我一路跟住佢去到超市，望住佢搵唔到電話果個無助樣，我個心一直十五十六諗緊應唔應該幫佢，最後都係感性戰勝左理性，當我正諗住出去借電話俾佢時，佢身邊已經出現左個人...
果個人並唔係第個...而係當日輪姦阿思既大漢之一，果一刻，我終於明白百年後既「我」當日果番說話既意思，我知道如果我強行改變佢識Amy呢個事實，阿思被輪姦或Amy被姦殺既悲劇好大可能會再次發生，雖然唔忍心，但我別無他法...只可以眼白白咁望住Amy一步步咁邁向淪落風塵之路，淚水係雙眼不停咁湧出黎...
「你終於明白我當日所講既說話既意思...」「我」既聲音突然係我身邊響起
「我唔甘心」眼白白望住自己身邊既人遭遇不幸，但偏偏自己愛莫能助，果種感覺真係好痛。
「你既感覺我好明白，我曾經嘗試過去改變，但最後都只係悲劇既結果...」「我」語重心長咁同我去解釋....「發生左既事，我地冇辦法去做任何改變，我地可以做既，就係點樣用我地既力量同知識去創造一個更好既未來，唔好再拘泥於過去，大家既路仲好漫長，活好每一天，
係對大家最好既決定。」
我一直係度沉思「我」所講既呢番說話，當我拎轉頭想同佢講「我明白時」佢已經消失左...
「我」講得岩，已發生既事我真係冇能力去為佢地做任何改變，我唯一可以做既就係為佢地或者世界開拓更好既未來。
擦乾面上既淚痕，我再次啟動時空之門，返番去同Amy溫存後既晚上。
===============================================================================
「對唔住，我嘗試過，但始終改變唔到任何野」當我見到Amy後，我既眼淚完全忍唔到，我將我返到過去發生既事同Amy講。
「多謝你」Amy聽住我講既經歷後，強忍淚水咁同我講出呢3個字。「或者呢個就係我既命運，就算我搵唔到真正既幸福，至少，呢個係咁多個結局中最好既一個。」
「Amy，嫁俾我好嗎? 等我以後好好咁照顧你」
「Sam，你咁講我好開心，但你唔需要咁做，我只係一個夜場既媽咪，我唔配你既愛」
「我認真的，俾我好好咁照顧你愛錫你」講完後，我冇再俾Amy講野，就用咀唇封住佢個咀，呢一晚，我地只係簡單咁攬住訓，到訓醒時，Amy已經走左，只見床頭張紙:
「Sam，多謝你為我所做既一切，原諒我就咁走左去。識到你，已係我呢生最大既福氣，我會好好咁生活，尋找屬於自己既幸福。Love You」
睇完Amy既留言，心情可以話百感交雜，但我明白，或者咁樣，我地大家先可以做到真正既「重新出發」。