［短篇］香港都市傳說: 傳說一：不能觸碰的四不像（九）
「阿良，有無咩發現呀？」阿強邊翻找著城大圖書館的舊新聞邊對阿良說。
「無呀，最衰本日記無寫明日期，淨係得個死人月份，繼續搵啦！」阿良不耐煩地說。
又過了好一段時間，阿強再次開口：
「阿良，你覺得……當年係咪真係有人未死……」
聽到這個問題，阿良不禁停下了手上的動作。
兩人又沉默了好一會兒，氣氛顯得十分凝重。
就在兩人停下了動作後，有一名身影俏然的逼近他們，來到他們的身邊。
「你地喺度搵咗好耐啦喎，其實你地搵緊啲咩，睇下我幫唔幫到你地。」突然一名跟他們差不多年紀的女生走來。
兩人呆了一呆，不懂得如何反應。
「咦，唔好意思呀，我……我係咪阻住你地呀？我係呢度嘅圖書管理員嚟，見你地好似搵咗好耐都搵唔到咁，所以我諗住過嚟幫下你地。」這名自稱圖書管理員的女生對他們說。
「吓……吓……無呀，我地無聊搵緊啲舊新聞啫。」阿良隨口回應。
「舊新聞？邊一年架？關於咩架？我好熟架，你地唔介意我幫你地搵呀。唔記得介紹，我叫Tracy呀，你地叫咩名呀？」Tracy熱心地問。
「我……我叫阿良。」
「我……我係阿強。」
「阿強阿良你地好呀，你地搵緊咩新聞呀？我見你地都搵咗差唔多兩個鐘，不如等我幫下手啦。」Tracy續問。
兩人被這個突然出現的女人弄得一頭霧水，但心裏還是隱約認為他們的事是不應該讓更多人知道的。
「我.…..我地做緊啲資料搜集，唔駛麻煩你啦。」阿良在回應的同時，向阿強使了一個眼色，示意他不要亂說話。
「係......係囉，我地自己搵得啦。唔......唔駛麻煩你啦。」阿強也意會到阿良的意思。
「吓？咁......唔緊要啦，係啦，你地有無Facebook呀？難得有人同我一樣對呢啲新聞時事咁有興趣，我地做個朋友啦。」Tracy雖然遭兩人拒絕，但仍熱心的希望和兩人成為朋友。
兩人猶豫了一會，也想不到任何理由去拒絕這簡單的請求，加上對方亦算得上美女一名，所以最終也和Tracy交換了聯絡方式。
交談多一會兒後，阿良便藉口離開了城大圖書館，改為前往中央圖書館。
「阿強，你覺唔覺得果個女仔有啲奇怪呀？」阿良在乘塔地鐵途中，邊查閱手機邊問阿強。
「奇怪？都真係奇怪嘅，我地點會咁好艷褔，有女主動過嚟識我地呀？」阿強也是邊玩手機邊回應。
「屌，我唔係講呢樣呀！我係話，點解條女咁熱心，走過嚟問呢樣問果樣。明明我地都講話唔駛佢幫手，之後仲要走嚟Add我地Facebook，有無咁古怪嘅人呀？」阿良放下手機，認真的問阿強。
「其實......我都覺得有啲古怪。但......可能佢真係出於好心呢，呢個世界其實好多好心人嘅。」阿強雖然也感到少許奇怪，但並不太過在意，或許是因為他滿腦子都是關於四不像的事情吧。
「你咁講......都啱嘅......可能我真係多心咗啦。喂，你睇咁耐睇咩啫？」阿良問。
「我咪上網搵緊當年啲新聞囉，但奇怪嘅係，我搵到好多唔同嘅新聞。死人冧樓呀、鬼鬼怪怪呀、自殺呀，乜鬼都有，但就係無講城大生意外死亡嘅事。嗱，你睇啦。」阿強把手機拿到阿良面前。
「係喎，真係乜都有喎......喂，呢單呢？城大生醉酒街頭，險死街頭。仲有呢單，大學生因學業壓力太大，自殺未遂。仲有......」阿良看著那水蛇春般長的新聞清單，才發現只有一些有關大學生意外的新聞，但全部都和死亡無關。
「你都發現呢，新聞係好多呀，但全部都無死人。成個四不像傳說好似假嘅咁......」阿強帶點不安地說。
「可......可能只係網上資料唔齊啫，始終果陣未有網絡，中央圖書館應該會有資料嘅。」阿良也不安地說。
「希望係咁啦。」
就是這樣，兩人在帶著不安的情緒下，把那個奇怪的Tracy暫時忘記，來到中央圖書館，找尋和四不像有關的線索。
不經不覺，兩人在圖書館逗留了好一陣子，要不是Tina致電給他們，他們或許會繼續待在圖書館裏。
「喂，你兩個係邊呀？」Tina在電話裏急問。
「我同阿強喺中央圖書館搵緊資料囉，做咩事呀？」阿良不以為意地回答。
「中央圖書館？你地唔係喺城大咩，點解會走咗去銅鑼灣架？」Tina緊張地問。
「唉，講起就奇啦。今日我同阿強喺城大搵資料果陣，乜都搵唔到之餘，仲要有個奇怪嘅女人走埋嚟我地度，問我地咩事，又話要幫我地手咁。最尾我覺得有啲古怪，咪同阿強走去中央圖書館囉。你唔駛咁緊張呀？」阿良問。
「唔駛咁緊張？你知唔知依家幾點呀？」Tina急道。
「依家好早Ja？最多咪......」阿良看了一看阿強的手機，才驚覺已經是晚上七時半了。
「依家七點半啦！咪同你地講咗，唔好去到咁夜，八點鐘一定要搵人陪你地架嘛！仲有，我地明明講好咗今晚八點鐘返城大傾下有咩嘢搵到返嚟架嘛！你地唔好講咁多啦，快啲返嚟啦！」Tina提醒完阿良後，阿良馬上關閉了電話，和阿強一起離開銅鑼灣。
「喂，搞咩呀，突然間咁驚？」阿強不明所以地問。
「就八點啦，你唔記得咗本簿話啲人出事果陣係幾點呀？總之，我地快啲返去，唔好問咁多，返去再傾。」阿良如是說。
於是，兩人跑乘地鐵回去城大，而這一切，都被一個「人」看在眼內。