［短篇］香港都市傳說: 傳說一：不能觸碰的四不像（八）

不能觸碰的四不像（八）
 
於是，阿良把當天喝醉酒後，爬上了四不像的事情告訴Keith和Tina。
當然，包括他看見了四不像雙眼發紅光，和如何帶著阿強離開四不像的經過。
 
「唔係啩？你幾大呀，仲玩啲咁嘅嘢？」Tina聽到後忍不住責備他。
 
「咁……咁我飲大咗，咪……咪……」阿良也知道自己有問題，所以不敢回話。
 
「算啦Tina，唔發生都發生咗，依家再追究啱定錯都無用！我反而想知，阿強你又對四不像做咗啲咩呢？啱啱聽阿良講果陣，似乎佢都唔知究竟你做咗啲咩，不如你都講埋出嚟啦。」Keith看著阿強。




 
「吓？我……我唔駛啦，都無咩特別啫……係囉……無特別嘅……」阿強吞吞吐吐的。
 
「係囉，Keith，阿強唔想講就算啦。我地都係快啲去搵果個咩……咩初代委員長啦！」阿良比較關心是否真的有破解詛咒的方法。
 
「唔得！本日記簿清楚咁記載住，即使係同一個時間點接觸四不像，出事嘅先後次序都有唔同。而且，頭先我都有講，即使接觸到四不像，其實都有無出事嘅例子。我可以大膽咁假設，出唔出事，同埋出事嘅先後次序，係同果個人對四不像做過啲咩事有關嘅。如果知道咗你地邊個屬於嚴重啲，咁我地就可以針對保護其中一個人，避過詛咒嘅機會，都會大大增加。」Keith解釋完，再次望向阿強。
 
阿良和Tina在聽到後，也轉過身來看著阿強，等待他把當日發生的事情交代好。
 
「你……你地……」阿強被三人的目光壓得透不過氣來。




 
「得啦得啦，我講啦，好未呀！」阿強終於承受不住他們無形的壓力，把當天的事情告訴大家。
 
原來，那個晚上，當阿良因四不像的晃動，而導致嘔吐大作時，阿強原本還在邊拍片邊取笑他的。
 
但突然間，阿強感到強烈的尿意。
正常來說，學校某些地方的洗手間仍然開放的，要不然，回到歌和老街公園也可以解決他的生理需求。
 
可是，因為酒精和疲勞的緣故，他選擇了在阿良嘔吐期間，背著他，然後對著四不像鬆開了他的褲頭帶進行解放。
 




那一刻，阿強感到無比的暢快，但暢快的感覺，突然被一陣寒意打斷。
他不由自住的往上看，只見四不像的頭，由望向又一城的方向，慢慢的往下移動，然後以血紅的雙眼，直盯著正在排尿的阿強。
 
暢快的感覺，突然變成了無比的驚恐。
阿強被那雙眼看得雙腿發軟，不由自主的向後摔倒。
 
由於那時他仍然在排尿的狀態，故在向後摔倒時，他滿褲子都沾上了尿液。
他那一刻發出的叫聲，大慨能把一整楝大廈的人都吵醒吧，但當他發出那叫聲後，四不像的角，像有生命般，慢慢開始變長，並逐步接近阿強的臉。
 
說也奇怪，當那雙角慢慢接近阿強時，他突然感到自己的聲音消失了。
不管他多用力地嘗試發聲，但聲音像被喉頭鎖著一樣，無法尖叫。
 
他漸漸發現，那雙角來到他的雙眼前，還差一厘米左右，便會貫穿他的眼睛。
他的腦袋已經不能運轉，陷入一片混亂，就在這關鍵的時刻，他聽見阿良的聲音。
 




一瞬間，那雙角在他面前消失了。
之所以用消失了形容，是因為他看不見那雙角縮短的過程，而是真的像幻覺一樣，憑空在他眼前消失了。
 
但是，那雙發出紅光的眼睛，不但沒有消失，顏色反而變得更加血紅，死盯著他不放。
 
「成件事就係咁啦，之後就同阿良講嘅嘢一樣，佢拉住我跑返上宿舍啦！」阿強在敍述整個故事時，語句斷斷續續，身體不住的擅抖。
 
三人聽完後不禁沉默了。
 
「我諗……大家都好清楚，如果詛咒係真，下一個出事嘅，應該就會係……阿強。」Keith作出總結。
 
雖然阿強心裏也明白，他做出的事比起阿良的更加不敬，也有想像過自己是下一位受害者，但當從Keith口中聽到這個總結，眼淚仍是止不住的流下來了。
 
「無……無事架阿強！頭先咪講咗仲有希望囉！我地快啲去搵到果個咩初代委員長，問返佢究竟邊個寫呢本日記，就可以知道點樣可以避開個詛咒架啦！」阿良用力的搭著阿強，安慰他的同時，這番說話也有著鼓勵他自己的作用。
 




「咁……委員長，我地依家應該點做？」Tina問。
 
「Tina你好似我頭先咁講，去搵返初代委員長出嚟，如果可以嘅話，係搵佢嘅期間，問多啲關於四不像傳聞嘅嘢，最好可以問到果啲死者嘅屋企人聯絡方式同當時情況，愈詳細愈好。我就會去陳同學屋企，探佢屋企人同表示慰問之外，我會查清楚究竟呢排陳同學有無講過啲咩奇怪嘢。至於你兩個……」Keith看著阿良和阿強，像在思考著甚麼。
 
「點……點呀？我地有咩可以幫手呀？」兩人希望能盡快找到任何線索。
 
「你地兩個，可以嘅話去搵返晒當年嘅新聞出嚟，如果有舊雜誌就仲好！當年對呢啲神怪嘢，傳媒應該唔會就咁放過，咁樣就可以再知多啲呢個詛咒嘅事，同埋好彩嘅話，仲有機會搵到倖存嘅生還者！」Keith續說。
 
三人聽到後精神為之一振，阿良和阿強雙眼立即充滿神采。
 
「真……真係有機會搵到……生還者？」阿良小心地問。
 
「如果真係有人避過咗呢個詛咒，傳媒一定唔會就咁放過佢！就算報紙無太多資料，果啲八卦雜誌肯定唔會放過，所以你地俾啲心機搵資料。不過每日最多搵到夜晚八點好啦，之後你地兩個盡量搵多啲人陪，如果真係無人陪，嚟搵我或者Tina，其他時間你兩個都盡量唔好離開對方身邊。可能嘅話，我希望你地有錄音同錄影嘅習慣，盡量將一切都記錄低！」Keith最後的要求，顯然是針對兩人會出事而設的。
 
「錄音同錄影……我地都明白。但點解咁早就唔可以再搵，我地捱慣夜，頂得住喎！」阿良說。




 
「咁樣太危險啦，只要睇返日記，就會知道，所有出事嘅時間，大慨都係夜晚十點之後！如果太晏先走，我驚你地搵唔切人陪你地而出事！」Keith解釋完後，兩人微微點頭，便離開了委員房。
 
四人在出發前，不由自住地來到四不像前，他們都發現，在其中一隻四不像的角上，有一小塊的布碎纏在上面，還隱約能看到有小量的暗紅色污迹。
據Tina和Keith所說，那布碎跟最後一次見到陳同學時，他所穿的衣服是一模一樣的。
 
四人看見，心裏也不禁泛起一陣寒意。
看來，詛咒可不是假的......
 
眾人帶著不安的心情，各自遠離四不像，分頭行動去。