［短篇］香港都市傳說: 傳說一：不能觸碰的四不像（六）
「唔好發呆啦！負責新生導賞嘅委員會，傳聞有一份文件，係關於四不像呢個傳說。咁多年啲新生都無出咩大事，大慨同份文件有關！不過呢份文件，聽聞每一年都只會傳承俾委員長一人，所以，如果真係有咩方法可以避免掂過四不像嘅人出事，大慨只有委員長一個人會知道！」Tina看兩人猶豫不決的樣子，決定告訴兩人重點。
「但……但係，你都信果個傳說咩？同埋，如果真係可以避免出事，點解……點解今年果個新生會……會……」阿良實在不願親口提到那位新生死亡的事實。
「唉……其實真係唔到我唔信！雖然我安慰Zoe，果位新生其實只係一個意外，但係出事前嘅一段時間，佢嘅表現同埋佢所講嘅嘢，我都好難唔將佢嘅死同傳說聯繫埋一齊！」Tina無奈又帶不安地說。
「佢……佢有咩唔妥？」阿強問。
「簡單講，喺陳同學無返嚟學校果段期間，我同委員長曾經去搵過佢。當時佢嘅精神雖然好差，但講嘅嘢好有邏輯，一啲都唔似精神有問題。唯一會令人覺得語無倫次嘅地方，就係佢提到，佢每晚發夢都見到四不像，而且有次喺屋企感覺到有種俾人監視嘅感覺，佢望出窗外面，竟然見到四不像浮喺半空，雙眼發出紅光望住佢！相信任何人聽到，都一定會覺得佢精神有問題，醫生亦都係咁樣判斷，但當時委員長嘅神情即刻變到好緊張……」Tina回憶到這裏，不自覺的搖搖頭。
「我地安慰咗陳同學一陣之後就走咗。之後我問委員長，佢之所以咁緊張，因為佢信陳同學講嘅嘢係真，而且佢仲好肯定咁講，如果情況持續，陳同學好大機會會死！估唔到，一個星期之後，就真係出咗呢單意外。」
兩人聽到Tina這樣說，身體不自覺的顫抖起來，但同時產生了一個疑問，到底委員長隱暪了些甚麼，為甚麼他如此肯定陳同學會死亡。
他們對視了一下後，各自點了一下頭後，就決定去找委員長了。
三人來到一間委員室，推開房門，只見一名男子正在凝視著桌上的一份報章。
「委員長。」Tina對男子說。
「咦？Tina，你搵我？隔離果兩位係…..？」委員長被Tina嚇了一跳，然後發現有兩個不認識的人跟Tina在一起。
「佢地兩個係阿良同阿強，同我同一學科嘅。其實......我地係有事嚟搵你嘅......」Tina其實有很多疑問，只是她不知道應如何問起。
委員長看了看Tina，又看著阿良和阿強兩人不安的樣子，突然說：
「你地係咪想問四不像傳說嘅事？」
三人都瞪大了眼看著他，好像很疑惑為甚麼他會知道三人來這裏的目的。
「唉……你地坐低先啦，等我拎返份文件出嚟，再慢慢同你地講。」話音剛落，委員長便轉過身去，在一文件櫃中翻找著甚麼。
三人聽見委員長如此說，也乖乖的坐下，待他找到文件後，才開始發問。
「好，就係呢份啦！我估呢份文件，就係你地今日嚟嘅目的啦！」只見委員長放下一本純黑色，像是日記簿的東西，而令人好奇的是，這本日記簿，竟然是上了鎖的。
「委員長，呢本係？」Tina率先發問，一旁的二人都露出了好奇的眼神。
「呢本就係有關四不像傳說嘅筆記簿啦，入面清楚咁記低咗，以前曾經發生過嘅事同埋一啲出咗意外嘅名單。」委員長慢慢把鎖打開，只見簿裏的紙張有點泛黃，明顯已經存在一段時間。
「原來真係有呢本書架？」Tina在親眼看到後，也難掩其驚訝的神情。
「咁……呀……委……委員長，呢本嘢有無講過，如果真係唔小心得罪咗四不像，有無咩方法可以……避開呢個災難？」阿良關心的，當然是他自己的性命了。
「哈哈，你地唔駛叫我委員長，叫我Keith啦！得Tina會叫我委員長咁見外。至於你嘅問題，唔好意思，我都答你唔到，因為我都無睇過呢本書。」Keith無可奈可地說。
「吓？唔係啩？」阿良和阿強忍不住說，Tina也露出不相信的神情。
「呢本嘢成本字典咁厚，講真，唔係今日出咗單咁嘅新聞，我都醒唔起有呢本嘢。」Keith神情自若地說，看來不像說謊的樣子。
「吓？咁你地每年又知道要警告啲新生唔好掂四不像？又知道導賞團之後要做啲儀式？」二人追問。
「其實每年選新委員會之後，委員長都會被交待一啲注意事項，你頭先講嘅四不像傳聞，提點新生，事後拜四不像嘅儀式，通通都係口頭咁一代傳一代。自從建校出事之後，之後都無再發生過啲咩問題。唉，估唔到今年先嚟出事！」Keith抓了抓頭，看來這事也對他造成不少影響。
「咁我明啦，但你點估到我地嚟搵你，係為咗呢件事？」Tina問到重點。
「哦，普通推理啫。之前你有份幫手跟進陳同學件事，今日一出咗事，就帶埋兩個人過嚟，好難唔將佢地同四不像傳聞聯繫埋一齊。點都好，雖然唔知係你地身上發生咩事，但如果想知道傳說嘅事，呢本日記簿，絕對係關鍵。反正你地都嚟咗，我地一齊研究下，四不像傳說究竟係咩一回事啦！我最擔心嘅，就係成件事仲未完結……」Keith想起這本日記簿的理由，大慨就是擔心，事件不止影響到已死的陳同學，而是會發生更多的不幸。
四人安靜的在委員活動室裏，花了好半天的時間讀完整本日記簿。
到底不幸是否會持續降臨在城大的學生上？
而阿良和阿強，又能否透過這本日記簿找到生機呢？