［短篇］香港都市傳說: 傳說一：不能觸碰的四不像（五）

只見內文寫著「城大新生陳XX，疑因學業壓力問題，於昨晚十一時左右，在醉酒的情況下跑到馬路上，不幸被一輛小巴撞到。據目擊者所言，當時一名路人突然從轉角位置衝出馬路……」
 
阿良和阿強看到這裏，都轉個頭來互相看著對方。
「阿良……你估……呢個學生，應該唔會係……」阿強實在不想把話說得太明。
 
「痴……痴線啦！年中咁多新生，唔一定係佢嘅！應該唔係嘅，應該唔係嘅！」阿良也明顯感到不安。
 
他們兩人，在看到這個新聞瞬間，已不自覺聯想起，當日在四不像面前，有一位新生曾用香煙噴向四不像。
 
他們內心都不希望，出事的新生，就是當天對四不像不敬的學生。




 
兩人相對而望了好一會兒，同時作出了決定。
 
「我地不如去問下Tina知唔知果位新生嘅情況囉！」兩人幾乎同時把這句話吐了出來。
 
下一秒，他們已跑回宿舍，並且找到Tina。
 
只見Tina和Zoe兩人正在宿舍Canteen，但兩人都一臉嚴肅，好像有甚麼事發生了似的。
 
「喂，Tina！」阿良逼不及待地開口。




 
「咦？你地嚟咗啦？做咩事呀，搵得我咁急？電話講又講唔好。」Tina的語氣也是同樣嚴肅。
 
「我想問你地一樣嘢，就係……」阿良說到一半的話，突然收回肚子裏，因為，他在發問的同時，發現了放在桌上的新聞，Tina和Zoe原來也在看這宗新聞。
 
「喂，做咩呀你？問到一半又停咗嘅？」Tina感到奇怪。
 
「你……你地都睇緊呢單新聞？果個……果個應該唔會係……當日噴煙位新生卦？」阿良顫抖地問，阿強只能在一旁緊張地看著。
 
在阿良發問的同時，Zoe突然哭了出來。




「係……係呀！就係佢啦！點解會咁架？係咪因為我帶佢地去參觀，所以害死咗佢呀？Tina，我......我……」說著說著，Zoe又伏在桌上哭了起來。
 
Tina熟練的走到Zoe身旁並安慰著她，看來在阿良和阿強來到前，Tina已經在照顧著Zoe了。
此刻，兩人根本顧不上Zoe的情況，他們都只想知道，到底在那新生上發生了甚麼事，所以他們都注視著Tina。
 
由於兩人的出現，導致Zoe再次哭喊起來，Tina本想把兩人都狠狠教訓一頓，但當他看見兩人都一臉緊張，也察覺到事情有點不尋常。
 
於是Tina把Zoe帶回宿舍房內，待她安定下來後，便又來到Canteen跟阿良和阿強見面。
 
「點呀？你兩個嚟搵我究竟咩事？」大慨Tina也受事件影響到心情，所以語氣並不是很好。
 
但兩人並不介意，因為此刻，兩人都只想肯定，報紙上寫的新生，到底是否當日對著四不像噴煙的那個人！
 
「吓？點解你地會咁問？係呀，的確係佢！其實果次四不像事件之後，有幾個學生嘅情緒一直都唔係好穩定，所以我地負責新生導賞嘅委員都有繼續跟進！其中一個比較嚴重嘅，就係果日對住四不像噴煙嘅陳同學！我地之後都有主動搵佢地，安撫佢地，但陳同學喺返咗學一個月之後，就一直抗課無返過嚟啦，所有同學都聯絡唔同佢！估唔到佢無返學一個星期之後，就咁去咗……」Tina說話時除了有點悲傷外，仿佛也有一點自責的意味。
 




在得知事實後，阿良和阿強都像被雷電擊中一樣，面色變得慘白，整個人都失去了神采。
縱使Tina心情不是很好，但也忍不住問他們。
 
「喂！你兩個無嘢呀？頭先咁急搵我就係為咗呢件事？咪住！你地唔係……」Tina看見兩人的表情，也隱約察覺到了甚麼。
 
Tina追問了好一會後，兩人才從驚訝的狀況下清醒過來。
「我……我地兩個……」阿強回憶起四不像發出的紅光，實在說不出話來。
 
「無......無呀……我地咩都無做……做過……」阿良情況也差不多，本能地想逃避那天發生的事情。
 
Tina眼見他們兩人這種狀況，大抵也問不出甚麼來，便說：
「唉……你地跟我嚟，我地去搵委員長！」
 
兩人雖然情緒不穩，但也聽得明白這句說話。
只是，到底委員長能對事情有甚麼幫助嗎？