【練膽大法】我每日迫自己搵一位陌生人傾偈《陌樂偈》: 《陌樂偈》第42天－Band3學校的DSE考生
《陌樂偈》第42天－Band3學校的DSE考生
黃昏，巴士上層，勇氣值120。
目標沒有在看電話，只是一個人呆呆地坐著。
這種目標通常最容易成功，但我還是十分害怕。
因為我決定挑戰最可怕的目標－年輕女生。
她穿著整齊的中學校服，應該是剛剛放學。
猶豫了幾個站後，我終於開了口⋯⋯
這次，使用了全新的開場白：
「小姐你好⋯⋯」
她跟大部分陌生人一樣，愕然地看過來。
「我有個計劃係每日都搵一位陌生人傾偈，
我唔係Sell嘢、唔係傳教，同埋我有女朋友，
我可唔可以同你傾下偈？」
聽到我有女朋友後，她的表情慢慢變得放鬆。
她緩緩地點頭說：「好呀⋯⋯」
在此感謝一下第39天的陌生人，
由於她一開口就問我「返咩教會」，
啟發了我想到這一個全新的開場白。
（這場陌樂偈在幾個月前發生）
「你讀緊中幾？」
「中六。」
「你今年考DSE，有冇壓力？」
「冇壓力，因為啲老師都好好，雖然我哋係Band3學校，但啲老師都好用心教我哋。」
「啲同學會唔會好曳？」
「啲同學唔曳，係成績差啲啫。」
「係咪成日有人打交？」
「冇，我未見過。」
「你會唔會好想讀Band1？」
「唔想，有朋友讀Band1，佢話好辛苦，日日都係咁操。當初升中學嗰陣就想，屋企人知道我入咗呢間學校好失望， 我自己都好唔開心。」
「之後呢？」
「識咗啲朋友之後就覺得冇乜所謂，屋企人見我讀得幾好，都覺得冇乜嘢。」
香港的教育制度真是用心良苦，小學畢業就把小朋友分成不同的階級，從小便學習跟別人比較、競爭，讓他們了解到華人社會是怎樣運作的。
「你有冇睇新聞，最近有好多學生⋯⋯」
「自殺？」
「嗯，你覺得點？」
「我覺得可能係因為壓力太大，或者係俾人欺凌，我哋學校就冇呢啲情況，所以我理解唔到⋯⋯點解佢哋會咁樣做，我覺得⋯⋯好可惜⋯⋯」
「咁你返學開唔開心？」
「開心，我鍾意返學。」
「好難得有學生鍾意返學⋯⋯」
她問：「點解你會做呢個計劃？」
我說出了自己的原因。（詳情請看第1天）
她說：「我都有試過同陌生人傾偈。」
「係呀？點解嘅？」
「我搭巴士嗰陣成日都見到嗰個人，都持續見咗5年左右，一直都想試下同佢傾偈但係唔敢。有一次喺個活動度見到佢，所以就埋去同佢傾偈，原來佢之前都有留意到我。」
「男仔嚟㗎？」
她害羞地說：「係。」
「如果冇喺活動撞到佢，你一直唔會同佢講嘢？」
「係，喺巴士度唔敢同佢講嘢。」
「咁之後重有冇關聯絡？」
「我同佢交換咗電話，做到朋友。」
「咁你有咩感覺？」
「好開心～」
「你鍾意佢呀？」
她緊張地說：「唔係！」
兩個人花了5年時間猶豫，也不敢跟對方開口。
一次偶遇，就打破了這道缺口。
人類，總是需要一點點藉口。
「咁你同佢開口之前有咩心情？」
「真係好緊張，好驚俾人拒絕。」
「如果知道佢一定唔會拒絕你，你重驚唔驚？」
「如果知佢一定唔會拒絕，就緊係唔驚啦～」
我們總會害怕被人拒絕，所以猶豫不決。
但沒有試過，又怎知道會不會成功呢？
「有冇諗過第時想做咩？」
「我想做編劇。」她肯定地說。
在這個充滿比較和競爭的教育制度下，
大部分學生都不知道自己的目標，
只知道要讀大學、拿到學位。
她卻十分清楚自己想做甚麼，實在難得 。
「點解想做編劇？」
「因為我鍾意睇美劇，我以前鍾意寫嘢，睇完美劇之後覺得好好睇，所以想做編劇。」
「好少女仔鍾意睇美劇，通常唔係睇韓劇㗎咩？」
「我唔鍾意睇韓劇，我覺得啲劇情好寢。睇美劇又可以學到英文，我會睇有中英文字幕嘅版本。」
然後，同樣喜歡美劇的我，便開始跟她討論美劇。
她竟然說：「我鍾意睇啲血腥暴力嘅。」
我笑了，她果然比較適合當美劇的編劇。
「你啲同學呢，係咪都好似你咁，知道自己想做咩？」
「唔係，大部分人都冇諗過第時想做乜。有啲朋友都會有目標嘅，但好多時傾呢啲話題，傾傾下就覺得香港冇希望。」
一個城市沒有希望，
是由上一代造成，卻要下一代去承受。
「如果讀到大學，你都係諗住讀編劇？」
「係呀，就算讀唔到，都一定會揀自己鍾意嘅科。」
「你啲同學呢？通常想讀咩科？」
「好多同學都會揀啲搵到錢、有前途嘅科。但係我覺得讀完之後都未必做返個行㗎啦，所以一定係揀興趣先。」
「講得好啱，咁你屋企人有冇話想你讀咩科？」
「屋企人梗係想我讀Law、醫科嗰啲，但係條路係自己行㗎嘛，應該由自己決定返，做自己鍾意做嘅嘢。」
「加油，希望你可以做到編劇。」
我要下車了，留下這個女孩繼續在車上發呆。
我們互相微笑，沒有交換電話，就此告別。
我們都是陌路人，就這樣傾了一場陌樂偈。
在打這篇文章的今天，她應該放榜了。
無論她的成績如何，相信仍然會樂觀地面對。
始終，找到自己的目標，比讀書成績更重要。
因為一個有目標的人，即使遇到任何情況，
也不會輕易氣餒。
https://www.facebook.com/ChatToStranger