【練膽大法】我每日迫自己搵一位陌生人傾偈《陌樂偈》: 《陌樂偈》第41天－貓奴和他的流浪主人
《陌樂偈》第41天－貓奴和他的流浪主人
凌晨時分，遇見了一位先生和一隻流浪貓。
間中也會看見這隻貓，一直覺得牠十分可愛，
牠有著啡白色的花紋，看起來總是非常很乾淨。
但每次走近，牠都會馬上避開我。
而眼前這位先生，卻在輕輕地撫摸著牠，
牠俯伏在花槽邊，旁邊還有一碗貓糧。
以前也曾經看過這位先生，在餵這隻流浪貓，
我非常好奇，馬上走過去搵他傾陌樂偈。
換轉是以前的我，最多只是在旁邊觀察。
現在，我毫不猶豫就馬上主動走過去。
陌樂偈，果然能拉近人與人之間的距離，
今晚，還拉近了人與貓之間的距離。
「Hello～」「Hello～」
「你成日都餵佢㗎？」「係呀～」
我一接近，那隻貓便「貓上」提高警覺。
「佢係咪驚我？」
「少少啦，第一次見吖麻。」
「呢貓真係好靚！我成日都見到佢。」我說。
「佢有三兄弟，一模一樣㗎。」
「吓？原來有咁多隻㗎！我一直以為得一隻。」
「細佬就係嗰邊，仲有一隻唔見咗，唔知去咗邊。」
「原來唔只一隻，即係我有時見到嘅可能唔係佢？」
「喺呢頭見到嘅話，就應該係佢，呢邊係佢地盤。佢細佬就喺另一邊。」
「通常一個地盤得一隻貓？」
「係呀，其他貓過嚟佢會打走佢㗎～」
「咁佢會唔會去搵佢細佬？」
「會，佢有時會過去搵佢。」
「你自己有養貓？」
「係呀。」
「點解你會餵呢啲流浪貓嘅？」
「我係貓會義工。」
「咁你屋企養咗幾多隻貓？」
「唔講住，遲啲同你熟啲先話你知。」
牠的貓毛真的非常潔白，白得令我想高歌一曲：
「街上有隻小貓咪～小貓咪～小貓咪～
啡色白色小貓咪～貓毛白如霜～」
咩話？唔啱音？本身首歌都係咁～
「呢隻貓真係好乾淨喎～點解會咁乾淨嘅？」
「佢識自己沖涼㗎嘛～」
「點樣沖呀？」
「用口水沖，自己慢慢舔。」
此時，主人正懶洋洋地躺下，享受著奴隸的按摩。
他問：「你要唔要摸下佢？」
「佢唔驚咩？」
「我喺度，佢冇咁驚。」
我慢慢地把手伸過去。
然後，他就像在馴服一隻老虎，
一邊用手安撫著他的主人，一邊讓我摸牠。
摸了兩下，主人馬上反抗逃走。
「佢係咪唔鍾意？」
「你太緊張，摸得佢唔舒服。」
「要點樣摸㗎？」
「其實好簡單，你有冇女朋友吖？」
「有。」
「好似摸你女朋友個頭咁，溫柔啲～
佢覺得你摸得舒服，就會俾你摸。」
「佢幾多歲呀？」
「7－8歲。」
「有冇名㗎？」
「我叫佢大佬。」
「佢出世先？」
「唔知邊個出世先，是但叫一隻做大佬，另一隻叫細佬。嗰陣喺街睇住佢出世，唔咬人㗎，好乖～如果有人收佢就好好養。見到其他貓佢就會好惡，有時啲人放貓，佢就會同人打交。」
「有人會放貓嘅咩？」
我心目中「放貓」和「放狗」是一樣意思。
「即係啲人唔要。」
「呢隻貓咁靚，點解咁耐都冇人養佢？」
「緣份嚟嘅，有啲人又鍾意bb，我又太多隻。」
「其實如果隻貓喺街度出世，佢慣咗咁樣生活，
就算冇人養佢，應該都唔覺得自己好慘？」
「係～好似非洲啲人咁，佢哋生活可能冇咁好，
但係冇見過外面嘅世界，都唔會覺得自己慘，
畀人放出嚟嗰啲就慘喇，唔習慣喺外面生活。」
我們習慣了拿非洲來作例子，
今時今日的非洲，可能沒有我們想像中貧窮。
經常拿非洲來作舉例，好像不太適合。
呀～
突然想舉一個例子：
寵物被遺棄的感受，就像我們被赤裸掉到非洲一樣吧！
突然，下起大雨。
那位陌生人打開傘子，叫我過去，分一半位置給我。
而他的主人，則避進花槽避雨。
「你係咪日日都嚟餵佢？」
「係呀，打風落雨、病到發燒都嚟，
如果我唔餵佢哋，佢哋就要食垃圾㗎喇～」
「你每日餵幾多隻貓？」
「三隻，餵咗嗰邊另一隻先，再餵細佬，最後餵大佬。之前呢度仲有隻黃色嘅，依家唔見咗，唔知去咗邊⋯⋯」
「會唔會係畀人養咗？」
「唔似，佢會兇人，可能走遠咗唔識路返嚟。」
聽得出他十分擔心，像在談論自己的子女一樣。
這位陌生人，為了幾隻陌生貓，
非常有恆心地付出時間、金錢及感情。
無論打風落雨、生病了，也要餵飼牠們，
只希望牠們每天也吃得飽。
這種無私的奉獻，只有一個原因⋯⋯
他已經被奴役了。
這時候，他的主人又回來了。
我再一次作出挑戰，把手慢慢伸過去。
我跟足陌生人的指示，溫柔地慢慢撫摸他的背脊。
這次，牠沒有避開我，十分放鬆。
我一下一下， 輕輕地撫摸著牠柔軟的身體。
牠慢慢由站立的姿勢，慢慢變為躺下。
看著牠享受的表情，真的非常有成功感。
我不知道牠是否十分舒服，但我的手就超級舒服！
他的毛真的非常柔軟、順滑，
就像在摸一張羊毛地氈的感覺。
手感一流！真的會令人上癮！
現在想起來，也很想再摸一下。
真的很掛念這隻貓⋯⋯
看來，我也被奴役了！
真不明白，為什麼有人會遺棄牠們。
我問了他每晚大約什麼時候來餵貓，讓我有機會再看到主人。
「佢日日都等你嚟？」
「係呀，我一叫佢就出嚟食嘢。」
「你點樣叫佢？」
「我有個暗號嘅，但唔會亂咁話畀人知。
遲啲熟咗先話畀你知吖～」
夜深了，天空還在下雨。
為了同一位主人，我們兩個人也淋濕了半身。
我再摸了牠兩下，然後跟他告別：
「我走先喇，下次見啦～」
「好啦～使唔使遮埋你呀？」
「唔使喇～我住喺附近咋，唔該曬～」
「第日見～Bye bye～」
我凝視著自己的新主人，依依不捨地離開。
不知道對方名字，沒有交換電話，兩個人就此告別。
我們都是貓奴，就這樣摸了一場陌樂貓。
https://www.facebook.com/ChatToStranger