【練膽大法】我每日迫自己搵一位陌生人傾偈《陌樂偈》: 《陌樂偈》第32天－沒有筆名的專欄作家
《陌樂偈》第32天－沒有筆名的專欄作家
https://www.facebook.com/ChatToStranger
開了《陌樂偈》Facebook Page半個月後
一位記者Inbox我，說無意中看到這個Page
想跟我做個人物專訪，那時候我回覆她：
「謝謝你的邀請，我暫時不想公開自己的身分 」
不想公開自己身分的原因，
除了覺得《死亡筆記》中的「L」很有型外
還希望像蝙蝠俠一樣，成為一個象徵
如果，「每個人也可以是蝙蝠俠」
同樣，「每個人也可以傾陌樂偈」
你不需要知道，誰人在搵陌生人傾偈
因為，你同樣可以搵陌生人傾偈
此外，每個人對認識的人，都會有一定的偏見
同一句話，由不同的人說出來，有不同的效果
假如，每個人也不知道我這個陌生人是誰
就不會因為對我的印象，而認同／不認同我的說話
之後，陸續有不同媒體的記者，邀請我做訪問
並希望我公開自己的身分
不同媒體的報導，能令更多人認識陌樂偈的理念
但接受訪問，就必須公開在下的身分
那段時期，我一直在考慮「要不要接受訪問」
直至遇上了，這位做過專欄作家的老伯伯
晚上，一位大約80歲的老伯伯，在巴士站等車
那天，我還未完成任務
於是走過去，站在他旁邊裝作等車
伯伯一個人靠著欄桿，等待著巴士的來臨
機會來了～陌生人！
面對老人家，總是比較容易開口
「哥哥你好，新年快樂！」
他臉帶笑容地回應我：「新年快樂！」
「你今日去邊呀？」
「啱啱去完嗰邊個廣場跳舞」
「我成日見到有人喺嗰度跳舞，你成日都去？」
「係呀，日日都去㗎」
「你哋跟住咩音樂跳㗎？」
「有中文歌、英文歌、國語都有
通常係啲老歌，有啲歌老到我老豆嗰陣聽嘅都有」
「你哋跳舞，會唔會比人投訴，話你哋嘈？」
「唔會，係政府安排嘅，每晚七點都可以喺嗰度跳」
「係咪有一個人，負責教你哋跳舞㗎？」
「冇人教，自己跳」
「即係每個人跳嘅動作都唔同？」
「人人啲動作都一樣，新加入嘅就跟住其他人跳」
「咁啲動作係邊個發明㗎？」
「唔知，每首歌有唔同動作，人人都係咁跳」
每個人跳著一模一樣的舞步，但沒有人帶領
新加入的人，跟著每天在這裡跳舞的人學習
然後把這些舞步，一直流傳下去，真神奇啊！
「最初點解你會去跳舞嘅？」
「退咗休冇嘢做，去嗰度坐低睇人跳舞，
睇睇下自己落埋去跳」
原來他起初是一位觀眾，看了一段時間後
主動過去認識那些每天都在跳舞的陌生人
然後進化成為表演者，跟其他舞者成為了朋友
還愛上了跳舞，像上癮一樣，晚晚也要去跳舞
「你退休之前做咩㗎？」
「日頭做文員，夜晚寫報紙」
「Oh! 你係作家？喺報紙寫咩？」
「喺文學版，寫小說、散文」
「我真係有眼不識泰山！點解你可以喺報紙寫嘢嘅？你識人喺嗰度？」
「唔識，寫完自己寄去，寫得好就會登出嚟
金庸、倪匡嗰陣時都係咁樣開始寫
之後報紙畀個專欄我，一日寫一篇，有稿費
有人搵我出過幾本書，而家書局有得賣㗎～」
「嘩你咁犀利呀！出版社主動搵你出書？」
「出版社見到你有人睇，就會搵你出書
有人買就有錢賺，佢哋都係做生意啫～」
「你係咪寫咗好多年，寫到退休？」
「寫到97年，就冇得寫小說喇！
因為中國政府，怕啲人亂寫嘢，
抽起晒香港所有報紙嘅文學版」
當年，如果沒有文學版，
可能就沒有金庸、衛斯理這些出色的文學作品
由1997年開始，
香港變成了一個「和諧」，但不重視文化的地方
他在報紙寫專欄小說，又提起金庸、倪匡
我想像他寫的，是當年十分流行的武俠小說
或者像《衛斯理》那種天馬行空的科幻小說
他寫的作品，一定十分有型吧 ！
「你寫過咩書呀？等我去買嚟睇下」
「兒童文學」
「係咪即係講啲動物嗰啲故事呀？
我都好鍾意呢啲故事㗎！譬如講狐狸呀…」
「係呀！我有本書叫《斑點狗的故事》」
他高興地說
超出了我的預期，但我覺得這位伯伯非常可愛
要充滿童真的人，才寫得出這種故事
比起寫武俠小說、科幻小說，更加有型！
每天把歡樂、知識帶給小朋友
我很想看一下他的作品，
但《斑點狗的故事》這個書名比較普遍，
我怕在書局找不到這位伯伯的著作
「你筆名係咩？等我搵你啲書嚟睇下」
「筆名？我唔用筆名，我用真名！
做作家，要為自己寫嘅嘢負責！ 」
這時，他等候的巴士來了
我跟他告別，然後一個人繼續站在巴士站
我腦海中不斷重複著老伯伯的說話……
「做作家，要為自己寫嘅嘢負責」
「做作家，要為自己寫嘅嘢負責」
「做作家，要為自己寫嘅嘢負責」
我心底裏不想公開自己身分的真正原因，
可能是為了保護自己，讀者不知道我是誰，
不需要為自己寫的東西負責
仔細想，每天在這裏留言、做實驗的讀者
每位也是有名有姓，還有自己的真實照片
只有我一個人隱藏身分，對大家很不公平
謝謝這位作家伯伯，令我有了決定
我們都是陌路人，就這樣傾了一場陌樂偈
2017-01-29
幾天後，我答應了記者的邀請，開始安排做訪問
我問記者們，怎樣認識《陌樂偈》這個專頁
她們都說，在瀏覽Facebook時看到朋友讚好
覺得名字很有趣，於是進來看一下
謝謝各位讀者，閱讀本人打的文章
謝謝你按讚好、做實驗，讓更多人認識《陌樂偈》
謝謝每一位邀請我做訪問的記者
最近，不同媒體的報導，差不多要刊登了
我希望各位讀者，成為最先知道我身分的人
就讓我親「手」把自己的名字告訴你們
各位陌生人，我叫 梁焯霖
我是一名演員，也是一名剪接
最近，還成為了一名作家
《實驗環節》
謝謝你看完整篇文章！
歡迎參與活體實驗～
看到這裡的讀者，請不要按「讚好」/「Like」
本來認識我的朋友，請按「心心」
陌生人，請按「O嘴」
然後留言！用1至100個字，
說一下你怎樣認識《陌樂偈》
各位紙言的讀者，歡迎到Facebook參與實驗，謝謝支持！
https://www.facebook.com/ChatToStranger