《精武．黑俠》: 第八章︰秘笈
這一晚，我在床上輾轉反側，久久未能入睡，只好眼睜睜的看著天花板以渡過漫長的一夜。
翌日，我很早便起了床，梳洗過後便替自己和振聲煮好早餐，打算享受一個比較舒服的早晨。
煮好早餐後，便走去開著電視，了解一下今日香城有甚麼新鮮事。
「昨晚約凌晨二時，一名男中學生於其沙田住所跳樓自殺身亡。警方未有撿獲遺書，現正調查其自殺原因。」
電視機畫面下方，就一行簡短文字，形容了一場悲劇。
一看到這單新聞，我怒上心頭，眼裡充滿了怒火。
我知道，我知道這是關偉和的所為。我知道只要解決掉關偉和，那就不會再有學生無辜受害。
振聲走過來，語重心長地說：「陳真，我明你諗緊乜嘢。但聽我講，唔好去呀，上一次寂主只係打你幾拳，都已經打到你入廠啦。你今次再去，佢真係有機會打死你架。」
「我點能夠唔理！？而家我地知道咗背後係邊個主使，只要捉到關偉和，一切就會完。唔會再有學生受到傷害。」我反駁到。
振聲冷靜地說到：「問題係而家佢有寂主保護住呀嘛，係我地知係關偉和做嘅，我都好想打死佢，但係我地未埋到佢身邊已經死咗啦！」
「我唔理！就算要我犧牲自己我都要捉到關偉和！你知道為咗班學生我根本唔介意死！」我緊緊地盯著他說。
振聲雙手放在我肩膊上說︰「事實係而家學生自殺只係呢個政府嘅一部份嚟架咋！我地仲有好多嘢未搵到出嚟架，如果今次你咁易就話要死，咁下次呢？下次我地遇到再嚴重啲嘅事仲有邊個去做呀！你冷靜啲好唔好呀陳真！我地需要你去做更多嘅事呀！」
想到這裡，我感到十分痛心。兇手就在眼前，眼看他又害死多一個學生，但偏偏我就無能為力。我曾立誓要保護這班學生，要保護香城的所有人，但如今我只可眼睜睜看著一個又一個學生死在我眼前。
這種無力感，就像心窩被千刀萬剮般痛。
我情緒逐漸失控，跪在地上嚎哭起來：「但係嗰啲都係人命嚟架！佢地都唔想死架！有冇人理過佢地，有冇人諗過佢地呀！原本佢地可以繼續生存落去，去拍拖結婚，搵份工，生兒育女，係邊個攞走佢地呢個權利呀！？原本關偉和佢地係要幫班學生架，唔係推佢地去死呀！佢地都係人命嚟架…佢地原本唔洗死架！唔應該係咁架…個社會唔應該係咁，做人唔應該係咁…」
振聲默言無語，只是低下頭來慚愧地看著我。
「個世界唔應該係咁 做人唔應該係咁。」
靜默了一個早上之後，大家的心情都開始平伏下來。
我緊握著拳頭，開口打破沉默：「如果我有能力對抗寂主，我就可以救到班學生。如果我再好打啲，我就可以保護到更多人，係咪呀…振聲？」
「你想做咩？」振聲疑惑地看著我。
我慢慢抬起頭，以堅定的眼神看著振聲道：「佢話我呀爸有本秘笈收埋咗，我就去搵嗰本秘笈。只要搵到本秘笈，我先有機會同佢一搏。」
「但係你連...個本所謂秘笈係咩樣，喺邊都唔知喎，你一啲線索都無喎，點搵呀？咁簡直係大海撈針。」振聲問道。
「只要本秘笈一日仲存在，我地都有機會搵到，唔洗擔心。」我答道。
我思索了一會，接著說：「如果呀爸佢有心收埋樣嘢而唔係去毀滅佢，啫係佢都有心想有人搵到佢，但係究竟佢想留俾邊個呢？斷估都唔會係寂主啦，如果佢有心俾寂主嘅就應該一早俾咗啦。」
「會唔會係想留俾你呀？話晒你係佢個仔。」振聲猜測道。
我顯得十分困惑：「無理由架，呀爸佢事前無可能會諗到我有一日會變成咁架喎。」
「咁又係...」振聲覺得同意。
我說道：「不過點都好啦，見而家屋企人應該返晒工，我而家就返屋企搵。」
「喂記住拎埋個喼返去呀，你去咗旅行架，台灣呀，記得呀。」振聲不忘提醒到。
說罷，我便提著行李，回家開始尋找寂主口中所提的秘笈。
一回到家，放低鑰匙，望著天花牆壁，那種陌生的感覺又湧上心頭。
我記憶中的家，並不是這個地方。以前地方雖然比這裡小，但屋內總會有吵鬧的人聲。每次一回到家中，父母總會走上來替我提書包，對我噓寒問暖，感覺十分溫暖。
眼看這裡雖然大，但一片冷清，沒有一點人氣，讓人不想多留半分鐘。
走進房中打開大大小小的抽屜，表面看似設備齊全，書桌檯燈書櫃衣櫃俱備，但其實內裡空空如也，只有兩個抽屜擺放了我的衣物。
我決定走進母親的房內，看看還有沒有甚麼東西是爸爸留下來的。
此時門外出現了鎖匙擺動的鏗鏘聲，我馬上走上廳查找是何人回家。
「咦呀仔？你唔係去旅行架咩？」母親看到我之後驚訝地問道。
我故作輕鬆地道：「哦係呀，今朝落咗機啦，咪返嚟沖個涼，執返啲行李出嚟囉。你又做咩咁早返嚟嘅？」
「我大矇呀，留低咗個patient份file，咪趁食晏返嚟攞囉。」母親拍一拍自己額頭答道。
母親應該知道以前把爸爸的舊物放到哪去，於是我趁機向母親詢問。
我先以想尋找自己舊物為由：「媽呀，我想問呢...你將我以前啲嘢擺咗喺邊呀？」
「吓？你而家要呀？」母親邊走進房邊問道。
我答到：「無，我見自己返咗嚟香港咁耐一直都未有真正咁settle down過，連我間房都咁空咁，我咪諗住搵返以前啲出嚟，睇吓有咩要有咩唔要呀嘛。」
「嗯...你都知自己唔痴家架咩，都好彩你曉返歸。其實你同你呀爸啲嘢呢，我一直擺晒入倉嘅，但係今日我就無時間陪你去架啦，一係我俾條匙你你自己去睇吓ok？」母親說道。
我欣然說好，待接過母親的倉匙，我便出門前往位於火炭的倉庫。
來到母親所說的工廈單位，用鑰匙把門打開，按下燈掣，房間內的舊物一目了然。
房間內，所有東西都整齊地擺放好，將我和父親的東西分門別類地格開，避免混淆。
走到角落，發現了那個我以前學泰拳時用來裝著護手帶的透明盒子。拿上手吹吹灰塵，盒內的鮮紅色手帶逐漸顯得清楚。我想起以前每次去學泰拳，父親都會親自來接我下堂，每次都會仔細地察看著我，生怕我會受傷似的。
這裡埋藏的不只是一堆舊物，這裡還埋藏了我和父親舊日的時光。看著每一件物件，我都可以憶起我與父親相處時所發生的種種。但我明白，縱使我有多想懷緬這些日子，現在並不是時候。
我把盒擺回原位，走過去擺放父親雜物的位置。
我打開了每一個雜物箱，儘量不把任何線索遺留下來。打開的，全都是一堆普通的雜物，衣物、舊相簿。到我打開了一個特別沉重的箱子，發現裡面裝滿了書籍。我仔細地翻閱每一本書，想尋找一下內裡有甚麼乾坤。但是，裡面的通通都是一般普通的書籍，連一本稍為特別一點的書籍都沒有，更不用說能找到甚麼武功秘笈。
我嘆了一口長氣，難道這裡真的沒有甚麼所謂的武功秘笈？難道父親根本不是想把秘笈留給我，是另有其人？
我抱著極小的希望，打開了最後一個雜物箱。發現裡面有三個分別印著母親、瀅瀅和我名字的盒子。
我深呼吸一下，慢慢打開了印有我名字的盒子，裡面有一條鑰匙，和一張已經發黃的紙。
紙張上，寫著一間銀行的地址，我認得，這是父親的筆跡。
我因著好奇心，打開了另外父親給母親和瀅瀅的盒子，發現裡面早已空空如也。
一間銀行和一條鎖匙，我想這應該是一條保險箱鎖匙來的，於是我便上網找了那間銀行的電話，致電預約開保險箱，當我說出了父親的名字作查找時，銀行竟然能夠稱呼我做陳真，細問之下，原來這個保險箱早在七年前已經轉到我名下。
即是說，原來父親早在七年前已經知道自己會遭遇不測，所以才留了三個盒子給我們？
父親，究竟你七年前發生了甚麼事？
你會有機會告訴我們這件事的真相嗎？