一個書生既Player故事: 三七六

至於我同江柏琪幾時結婚？
 
我地既計劃就係，呢半年開始不設防扑野（以前只可以喺安全期中出）。
 
等有咗BB，我就會正正式式將江柏琪娶返屋企。
 
 
 
起初同江柏琪一齊既時候，我有諗過快D簽紙結婚，搞大佢個肚去綁住佢，咁就會有安全感。
 


但我喺新聞度，睇到一份心理學既研究，佢話如果同居結婚係順勢而唔係一個決定，婚姻後既幸福度會大幅下降。
 
只有確認咗兩人既身心都準備咗結婚要付出既義務，同埋現實既許可，先係最理想既結婚時候。
 
『我送咗咁多禮物、我追咗佢咁耐、一齊咗長時間、朋友圈重疊晒。。。』
 
順勢付出咗既Sunk cost會令人更加唔捨得放底錯誤既愛情。
 
安全感有一半都係來自於自己，無自信既人，就算簽咗紙，有咗BB，都係可以缺乏，疑神疑鬼。
 


諗到咁樣，我就覺得結婚唔好太急進。
 
我主動同江柏琪提過對結婚既睇法，佢都同意大家需要多幾年既社會經歷，等心熟完全成熟先去下呢個改變人生（？）或者毫無影響（？）既決定。
 
而經過歲月既洗禮，我地都對大家有著無比既信心同埋默契。
 
大大小小既難關都一同跨過。
 
 
婚姻對我黎講，同戀愛唔同。


 
細個拍拖，即係同溫梓柔、Michelle、Stephanie，我係享受同佢地一齊果種感覺。
 
同Michelle都叫經歷過淫照事件既難關；但另外兩位，就真係好單純既玩伴。
 
戀愛就好似打機，每每去到床上就係遊戲爆機既時候。

而婚姻卻係熱身完遊戲既開始。


 
 
 
關於付出。
 


好多人喺得唔到愛既時候受到精神煎熬，話點解我付出咗咁多野，到頭來得個吉；點解人地無付出過，你都愛佢，公平咩。
 
我只能說，少年，你太年輕，呢種諗法係天真。
 
呢個世界無公平，只有選擇。
 
自從我對林敏兒好好，佢都依然俾帽我戴；對溫梓柔、Carmen唔上心，佢地都依然咁鐘意我。
 
我就明白，感情唔係一單交易，而係投資。
 
交易－－你花咗錢、心思、時間落去，就可以買到相應既貨品。我付出二十蚊，佢就俾返一杯珍珠奶茶我，無花無假。
 
投資－－你揀咗呢隻Product，要投入更多既心血去澆花、栽培。投資涉及風險，可升可跌，無人可以保證你會有收獲。睇下你可以承受既Loss同Risk係幾大。一般人偏向穩陣買藍籌等收息。進取D又可以接受到俾人斬倉銀紙變白紙，以小搏大買下牛熊；再貪心D就買期指，最大風險係要補倉。如果你乜都驚，蝕咗又瓜瓜嘈，覺得俾人呃，就唔好開始投資，咁就一定唔會輸！不過，你都唔可能賺到更加多既錢。
 
投入幾多、俾邊個既決定喺自己手中。


 
 
 
有朋友Query過我同江柏琪既愛情，質疑江柏琪只係搵我埋單，因為有樓先至同我一齊。
 
我唔認同佢既睇法。
 
埋單只係網絡上人云亦云既用語。
 
當到你遇到你愛既人，真係會在意係唔係埋單咩？
 
如果我係一個有能力既男人，我可以俾到更好既生活、快樂我愛既人，咁又有何不可？
 
呢個係能力，同埋你對另一半既慷慨程度問題。
 


可能平常人睇到樓或者錢好大，但對我黎講，呢D只係身外物，比起江柏琪，又算得係咩？
 
就好似小學有每日有十蚊既零用，我唔介意每日分八蚊俾買冰紅茶同埋零食俾林敏兒一樣；只得兩蚊買平價零食都毫無怨言，只因我有能力令到身邊果個人開心。
 
活在當下既人，睇既應該係我同對方幸福既現在以及可共同創造既未來，而唔係沉溺喺無法改變既過去。
 
唔通每日為咗一個男人而自怨自艾、哭哭啼啼、怠慢人生就叫做付出咩？講出口既就叫做付出？呢樣野我最叻，因為把口叻，大部份人都只係聽你講既野就信以為真，所以點解我媾到咁多女，有時連自己都呃埋。
 
Carmen為咗我剪短頭髮，Stephanie為咗我改變自己，做淫婦。又有無諗呢D「付出」係咪我需要既野？我鐘意江柏琪，佢唔洗為我屈就自己去改變，做返自己就夠。
 
更多既平凡事我無同人講。
 
成功既戀愛係可以幾咁甜蜜；成功既婚姻係講點樣喺自己既家庭崗位付出，互相扶持。
 
江柏琪每日努力工作，同我分擔供樓既開支、家務、唔開心既時候自己處理好負情緒、堅強幫我解決問題、唔發脾氣，呢D唔係更加大既付出咩？


 
只不過我唔會特別向外人提及。
 
就好似大部份人都唔會讚頌自己既父母，為咗仔女甘願做一個家庭主婦，每日都默默咁替我地洗衫煮飯，呢D先叫付出。
 
始終佢唔係當時人，佢地唔明白我同江柏琪之間既Chemistry，果種對的人、無人可以取代既感覺係無辨法形容俾外人知道。
 
我既事情亦都唔到任何人評論。
 
 
世人都係好膚淺，佢地只會相信用眼睇到最表面果一層既野。

但事實係，好似小王子所講：

「最重要的東西只用眼睛是看不見的。」

 
 
我就係林書生。



[完]