一個書生既Player故事: 三七四

工作五年，身邊既朋友都開始有穩定既感情生活，拍拖既拍拖、結婚既結婚，生仔既生仔，唔再好似以前咁，每見一次Status都會好似News feed一樣要重新Update過。
 
Felix搵到一個身材好好既瑜伽導師兼知名既Foodie做女朋友。Parsons同埋Wade幫口，終於我地四個喺一場飯局再次見面。佢知道咗我同林敏兒既往事，加上已經搵到更好既女朋友，釋懷咗原諒咗我。我地呢個四人組合終於可以重新出現。
 
Parsons喺無數次曖昧後，最近想追一個好有挑戰性，唔Show佢既朋友既朋友。
 
Wade返工之後改變咗佢核突麻甩既打扮，剪咗個爽朗頭，著返少少名牌既衫。喺網上既單車之友群組識咗而家既女朋友，終於都有扑野既機會。
 
SP一大堆既Hailey搵到一個靚仔又有錢既二世祖埋單。
 


Michelle識咗一個意大利洋腸同佢拍拖。佢基本上已經移居外國，過住香港人羨慕流浪瘋狂去旅行，以藝術為生既生活。
 
Stephanie同我講，佢喺婚紗展認識咗一位婚紗設計師，仲話從來未遇過一個咁成熟穩重，唔會失蹤、唔會發脾氣、唔搵SP，連食飯有無營養、幾多卡路里都會幫你計算埋擔心你食唔飽咁體貼，一個令人安心可以將未來交俾佢既男友。原來可以做自己，唔需要委曲求全都可以得到愛，因為自己係一個值得被愛既人。
 
羅嘉樂出黎做野之後，同LKF樂瞳分咗手，摺毒返工既佢事業捱出頭，喺一次朋友飯局識到佢既女朋友，準備結婚。
 
丁丁仍然同緊同一個男仔一齊，深潛既佢我唔太清楚佢既近況。
 
當連肥傑同埋阿婷都拍到長拖既時候，我就知道單身既朋友就如深海既寶物一樣難搵。
 


所以話，單身以及同父母同住既日子，其實好短暫。
 
假如你有八十歲命，不過只係佔人生四份一既時刻，其實又單身有咩咁大不了。
 
雖然喺我呢個女伴不斷又一個人住既人口中講係毫無說服力，不過我依然係咁諗。
 
人生遇見既每一個人、每一個經歷都會成就今日既自己。
 
每一個出現既人對我意義非凡，無論開心定唔開心，我都心存感激。