一個書生既Player故事: 三六四

畢業禮好似人死前既走馬燈，你喺呢三年大學生涯經歷留得低D乜野，都會喺今日出現。
 
Wade、羅嘉樂、肥傑、陳詩詩、丁丁、阿婷、Hailey、Carmen、其他仲住緊Hall既同學都有抽時間過黎搵我影相。
 
部分疏於聯絡既朋友都仲願意特登來走一場，即使只係影一張相，傾幾句，都足以令我感動。
 

 
「我想去廁所。」江柏琪話。



「你行遠少少去AC3果個廁所會乾淨D。」最近既廁所一定臭到仆街。

「OK。」江柏琪交低咗相機俾我。

「你條女好正，邊度識嫁。」Parsons即刻問我。

「咪條條聲叫我女朋友喎。Btw江柏琪係我中同。」

「介紹俾我識啦。」



「收皮啦，呢個唔得，認真既。」

「認真？」

「係阿，我要做個好男友，同佢結婚。」

「世界變。睇佢個樣係好女仔。好好對人啦。」

「顧掂你自己先啦，A380。」





「咦，Stephanie喎。」Parsons指住Stephanie。

Stephanie無著Hall look，而係簡單既花紋恤衫，配棗紅色短裙。

毫無預告地出現，講聲阿嘛，等我帶埋條鏈出來。

講落，我地自Quit Hall以來已經有三個月無見過面或者傾過計。

我有一刻覺得，如果我唔搵佢食飯送頸鏈，可能從此真係唔會再見面。

所以見到Stephanie，我真係好開心。

「Step，好耐冇見啦。有冇掛住我呀？」我用一個開玩笑既語氣問Stephanie。唔知道臉上會唔會曝露咗我過份既喜悅呢？



「係呀。我特登黎搵你影相嫁，係咪好好先。」係咪呀，落堂經過咋？～～

「你最好啦～抵我咁錫你。」我今日無講出口串Stephanie。

「你而家返緊咩啊？」Stephanie問我。

「我而家係爸爸間公司度做緊呀。你有冇見過呢個系列既頸鏈呀？我有份搞嫁。」我打開電話，開我打算送俾佢條鏈既相出來。

「呢個牌子都唔平，我自己就唔捨得買。都係搵個男人送俾我啦。」

「我遲Ｄ送條俾你啦～不過唔好話俾人知喎。」

「拿，你話嫁，唔好走數呀！」



「我書生幾時走過數嫁。過黎影張相先。」

江柏琪去咗廁所未返，咁唯有同Stephanie自拍先。

我拎電話同Stephanie自拍。

我一如以往咁搭住佢膊頭，頭側向Stephanie自拍，我好懷念同Stephanie好Pure既呢種感覺。

張相就好似係我地大學生涯既總結咁，有一個好既完結。



「係呢，自從上次，你仲有冇同Felix聯絡？」Stephanie問我。

「冇啦緊係。唉，我都知我係做錯左。」我話。其實我仲想問Stephanie知唔知Felix既近況，但佢咁樣問得我，即係佢都唔清楚Felix最近既事啦。



「都無計，發生左既事都改變唔到。出黎做野記住生生性性啦，唔好再好似以前咁貪玩。」Stephanie對我說教。

「嗯。我而家都拍緊拖啦，修心養性。努力返工做Ｄ成績俾女朋友睇，第時就同佢結婚。」我就來變咗個錄音機，今日同每個人都講我有幾鐘意江柏琪，幾認真。

而每一位聽到既朋友，都難以致信我會有咁認真，想變乖既面。或許，呢個就係江柏琪既威力，因為只有佢可以成功令我有為佢決心改變既心。

「嘩，乜Player都會講呢Ｄ野？」

「Player都會有玩夠想定既一日既。」我又唔會特登呃佢話自己無拍拖。

我學Stephanie贈返佢幾句：「你都係啦，就黎Grad，大個女啦，唔好再咁貪玩。」

呢一句出自真心，我都唔想佢因為Ken而作賤自己係咁搵SP。我明白咁樣唔係健康的Solution。



如果佢做返一個乖乖既女仔，一定會搵到對佢好既人。

「 哦。。好啦。。我走啦，拜。再傾啦。」Stephanie聽完不自為然。佢好似好忙咁，同我匆匆告別，想講多幾句都唔得。

畢業禮咁多人，同我影完相，又要去搵其他朋友；又或者喺Lunch時間快速過來影一張相，我都明白既。