一個書生既Player故事: 三六零

自從有咗租樓呢個共識，我同江柏琪放工成日都去搵地產佬睇樓。

睇樓變咗我地拍拖既新活動。

「呢個上車盤距離地鐵站十分鐘路程，558呎中層兩房單位一盤難求，叫價800萬，平均實用呎價先萬4蚊，仲有海景。」地產佬話。

「個海呢？」江柏琪問。我望出窗外，完全見唔到有任何類似海既蹤影。

「呢，喺兩點鐘方向果面。」



「丁屎咁細粒一點海都叫海景。」江柏琪話。

「江小姐，你都唔知米貴，呢一點海景好值錢嫁。」

「不如我唔要呢個海景，你搵間平少少嫁啦。」我話。

「市區地段，隔離仲有國際學校，好多外國人都住呢個屋苑，好有升值潛力，擺返五六年隨時又升幾百萬。五年前呢度先賣600萬，上車機會難逢。」地產佬繼續Sell：「你睇下，佢裝修都幾新淨，買返來只係輕輕執下，買少少傢俬就可以搬入黎住，經濟實惠。」

「你睇下浴室牆既水跡，我既工程師朋友先叫我注意話呢款舊式浴缸好易漏水。如果係政府樓都可以報下房署，不過呢D咁小事又無即時危險係唔會理你，係想整好要扑晒重新做過加防水層先搞得掂。」我話。



「你呢個budget又驗屍咁驗，好難搵到你滿意。」

「呢個價錢同我地當初要求既450萬差太遠，你不如搵下乎合我要求既盤先叫我地上黎睇，無謂浪費大家時間。」我話。

唔知係咪心理學既攻勢，地產佬係咁帶我地去要求以上既單位。

價錢啱既一係超級舊樓殘到你完全無意慾去住、一係就有做業主要裝錢大維修既風險、一係無雷公咁偏僻、一係細到得個廳仔就乜都無。

稍微正常返少少既居住環境已經係600-700萬起跳，仲要話俾你知超平超抵，你唔買，大L把人買呀。



偏偏有好多香港人好有錢，無論推出乜野天價樓花，都會被一掃而空。

我買部Iphone X都會肉赤啦（嘩，細個用父母錢真係唔識得赤，而家已經係自己半個月既人工。），D人買層樓好似喺街市買餸咁。

前排仲要睇到一單新聞，而家起碼要二百萬先可以做基本首期，傻的嗎！

『以現行政策，只有450萬元以下物業才可承做九成按揭保險，450萬至600萬只可做八成，600萬以上則沒有按揭保險可以提供，而根據差估署的數據，新界和九龍的上車盤，最多只可做八成按(更有貸款上限360萬)，而港島的上車盤平均更高達658萬，不能承做按揭保險，以要儲三成首期計算，便要約197.4萬元，以香港二人家庭中位數收入低於約2萬元，若要買一個港島區上車盤，不吃不用，首期也要8年多，若要每月花一半收入做開支，便要16年才可以儲到首期買上車盤！』（https://www.mpfinance.com/fin/columnist2.php?col=1463481149445&node=1517463971501&issue=20180201）

打一份萬零蚊既普通工，唔俾家用拎曬黎交租供樓都唔L掂。

如果唔係我有父幹，我真係唔識得點樣去買樓生活，真係幸運到唔幸運，多謝前世既自己一定係做咗好多善事今世先有老豆Carry。

「呢家個市道暢旺，邊有咁平既盤呀？有既唔洗一晚就俾人搶先落訂。如果你地睇啱，記得即刻打俾我落細訂簽臨時買賣合約，無呃你，真～係～好搶手嫁。」地產佬話。

「唔洗啦。有適合既盤先話俾我知。」



「有可盤可能啱係要求！佢係啱啱起好樓齡十年內既新樓。呢個上車盤離地鐵站十分鐘路程，旺中帶靜，實用面積388呎中層一房單位，叫價460萬，平均實用呎價萬1蚊多D。」地產佬話。

「咁平？」

「佢唔喺市區，出黎市區最少要半個鐘既車程，不過有巴士去到中環、觀塘區，有位坐舒服過搭地鐵。」

「好似唔錯。」江柏琪話。

「聽日去攞鎖匙同你地去睇？」

「聽日。。我畢業禮，唔得閒。。」我話。

「哎呀，林先生，恭喜你畢業，好快就做業主啦。」



「多謝。不如而家睇埋？」

最後我同江柏琪食咗糖水，等地產佬去拎鎖匙，揸車送我地入去「山區」睇樓。

經過一個月既密集式睇樓行程，終於搵到一間價錢、地點、裝修等等都喺我地接受既範圍內。

「呢度都幾好，點解賣咁平？」我問。

「業主準備去外國工作，趕住賣樓套現。所以都係果句，欲購從速。呢個盤，我本來約咗另一個客人聽日去睇嫁。」

同江柏琪商議咗之後，我就同屋企人講咗呢個決定。父母上網搵咗該屋苑既資料，係唔係兇宅，對上幾手係乜野價錢賣出等等既資料，最終都同意咗呢個決定。

我地叫地產佬幫我Hold住呢層樓。

加上父母美麗而萬惡既首期支票。



而簽約、借錢既事將會由我父母代勞。

就係咁購入咗林書生第一個選擇既物業。

我既任務完成，同埋開始儲定俾父母既「租金」。