一個書生既Player故事: 三零二

Carmen：【書生，我煲咗蕃茄薯仔牛肉湯，你飲唔飲呀？】

自從上次飲完酒一齊訓完同一張床，Carmen對我既態度有所改變，多咗搵我，又會切生果、煲糖水、涼茶、整宵夜，每次都親自拎入黎俾我呢個大爺，仲要再洗埋碗。

當佢知道我想需要咩，例如Source，即使我地讀唔同科，佢都可以搵到返黎俾我。

Carmen並唔係第一個咁樣對我既女仔，我好清楚有咁既舉動，原因只有一個－－就係Carmen鐘意我。

我對Carmen只有普通朋友既感覺，無意再發展一步。



我亦都唔係一個鐘意呃人攞著數既性格，所以我刻意對佢更加冷淡。

我喺大學對女仔都刻意保持距離，Hailey、Candice什麼的，就連Michelle係我正印女朋友，都唔會太過熱情。

我既心同我既行動係一致。

我希望身邊既關係都變得君子之交淡於水。

眾所周知，我表現出黎既林書生係我想搵SP，我想玩，我唔會負責任。



如果你想玩，你就搵我，但唔該，唔好沉我船，為我帶來不必要既麻煩。

無投入感情，到離場既時候都唔會咁傷心。

咁先係保護自己既最佳方法。


 
我覺得一班人飲完酒，喺同一張床度一齊訓教係一件中性既行為，唔代表D咩。



但總有許多無乜經驗又單純既「毒撚」，會好容易FF，一個動作就令佢以為有機會，將件事既意義無限放大。

仲要做兵，不停付出俾一個唔愛自己既人，真係好蠢。

唔好用愛黎做藉口，呢D只係無自我，想從付出體現生存價值既懦弱表現。

將自己既位置擺到咁低，自貶身價，我睇唔起做兵既人。

男人好清楚自己既感覺係點，好多時候，初次見面，已經決定咗你同我可以發展到乜野既地步。

如果做兵可以換到愛情，呢個世界就唔會有人單身。

靠做兵而換返黎既愛情，原則上同ptgf搵真愛係無分別，只不過係利益交換，自己呃自己。

當我鐘意一個人，我會主動去追佢，唔會要一個女仔倒追的，因為我係男人。



但Carmen唔明白。

Carmen對我既認識都好表面，除咗間中既夜晚一齊玩，我地深入既交流係零。

佢對我一無所知，我亦無打算同佢分享我既內心世界。

Carmen了解我咩？佢知道我諗緊咩？咩都唔知道，就話鐘意我。

鐘意我咩？咪又係鐘意我既外表同埋背景，唔通鐘意我食女咩。

鐘意一個人無做錯，只係我Judge咗佢係呢個Category既人。

我地既關係去到最遠，也僅此而已。



對於唔鐘意你既人，你既愛意只係負擔同厭惡，呢個係最殘酷而佢唔會想知道既現實。

我：【多謝，我胃口麻麻。】我隔咗兩個鐘先覆佢。
Carmen：【咁你想唔想食生果？】
我：【唔想，我有D頭痛，食咗藥。想早D訓休息下。】
Carmen：【咁你早D休息！我唔阻你啦。】

實情係，我喺Felix度好精神咁打緊Fifa。

「喂，悶悶地，不如叫Stephanie上黎？」Wade提議。

「啱呀，早幾日先飲完酒，R frd要打鐵趁熱。」我話。

「我Whatsapp問下佢。」Felix話。




最近Hall多咗個稀客，就係Stephanie。
 
Felix召喚完Step，唔洗五分鐘，佢就立即上咗黎。

Stephanie有禮貌得有趣，入人地房仲會敲門！

「入黎啦。」Felix對住門口話。

Stephanie著住Hoodies好密實，入黎仲要同我地點頭打招呼。

對於806A號房，簡直係住Hall界奇觀！點解大學度會有D咁乖既女仔！

「你好呀。」Parsons學Stephanie點頭，但呢個動作係醜化版，好似Rapper咁。



「其實你當自己房就得，唔洗咁見外。」Felix都頂Stephanie唔順。

「媽阿好毒，叫完你唔夠五分鐘就到黎。」 我忍唔住串下Stephanie。一睇就知，佢喺Hall好得閒無野做。

「我驚宵夜凍晒，我先至咁快仆落黎。」Step解釋。

「唔好意思，我錯怪咗你添～」我話。

由於唔想見到Carmen既關係，我成日呃佢同Mandy話我地早訓或者無野玩。

但其實近期，Stephanie差不多日日都落黎Felix房Hea。

雖然佢好靜，唔多野講，但每次喺度，我地一班男仔都特別開心。

Stephanie有令男仔提神既神奇能力。