一個書生既Player故事: 二七九
「叮噹～」我去到Michelle家門前按鐘，而家係夜晚十點半，比上幾次凌晨時段早咗好多。
傷心既事實係，Michelle係我深夜時段先會搵既人。
如果一個男人只會係佢得閒既時候，突然間出現喺你面前；永遠只得佢搵你，無你搵到佢；深夜時段先可以見面，你可以飛咗佢嫁啦，佢只係搵你舌時間。
只有幾個理由：佢唔緊張你、佢有正室要陪、佢去搵朋友或者做其他野都好，總之都重要過搵你，而且佢根本唔Care呢個行為會唔會阻住人休息訓教。
「Michelle～」我好嗲咁叫Michelle：「靚仔外賣小紫王倉鼠送到～」
Michelle微微一笑，打開門：「今日咁早呀。」
見時間尚早，Michelle邀請我去佢屋企。
佢屋企有三層，空間闊落，係裝修比較時尚既類型，最令我印象深刻係周圍都係雲石同埋落地玻璃（唔實用，望出窗外無乜景觀可言，屋外面已經係迷你既花園仔停車場，有心既可以望到晒你屋入面既情況，好無私穩；反光問題又唔可以裝鏡玻璃，住半山有街景山景，私穩度較高）
入到屋係有一陣寒意。
仲見到Michelle既媽媽坐喺廳睇緊新聞。
第一次見到Michelle媽媽，都幾後生，中長曲髮，感覺係一個有氣質修養既女人。
Michelle同媽媽介紹我係林書生，佢扮作唔識我：「Hello，當自己屋企咁得嫁啦。」
「係既Auntie～」我拎住個大袋：「倉鼠既野我擺喺度？」
「拎出黎睇下。」Michelle話。
「好呀。你睇下我幾有效率，琴晚講完今日就有啦～」
「唔知你有無上網睇下點養倉鼠～不過店員姐姐姐都有教我點養。」
我個籠出黎，隻倉鼠好緊張咁樣周圍跑滾輪，面頰仲塞滿種子。
「倉鼠係好柔弱既動物，需要可以隱藏同埋空間多變既地方，佢地既身體對溫度都好敏感，突然間高低五度有可能失溫、熱衰竭，會有生命危險。轉天氣既時候要將間屋改用其他物料。」
「食野就食混合、種子、蔬果，以防佢地牙齒太長會造成進食困難，要買磨牙木俾佢地咬。」
「要放木糠或者廚紙係底墊住。清潔就係你換木糠既時候，放倉鼠入去專用浴沙，佢就會自己碌嫁啦～」
Michelle拎咗粒種子試圖餵倉鼠，卻俾佢咬咗一下。
「哎呀。」Michelle痛到大叫。
「唔可以一黎就餵佢～照顧倉鼠要好細心同埋哄細路咁樣。而家餵佢都未必理你，放佢係屋企一個禮拜，每日俾野食同埋幫佢換水清潔，等佢習慣咗幫咗先再摸佢，同佢玩啦。」我話。
「倉鼠真係好敏感。。」啱呀，好似有情緒既女人，講句唔啱聽既說話都會搞到全球暖化，世界末日咁。
如果要養寵物，我會養有性格又唔洗點照顧既貓，而唔係敏感既倉鼠。因為我怕麻煩，養貓你只要俾足夠既食物，放置唔理佢都可以生活得好好，可能仲唔理你添。
「悉心既照顧可以陶冶性情。。」我已經唔知自己講緊乜。
「鼠鼠叫咩名好呀？」
「小紫王。。不如叫紫紫阿？」我胡亂提議。
「應該撞名撞到癲。」即係咖啡色既狗叫Coffee，柴犬就叫廢柴一樣。
「不如叫GG啦。今翅GG了。」
「叫芝芝都幾得意阿。」Michelle話：「芝芝你好吖，歡迎你加入我地既大家庭吖。」
我望一望錶，已經十一點半。
「時間都夜，我唔打搞你地啦。」扑完野都有少少攰，想快D返Hall訓教。
「你去唔去參觀下Michelle間房？Michelle房入面有好多畫作。」Michelle既媽媽問我。
「好呀。」佢咁開到聲，唔上去睇好無禮貌既。
我完全唔知道Michelle鐘意畫畫。
我跟住Michelle同埋佢媽媽上咗去二樓，走廊周圍都係Michelle既畫作，主要係風景類既水彩，同埋時裝既速畫。
入到Michelle房，我真係俾佢嚇親。
Michelle間房成間酒店房咁大，已經係人地細屋既廳。
令我嚇親當然唔係屋既大小，而係周圍放住好多巨型油畫，入面都係令人不安既畫作。
有血腥個身穿咗個洞好多腸跌咗出黎臉帶笑容既伯伯；垂死被眾多小動物例如蛇、老鼠、甲甴吞食緊既獅子、滿臉愁容；被錢包圍住既女皇帝；放滿唔同武器，枱上有隻批咗皮蘋果既房間；詭屋面著住白色修女服既女鬼，背景喺Michelle既房間。。。。。
Michelle份人應該好整齊，半個人咁高既油畫卻擺到整個房間都係。。
我不禁諗，如果我自己一個入黎依間房，Michelle會唔會放咗捕獸器既機關捉咗我去禁室培育？
今日既Michelle，已經唔係我當初認識既佢。。。
「Michelle最近好鐘意油畫，呢D都係佢既大作。」Michelle媽媽話。
我努力管理臉上不安既表情。
「呢張係一個腸癌既病人用刀剖開自己個肚，一路以黎既病痛終於得以根治，人生終於解脫，所以覺得好幸福。」Michelle話。
「呢張係萬獸之王獅子難敵合力既弱小，展示出團結既力量。」
「女皇帝看似有權有勢，被雍容華貴包圍，但實情佢既國家發生緊溫疫，佢自己拋棄咗家人喱咗係只有自己知道既地下密室，只剩返佢一個人去渡過佢既餘生。」
「放滿武器既房間係我喺ISIS既新聞見到而描繪出來，加咗個蘋果，寄語我地刀槍可以係武器，亦都可以係幫助我地既工具。」
「呢隻女鬼係我有一晚發夢見到既畫面。」
其實Michelle諗野都幾。。正面呀。。
將D咁恐怖既野諗得咁有意義。
「哦。。。嘩。。。真係好犀利呀Michelle。我覺得你可以開畫展。」我受驚多D。藝術既野，我識條鐵咩。
「我有咁既打算，遲D畢業可能返外國開畫展。」
「好呀，到時我一定會黎睇嫁。。」
「都夜啦，我返Hall先。」
Michelle媽媽拎咗幾千蚊俾我：「唔該晒你幫Michelle買倉鼠。」
「唔洗啦，少少心意送俾Michelle。」
「唔好同我客氣，要咗佢啦。不如坐底食下糖水？Michelle今日整咗蛋糕。」
「我約咗同學倒數慶祝生日，真係要走啦。我地下次再見啦。」講咗個大話，我只想急急腳走人。。。
「咁下次再黎～Michelle送人出門口啦。」