一個書生既Player故事: 二六九

我出咗Podium傾電話，凌晨既學校燈光半關，空無一人，略顯陰森。

「可以開始啦。」我用恭敬既語氣同Michelle媽媽講。

「我知道你就係果條片既主角，係Michelle當時既男朋友。」

「嗯。」

「Michelle因為片段被公開令佢大受打擊。」



「我都以為隨住時間過去，件事淡化咗佢心情會好返D。但過咗幾個月，Michelle既情緒問題愈來愈嚴重。佢經常鑽牛角尖，會諗好負面既野去否定自己，最近仲開始𠝹手，我好擔心佢會做傻事，日日都叫工人睇住佢，但我知咁樣唔係辦法。。」

我聽到之後沉默咗，唔知道應該講咩好。雖然我對Michelle既感情唔深厚，但我都承認佢係我其中一任女友，都想睇到佢過得開心幸福。

「Michelle提及過同你喺歐洲拍拖既事，個傻女平時唔會主動同我講拍拖既野。你喺佢少數承認既對象，我覺得你可以抒援到佢既情緒。」

「對唔住。如果當初我拒絕Michelle唔拍片，就唔會有今日既事發生。係我既錯誤，我呢排會多D搵Michelle關心下佢。」

我出自真心。



雖然片段既流出與我無關，但我覺得我需要承擔責任。

「我明白年輕人年少氣盛，做野係衝動唔識諗後果。唔可以怪晒你，Michelle最要為自己既人生負責。」好開通又講道理既媽媽。

「不過，佢真係好少提男友既事？」我以為佢有好多男朋友。

「Michelle係獨生女，由細到大受到我地既溺愛，家底唔錯、外表都唔錯，表面風光。但人無完美，唔好話男朋友，佢身邊真心既朋友都唔多。每個人喺佢身邊都有目的，令到佢受過好多傷害，變得唔容易相信人。」

我明白佢既感受，因為我地同病相憐。



喺D人知道我住半山之後，態度唔同晒，熱情同主動咗好多。令到我覺得，佢地對我既好都係有企圖，而唔係真心想瞭解林書生依個人，所以點解我成日咁想低調唔俾人知道我有錢。

「我仲以為，我只係一隻兵，做佢呀四同埋出氣袋。」要讚下自己啦，咁辛苦。

「佢唔識表達，但心地好善良。」Michelle媽媽繼續道：「放心，我地唔會待薄你，你唔會白做。」

「唔好咁講，我唔係想要錢先幫佢。Auntie你唔好擔心，我到時到候話你知狀況。」

「拜託晒你。」

「保重身體。」

「拜拜。」

「拜拜。」


 
女仔真係做唔到單純SP，點都要有感覺先可以搞到野，同男仔既身體構造唔同。

我以為同Michelle係各有各玩互相需要既關係，從來無諗過會喺佢心入面佔一個位置，仲會主動同屋企人提起我。

我對自己既無情感到罪疚。

但我知道對佢既感情，係朋友，永遠不會是愛情。