一個書生既Player故事: 二五九

Michelle喊到眼都腫晒，頭髮又亂，成盒紙巾都拎埋落黎。

佢上咗車，我問佢想去邊度。

「無人既地方。」Michelle話。

「飛鵝山？」我個腦都Load唔到有咩好地方去。

「都得。」



「我講下笑嫁咋。我P牌仔手車太差上唔到山。」自己講完Ban返自己個Idea，喊出來。

「咁渣ga！咁去海運大廈停車場。」Michelle喊到把聲都沙，但絲毫不減佢既港女本色。

「呢個Ok。」

我撞住同氣氛格格不入輕快既英文歌曲，希望可以抒援一下佢既情緒。

「我今晚唔想講野。」Michelle落柯打。



「哦。」咁我都識趣盡量唔講咁多野。


海運大廈停車場特別在，有層個好大既露天既靚位可以睇到無敵大海景，而閒日呢個凌晨時間基本上都無人係度。

Michelle見到周圍無人好安全咁，心情好似平伏下咗一D，佢主動開口同我講野：「Jerry痴線嫁，一打黎就話我係屬於佢既女人，叫我同佢扑野。」

「下？」

「我同佢講：『夠啦，你係咪誤會咗啲乜野？我對你由頭到尾都無感覺！』



Jerry話：『你唔鐘意我，會搵我整電腦！？』

我話：『咁你讀Cs由細到大都咁鐘意電腦，唔問你問邊個喎。。』

Jerry：『識整電腦就老奉要幫你整嫁啦？』

我無奈咗：『你唔想整，咪拒絕我，我去搵其他人整囉。』

Jerry：『唔得！你係我嫁！唔可以搵其他人整。』

我：『我唔想再同你講落去。總之，多謝你幫我整返部電腦。』

Jerry：『你同Scholar既咸片，我已經Cop咗！高登同Secret見啦！』



跟住佢就Cut咗我線。」

Michelle發晒癲好燥底咁樣講，聽落好好笑，我好努力忍住唔笑。

佢講完就開始大大聲咁喊。

「講完有無舒服啲呀？」我輕輕攬住Michelle，拍下佢背脊。

「有少少。但係一諗起。。唉。。全世界都認得我。。我唔知點樣面對我既屋企人。」

「不如試下報警備案，第時告佢不誠實使用電腦。同埋有落口供紙叫人Del post成功機會都大D。」喺女人發癲好感性既時候，男人要懂得冷靜去處理問題，咁先可以解決件事。

「未必有用，都試下先。」Michelle話。

「記得睇清楚警察有無Mark錯野先簽張口供紙呀。」我地決定如實將所有事同警察講。



去到咁靚既地方卻係咁沉重既心情，我心裡同自己講，下次再黎，一定要係開開心心既。

最後我陪咗Michelle去警署備案，分開錄口供。

我將我同Jerry既IG對話俾咗警察睇，搞咗粒幾鐘，出到黎已經天光。

我無諗過人生第一次入差館報案會係因為咁既事。

最後我影底Michelle既報案紙，幫佢寫E-mail俾唔同既論壇同埋SNS，Po埋上IG表示已經報警保留一切追究既法律權利，送Michelle返到屋企，再睡眼惺忪咁揸車返屋企。
 
我懶理靜音既電話，先睡了明天再算。