一個書生既Player故事: 二五四
最令我記掛既係江柏琪。
我刻意好遲先至約江柏琪，唔想令到佢有壓力（其實唔會），知道我仲係好緊張佢。
我約佢去旺角食韓燒，咁可以見佢耐啲，有多啲時間傾計。
我Gel晒頭，揀型格風既衫黎著，想俾美好既一面江柏琪睇。
無見大半年，江柏琪會唔會好似之前Hall annual din咁化晒妝著靚靚咁見我？一見面就攬住我好熱情咁話：「林書生乜你型咗咁多既！我好掛住你呀！」
「喂！」突然有人用力拍咗我個頭一下，江柏琪到咗。
「無見咁耐，你真係變咗肥仔。」江柏琪一見到我就話。
有時做人既野，都係唔好太多幻想，期望好容易變成失望。
唔知係咪因爲喺Hall夜訓既關係，江柏琪個樣唔係太精神，皮膚差咗少少。佢染咗Mocha色既頭髮，唔細心睇都唔覺，非常低調。
無盛裝打扮不特止，仲係最頹既Soc褸，配以一對拖鞋落旺角。。
我明白見我係好舒服唔需要打扮，不過你咁樣實在係太無誠意了，傷心傷心。。
可能只有我一個人喺度緊張。
「 屌你啦，你邊隻眼見到我肥。我呢啲叫長晒肌肉。」我嘗試谷起手臂既老鼠仔，江柏琪起身坐咗喺我格離篤。
阿～～係久違既江柏琪香味～～
我緊閉嘴唇唔敢郁，突然間毒咗好多。
「又真係喎。」江柏琪轉移話題：「手信呢？」
「無乜點買手信，大麻茶包啱唔啱？」我話。
「頂你，咁都運到落黎香港咁屈機！唔好返酒吧去走水貨啦你！有無第二樣呀，我都唔食呢D野！」
「Um.. 係冰島藍湖買既Mask。」我都知你唔會想要果個茶包，早有準備。
送完手信後寒喧一番，我地又開始無聊既對話。
「返黎咁耐先約我，無心肝呀。」江柏琪話。
自從江柏琪住Hall之後，就好少見佢，每次再見都會講呢句說話。Poly同City兩個地鐵站既距離，都唔係想像中咁短。更何況我身在外國。
「我點知你拍拖方唔方便出黎。仲有，想見你夠可以主動約我。」我話。
「說來話長。。我又點知你返黎忙唔忙，你得閒自然會約我嫁啦。」
「咁如果我唔約你呢？」
「咁呀。。我地永別啦，依世都唔會見～我係高傲要人約既女人～」
我選擇無視佢。
「你頭先話說來話長，即係咩意思？散咗未？」我問。
「食屎啦林書生，一黎就咒我散。未散呀！不知幾Sweet。」江柏琪電話上面喺佢同男友既合照。
佢男友係青靚白淨韓仔Feel Type，江柏琪都係鐘意D靚仔嫁啦。
江柏琪唔鐘意我，唔通係因為我唔夠靚仔？
「佢平時錫唔錫你嫁。」
「錫呀。」
「點錫法？」
江柏琪用手指指住佢個嘴，話：「咁錫囉。」
我反一反白眼。
「咩人黎嫁？」我問。
「佢係同一個Faculty讀物理治療既同學，玩得又做得野，好照顧我，成日買D小禮物俾驚喜我哄我，我地一齊嘻嘻哈哈，都叫做幾開心。」
「聽落好似唔錯。」我口裡咁講，心裡卻覺得都係觀察下先，唔好太快落決定。
「嗯，不過有個好大時缺點，就係佢食煙，你知我好憎人食煙。」
其實食煙都唔係好大問題，我返酒吧都聞慣。
只係討厭煙味既人，聞二、三手煙就會好辛苦。
江柏琪都有D鼻敏感，聞得多男朋友既煙味對佢身體都唔好。
「咁佢知唔知呀？」
「佢同我講會戒煙。。但佢一食我就知啦，個鼻咁靈，邊度呃到我呀。」
無論你點Fing，頭髮、指甲、衫、袋都會有煙既味道，呃人無食煙真係當人傻
「一聞到我個鼻同我個心都唔舒服。」江柏琪續道：「唉，咁都解決唔到，唔通因為佢食煙就分手咩，我會叫自己習慣。」
「我會包容佢。完。」江柏琪講呢句說話好似有一絲無奈。
「我唔評論你地，最緊要搵到個大家都舒服既平衡點。」留名觀察。
「哈哈，唔講啲咁掃興既野。你就爽啦！去Exchange都可以同IG女神拍拖！」江柏琪話。
「張相唔係我Po，件事都唔係你咁諗。。」我沒好氣去解釋。
「係咪認咗佢囉～我又唔會介意。」江柏琪無視我既否認。
「你可以話我同佢拍拖，亦都可以話我同佢唔係拍拖。」我懶係玄咁話。
「即係點？曖昧緊？」
「唔係呀，叫做分咗手嫁啦。」返黎到而家都成個月，我同Michelle近乎零Message，算係自然分手。今次我做咗個誠實寶寶。
「農場文成日講既：『拍拖一定要去一次旅行！如果去旅行都未分手，結婚就對了！』」江柏琪話：「唔通係因為咁先分手？我睇佢IG都有講，話要俾D考驗另一半先知佢係咪真心。」
江柏琪已經八掛到會去Stock人地Ig。
見到Michelle果個Post，我都心諗，用埋D on9藉口去合理化佢既港女行為，收皮啦。
「喺歐洲無人無物，都係想搵個盤搵下大家姐，都唔算真係拍拖。」我希望江柏琪唔好再誤會我同Michelle。
「一返到香港就分手，好邪惡。」幸好江柏琪今晚唔係一個道德判官，無因為呢件事而屌柒我。
「但有Michelle呢D女神級既女仔，拍過拖總算係人生無憾了。」江柏琪話：「可能係同吳彥祖拖過手一樣既概念。係你先會話分手咁傻嫁姐！」
女神級，你同丁丁都算係靚女阿，洗鬼留戀Michelle。你鬼明我係歐洲做賤民既苦況咩。。
我嘆口氣：「唉屌，有苦自己知。。好難用言語話俾你知我同佢既相處。。不如講下其他野啦。」
「唔制，話俾我知啦，我想聽！」江柏琪對我喺荷蘭Exchange既生活係零興趣，對Michelle既私生活各樣反而最有興趣。
「今日既故事到此為止！封口唔講了。」我話。
今晚同江柏琪好似回到過去咁，兩個人熟悉地打打鬧鬧，彷彿已經忘記咗江柏琪有男友既事實。
感恩。
即使江柏琪出咗Pool，世界仍然是很美好的。