一個書生既Player故事: 二一九

呢程巴士真係太短，沿路風景怡人，一個鐘都未夠就落車，我係香港由柴灣搭去元朗都唔止啦。

我地好遲先出發，黎到都已經下午四點了。

Volendam係一個沿海既村莊，所有樓都係得一至兩層既高度，八成係自住既居民。

我地係村莊既中間落車，周圍都係紅磚，用GPS睇方向後，就好Random咁向海既方向行走。

經過一條小橋，沿住小巷行，經過一條望海既酒吧街。



今日係星期五，好寧靜好偏僻，人影都唔見多隻。

「我地係咪黎錯地方？周圍都好少人。」我問Michelle。

「無理由嫁，呢度咁靚，明明就係一個景點。」

「堅係無人。」

「呢度唔似荷蘭。好似去咗第二個國家咁。」Michelle話。



「非常同意。」



我同Michelle隨意咁行，見到好多遊艇停泊係碼頭，好Chill。

呢條碼頭酒吧街終於見到D人影，寫住Welcome to Volendam，證明我無黎錯地方。

我地經過一間芝士工場，入咗去參觀睇下芝士既製作過程。



外國既芝士好似迷你水池咁，一個個圓型大件既芝士，整齊並列係商店度。

「陣間走果陣買D芝士返去囉？等我帶返去英國。」Michelle提議。

「你喺英國都有大把芝士食啦，洗乜喺度買。」

「都啱。但見到成舊巨形芝士係房好開心。」Michelle傻笑。

「我買個Blue Cheese送俾你擺喺房。」

「唔要呀，Blue Cheese咁臭。」

「厚禮黎嫁！唔臭都唔送俾你！」

「唔要呀。」Michelle好似個小朋友咁扭計。



「講下笑姐。」我忍唔住摸摸佢既頭頂。


我同Michelle沿海周圍行，參觀人地住既屋。

距離酒吧街愈遠既住屋，就愈現代，唔再係紅磚拼砌一式一樣既小屋，而係有兩至三層落地玻璃既大屋。

我見識到園藝係幾咁Common，呢度每家人都有個自製既庭園空間，屋企後花園會擺彈床同千秋，栽種既植物各有各風格，喺荷蘭，每個人都係專業既園丁，住半山既我都覺得呢度Chill到爆。

呢度既人唔太需要私隱，落地玻璃大到你可以望晒每一間屋入面既情況。

每一間，無錯，係每一間屋入面都靚到好似Ikea既示範單位咁靚咁Vintage。

而且佢地大門係會打開晒唔鎖門的。



坐部份既地鐵站又唔洗入閘，佢地既治安好到離晒大譜，荷蘭就是如此信任大家阿。

好難想像咁既情景會發生係香港！

到底要喺荷蘭要有咁既生活，佢地既工作時數係點呢？

會唔會一日返八個鐘既普通工作已經可以有咁既屋住呢？

我有好多疑問。


我同Michelle去到一個大到維園籃球場咁既公園。

中間有D奇形怪狀，好似DNA既柱。



有幾個幼稚園至初小既細路仔係度玩爬柱，附近一個大人都無。

唔似得我地平時舉起雙手用力爬去前面既柱。

D細路係戰鬥民族，唔係，係可以去參加奧運花式表演賽。

佢地可以做到360度轉圈、用腳倒吊個人再做Sit up、企係柱上面（Which我諗有成3米高）、成個人向前趴做樹熊攬住條柱。

唔係一個小朋友係咁，係三個小朋友都係。

咁日常既畫面令我好衝擊。

後來有父母散步，傾住計，睇仔女玩，仆親都無反應，唔理佢地。



「Michelle你不如試下。」我提議。

Michelle走過去試爬，佢連最簡單由單手捉住一條柱，到前面果條都唔夠力。

「Oh my god...」Michelle笑到無晒力。

「Can you teach me how to do that?」Michelle問D細路。

「Sure!」其中一個男仔好陽光咁笑，就表演佢既360度轉圈神技。「Easy!」

我地表示崩潰投降。


Volendam比我地想像中大，應該未兜晒成個區域，已經到咗七點半，日照時間長既歐洲個天仲係朝早九點一樣咁光。

「不如返去啦？我驚無車。」我同Michelle講。

「嗯，都差唔多。」

「Hello，請問你地知唔知巴士站喺邊？」我問細路仔既父母。

「你想去邊？」

「Amsterdam Centraal」

「喺果邊。。尾班車七點鐘開咗啦。。」女人話。

「下！真係？咁點算好呀。。」Michelle話。

我都唔知點算啦。。