一個書生既Player故事: 二一四
我同Michelle係附近食完早餐，各自返宿舍沖個涼，約咗十二點係市中心見面。
今日Eve Hangover執野唔得閒，順理成章就得返我同Michelle一齊玩。
去Exchange一個人或者周圍R人去玩都唔出奇，同人出去玩係好Casual既事。
「喂，等咗好耐？」Michelle問我。
「唔係呀，我都係啱啱到。」等咗Michelle十五分鐘，還好啦。
我同Michelle去咗著名博物館安妮之家（Anne Frank Huis）排隊。
時間已晏又無一早預約，輪候時間竟然要兩粒鐘。
我問Michelle想唔想去睇下其他博物館，佢好堅持要排隊入去睇安妮之家。
咁反正我都會係荷蘭逗留一段時間，On99排隊一兩日都無咩所謂，當陪下Michelle。
我同Michelle一路排，一路禁下電話，影下相，欣賞下Amsterdam既運河。
「呢度好似周圍都係運河。」我話。
「荷蘭既運河系統好出名，喺歐洲既建築同Urban planning都有極高既辨認率，成個荷蘭一共有7000幾條運河，單係Amsterdam已經有165條運河，總長75.5km，所以有『北方威尼斯』既稱號。」博學既Michelle解釋。
「如果你睇過地圖，就知佢既城市規劃有幾井井有條，放射形既設計，唔同威尼斯只依靠水上交通，由黑社會去管理，仲惡過政府；Amsterdam既運河穿插整個區域，同時陸上既交通都四通八達。」
「一個社區規劃好唔好，交通選擇既數量其中一個指標。」我引用上Urban planning Elective學到既野。
「當然佢起咁多運河水壩都有為低窪地區疏水既實際作用啦。」Michelle話。
每次聽到Michelle識咁多野咁文青，都覺得同佢既港女外形真係極唔Match。
我特別欣賞Michelle既知性美。
「安妮之家有咩特別？值得你排咁耐隊都要入去睇？」我問Michelle。
「呢個故仔，好長嫁喎。」Michelle話。
「呢個咁安寧美麗既地方，有過段好悲痛既歷史，安妮之家係『安妮的日記』作者Anne Frank係第二次世界大戰時候既藏身處。1933年，希特勒掌權迫害猶太人，Anne Frank一家由德國逃亡到Amsterdam。」
「點知到咗1940年，納粹德國既佔領延伸至荷蘭。Anne Frank一家人同埋另外四個認識既人都住咗係佢爸爸公司辦公室既密室。三樓樓梯有個大書櫃後面，就係通往密室既秘道，四位公司既職員冒住死亡既風險，為佢地八個人藏身，提供生活所需。」
「日頭有其他職員返工，八人係密室都唔可以隨便亂動、講野，甚至去廁所沖廁，以防俾人發現。而呢本日記，就係Anne Frank日常最大既娛樂，寫下佢每一日發生既事、諗既野。即使面對生命同自由既威脅，Anne Frank都以一個樂觀積極既態度去面對。」
佢拎住宣傳單張遞俾我，上面係部份語錄。
「Whoever is happy will make others happy too. He who has courage and faith will never perish in misery.」
「It's really a wonder that I haven't dropped all my ideals, because they seem so absurd and impossible to carry out. Yet I keep them, because in spite of everything I still believe that people are really good at heart.」
果然非常樂觀。如果係我，一定會自怨自艾好頹。
等咗兩粒鐘，終於排到我地入場。
入面保留咗當時既原貌，海報、牆上面既度高既塗鴉、連日記既真跡都可以見到。
呢個密室除咗無窗，都唔係咁差，諷刺既係，八人一齊住既密室環境好過香港人住既劏房太多了。
「咁結局呢？」我開始好奇。
「八人喺密室躲藏咗兩年，卻因爲有人告密，全數遭逮捕同埋遣送到集中營。1945年三月，Anne Frank十五歲就係集中營度病死。最後只有Anne Frank既爸爸喺戰爭結束後倖存。佢爸爸搵到本日記，將佢出版，見證住二戰既歷史，被翻譯成七十幾種語言，係荷蘭最有名既書藉之一。」
What a pity.
聽到結局不禁悲傷起來。
果然，現實不是童話，也不是電影，一切唔會跟隨我地既幻想去發展。
只因為佢地既種族就是一種罪惡。
憑乜野去定義另一種族既價值？
點解人類總係要自相殘殺？
戰爭實在係兩敗俱傷，損人不利己既事。
我無法想像一個十幾歲既女仔係點樣承受咁大既精神壓力。
最後有一塊展板寫住：「All her would-haves are our opportunities.」
所有Anne Frank諗既「如果。。我會。。」想做既事，對我地黎講只係做與唔做既選擇。
仲有好多遊客寫底佢地睇完既感想。
（http://www.annefrank.org/en/Museum/Exhibitions/All-her-would-haves-are-our-opportunities/Reflections）
令人好多反思，起碼唔好將我地生活既幸福Take it for granted。
「如果唔知道呢個地方既故事，只會覺得係一間普通既屋。」我話。
「人類總係受故事吸引。」Michelle話。
「咁你係咪一個有故事既人？」我問佢。
「我最唔識就係講故事，哈哈。」