一個書生既Player故事: 二零七

進行完一輪入境手續，攞完行李，我地就喺機場車站新手上路。
 
機場車站好大，大到我諗行錯路由站頭到站尾都要行十幾分鐘，時尚既X圖案玻璃幕牆，滲透自然光入車站，裝修設計摩登。
 
我同Michelle都忍唔住停底影相。
 
「幫你揸機？」我問Michelle。
 
「好似好大鄉理咁。」
 


「唔會啦。」
 
「咁好啦，麻煩晒你。」我就幫佢影車站旅遊照。
 
Michelle企係相中間好殘咁笑。
 
「咁樣唔係幾靚。」Michelle望完我張旅遊照唔係幾滿意：「不如影多張。」
 
大佬，你訓醒又無化妝係咁既樣嫁啦。我包影旅遊照又唔係包影J圖。
 


當然我都係好好脾氣咁幫佢影。
 
Michelle今次打側個人，露出一個懶係陽光既笑容，同剛才一樣既構圖，只不過張相望唔清佢個樣，只得又高又直既鼻樑，的確係靚咗唔少。
 
「嗯，呢張靚好多。你要唔要影呀？」
 
「都好，影返張相交下差俾屋企。」
 
然後佢幫我影完相。
 


Michelle舉起電話自拍玩Snapchat，仲影埋格離既我。
 
Michelle一臉懶洋洋瞇著眼睛含蓄地笑，果種朦朧美既感覺（？）令人好舒服。
 
佢用咗好興果個狗狗Effect拍片：「Hi～飛咗十九個鐘，終於到咗Amsterdam啦！仲撞到朋友添呀！好開心！」
 
我地一齊向鏡頭揮手，畫面融洽。
 
Michelle一定係一個好鐘意用SNS既港女。
 
 
 
我同Michelle係機場車站隨便搵間餐廳食咗個All day breakfast，飲杯橙汁好Chill咁閒聊，其實都無乜特別野講，主要都係影相同埋研究一陣間既行程。
 
 


我地去Counter買咗張OV卡，即係香港既八達通，車站職員仲提醒我地記得出入站口要拍卡，如果拍漏咗就會當你搭足全程車，就要俾20EUR（一個鐘巴士地鐵任搭既1 Hr ticket先至2.9EUR）。
 
拎住行李拍卡入去坐車，對於無閘口依件事感到好新奇，國家就是這麼相信他們的市民。
 
我幫Michelle抬行李，心諗，你一個女仔，點樣照顧自己，行李都唔夠力拎啦。
 
 
 
大約四十分鐘車程，就已經去到市中心。

Michelle 去搵佢朋友，而我則Check in學生宿舍同去學校報到。
  
同市中心密密麻麻既建築唔同，宿舍位於一個空曠既地方，一棟六層高長方形狀既建築，外型設計不規則，由外面睇，每隻窗外面都用油漆油咗唔同既顏色。一入到去宿舍就係Reception，格離係好Chill既餐廳酒吧。
 
Reception姐姐幾靚女，佢幫我對返證件，做咗個簡單手續，就同我介紹呢間宿舍既設施。


 
低層既活動室好大，有三張桌球枱、兵乓球Corner、好似Cafe咁但有好多sofa既圖書館、meeting room，仲有Gym房，頂樓係一個露天籃球場，掛咗好多Pop art。
 
學生宿舍主要係俾國際學生住，一人一間房連Private shower，尺寸大約係City兩間房加埋廁所咁大，Share廚房。而租金比起係香港租個又細又殘既單位平太多太多。
 
係外國每樣小事物都令我感到好新鮮。
 
喺酒吧聽過有D客人，到咗某個時候，例如七年之癢，以為自己對另一半無咗感覺唔鐘意。

我唔知幾多人會明白，另一半應該係陪伴自己一同經歷成長，而唔係用黎娛樂解悶；如果因為「好悶」而分手，無論你分幾多十次、轉幾多個男女朋友，結果都係一樣。

其實唔係對方既問題，自己生活無聊先係真正原因。
 
有時覺得生活好無聊，可能唔係庸人自擾，而係生活的確太重覆、了無新意，去見識下世界、做一D新鮮既事，就可以解決到。
 


Michelle：【今晚7點去Amsterdam Central食飯OK？】
我：【OK 啱啱Check in完宿舍，搞完入學手續話你知】
Michelle：【嗯^^】