一個書生既Player故事: 二零六
因為時差關係，喺杜拜落機只係係夜晚十一點半。
我同Michelle一齊行去往Amsterdam既閘口，要等兩個半鐘既時間轉機。
杜拜機場係全球國際客量最多的機場，亦都係中東地區重要的航空中途站之一，來往亞洲、歐洲以及非洲既飛機都會中停於此。
而杜拜都以土豪之都聞名，所以點都要去杜拜機場見識下打卡。
見到蛇仔字水牌，仲有好多中東佬著住阿拉伯大袍、披風、頭巾、頭箍，有白色、又有人著深藍危、深灰、啡色、黑色；而見到既女人都係著黑色。
「原來有咁多隻顏色既袍可以揀，我以為得黑色同白色。」Michelle望住D中東佬話。
「唔同顏色同設計係咪代表佢地來自唔同階層呢？」Michelle問。
我用電話連Wifi上網查完朗讀出黎：「係Detail位可以睇到D端倪，例如沙特人既大袍係長袖、高價；蘇丹人既大袍就無衣領，胸圈同衫袖偏肥大；陣曼人既大袍都係無衣領，但領口處有長約30cm既繩垂於胸前，穗底花萼狀開口可以用黎噴香水、放香料。」
「你估佢地係因為教條而要咁著，定真係鐘意咁著？」Michelle問。
「我諗兩樣都有，咁佢地文化係咁。」我話：「帶返個頭盔先。其實我分唔清伊斯蘭、阿拉伯、穆斯林有咩分別。等你答我。」
Michelle話：「阿拉伯係地理概念，伊斯蘭係宗教概念，穆斯林係指信仰者。」
我諗如果要研究佢地既文化背景，一個Sem都讀唔完。
Michelle都上網係度查資料：「我諗著大袍都幾舒服，衣物質地寬鬆舒適，上網話D年輕人就算返工著西裝，放工返到屋企都係著大袍。同埋大袍係炎熱既沙漠地區有抗熱通爽既實際作用。」
「你都幾有研究精神嫁喎，同D無腦港女幾唔同。你讀咩科嫁？」我讚Michelle，同時都想了解下佢多D。
「我讀政政嫁。」
「Yr 2？」
「係呀。」
「原來我地同屆。」我點頭：「睇你咁有研究精神，都似讀政政。」
「緊係唔係啦，成績唔好先入政政咋嘛。」
「你本來想入咩嫁？Sociology？」
「係呀，我果陣揀CU既Sociology、Poly既Sociology，第三先係City政政。」Michelle繼續：「我以前中學讀名校，自負成績唔錯，點知滑鐵爐入唔到三大，初初睇到JUPAS結果，都幾唔開心。」
「哈哈，我果陣都係咁，仲要係你身邊D朋友個個入晒三大神科，就覺得自己好廢。」我真心同意：「我地組有個好乖既女同學叫靜宜，玩O Camp完咗，Sharing講話初頭入咗City好唔開心，仲喊添，有幾個Fm聽到之後都眼濕濕。」
「嗯。當初好唔願意入黎，有睇小佢既心態，嫌三嫌四，但又唔會諗其實有更多人u都入唔到。」Michelle無回應。
「我地組爸同我地講話：『唔好咁睇自己，其實City有好多折翼天使嫁，好多人臨場考試表現失準，或者差一兩分先唔小心碌咗入黎，一樣有好多勁人臥虎藏龍。』」
「都係嫁，入到黎先發現好多好叻好勤力既人，仲要係好玩得，可能上莊住Hall拍拖做晒，都仲可以過3爆4。」Michelle笑。
「我入黎讀咗一年都對學校改觀咗，覺得City MMKK咁既Style先係最啱自己。」雖然故仔寫既係食女多，但係其他地方都有好多成長，有機會寫個書生的上學日記無糖呀。
「係，我最鐘意佢地好有創意，玩又玩得認真。」
「多靚仔靚女就真呀。」我話。
「你知唔知，某學系既同學會自己搞LOL大賽，仲要整埋Poster、宣傳片、整埋賽程、搬埋Projector、搬晒凳有晒觀眾席，甚至搵埋MC做講解，Which只係一班同學落堂做功課無聊講笑喺度玩，又有班人肯同你癲。」
「我都聽講過，好正。又有人靠炒iPhone炒到出晒名，未畢業都炒到幾十萬返黎。」
「有去考試GPA都可以係0既人你又唔講下。」Michelle話。
「Asso升上Degree再Trans科，讀咗六年都仲係度既不死老鬼你又唔講。」
「哈哈，真係乜野奇人異事都有。」
「你又點睇D人成日話City D人好淫亂？」我都唔知點解會咁問佢。
「根本全世界都咁淫亂嫁啦，你估HKU人唔淫亂咩，之前去飲酒，識咗個HKU仔都想灌我飲酒，問我上唔上佢Hall。我班咪一樣好多A0，你唔想做邊個人迫到你。」
「哈哈。」做酒吧既我就深深同意，有好多野根本係個人選擇，你絕對有權Say No。
無乜重點但貌似較Deep既對話，同Michelle同校既同聲同氣，令我對佢添加咗一層好感。
杜拜機場好大，Arrival果邊以白色主調為多，而轉機區域免稅店林立，五顏六色，真係有D旅行既感覺。
原來轉機多過四個鐘有免費飯食，八個鐘有免費酒店訓，今次與此無緣啦。
我地周圍行下，好快就過咗呢兩個半鐘，轉機無Delay。
再上機，我同Michelle既座位附近都坐滿，所以我地都無調位傾計。
靜靜係機上面補眠休息，渡過呢七個半鐘既腰酸時光。
當地時間早上六點鐘，我終於到達Amsterdam Airport Schiphol。
撒花！！經歷咗機場既十九小時（仲未計機場去市區既車程媽阿）終於完成，感動流涕！！