一個書生既Player故事: 一四零

本身我想陪江柏琪一齊去Poly注冊，但佢小我：「痴線佬，你估家長咩，19歲人啦，仲要陪個女去注冊。」
 
「我都想睇下Poly同City有咩唔同阿嘛！」
 
「No way!」江柏琪好堅持拒絕我唔俾我陪。
 
咁所以今日我地就向自去自己學校既Reg Day啦。
 
之前都參觀過City，一入去真係好商場Feel，唔講都唔知佢係一間大學，唔怪得睇高登啲人成日叫佢又一城市大學，並非浪得虛名。
 


左兜又兜，去整完學生證就戇居居俾人帶咗去參觀攤位，叫「木人巷」。我望到百幾二百個Booth圍住，只有入口無出口既毒辣設計，心裡大叫不妙。
 
Freshmen 入到去就如各Soc既獵物一樣，只有被食既份。
 
「靚仔！」企起入口仲未入去既我聽完之後兩頭望。
 
「係呀叫你呀！過黎報名玩大O啦！」一個著住綠色Tee個頭金金地，個樣好殘好似成個月無訓教咁既女仔叫我。
 
「好呀。」係喎，入大學好似必定要報O Camp。我無上網追過Post做準備，唔知邊個O Camp好玩。
 


雖然間中睇到O Camp既負面新聞，但我同江柏琪都無乜特別共識話唔玩O Camp。我覺得O Camp係大學既必經階段，所以我係會報名的。更甚係我希望江柏琪會去報O Camp玩，因為我擔心佢咁毒，係大學唔識人，無人陪會好悶。
 
「過黎填張Form先啦，跟住去影相。」個女仔同我講。
 
我填完Form入去影相，心諗點解報個O Camp都可以排晒長龍，前面應該有近十條友，塞撚住晒成條木人巷。
 
我同綠衫女講：「嘩，乜咁多人排隊既。」
 
「緊係啦，大O係全校規模最大既O Camp！想識唔同系既Fm，當然要報啦！」綠衫女勁Hyper咁Hard Sell大O。
 


「係呀係呀！大O真係超好玩！包你一世難忘！」又黎咗個紫色衫既女仔，一樣咁殘，單眼皮，D皮膚差到呢。我開始懷疑所有O Camp既搞手都係成個月唔訓教。
 
「你地個O Camp有咩玩嫁？」我問。
 
「好多嫁喎，例如City Hunt啦、Disco Night、D Game、水Game，仲有Camp Fire。。數都數唔晒，你黎玩就知嫁啦！」
 
「傾咗咁耐都唔知你叫咩名，你叫咩名呀？」紫衫女好似對我好有興趣。
 
「我叫書生。」
 
「下？書生？我有無聽錯呀？」佢望一望我手中既Form：「係喎，你真係叫林書生。個名都幾得意！你平時好鐘意睇書嫁？」
 
「我呀媽希望我第時努力讀書，所以咪改咗我個名做書生囉。哈哈。」
 
「你媽媽好搞笑，我會記住你嫁。我個名叫阿紫，係Purple House既組媽。由於我地太多人報名既關係，所有人都會入Waiting list，希望到時正Camp見到你啦。」紫衫女對我好Nice咁笑。


 
「希望啦！Btw，我仲想玩其他學會既O Camp，有咩推介呀？」
 
「睇你想要D咩。例如天文扶輪就Sell Warm，成日都有Re-u活動既。水會就Sell玩得癲。如果鐘意Chur跳舞就Dan soc。你商科又靚靚仔仔玩In soc都唔錯嫁，即係投資學會，入面有好多靚仔靚女嫁。Film soc就有免費戲飛拎。」紫衫女一次推薦咗好多Soc俾我聽，解釋得好詳盡！
 
「水會好似幾岩我！我鐘意玩得癲D，哈哈！」
 
「到你影相啦。」
 
「3、2、1、笑。」
 
「OK嫁啦！放你走啦！」紫衫女話。
 
「唔該。拜拜。」佢地Friendly到我有D唔習慣。係咪大學D人都係咁嫁呢？呢D叫世故？
 


嘩乜而家入Waiti list都要收人成五舊水，玩個O Camp真係貴。（Btw通脹到2017好似成八舊水玩一個Camp，玩幾個真係會窮死）
 
 
 
幾經辛苦先過完大O個Booth。
 
經過科工、商院、人院，經過商院見到我身上既商院貼紙又俾人拉住狂Sell，重覆以上既對話一次。商院既人俾我印象係比較靚仔靚女，見到Booth入面有個中分著住黑色貼身連身短裙既大波妹，五官端正好靚女，搞到我有D想去認識佢。
 
但係俾咗錢落大O，我諗後面咁多Booth一定會狂俾人Sell，總不能見一個報一個。商院學生遲D上堂都會識到，我都係唔報呢個O Camp啦。
 
「Sorry呀我帶唔夠錢，報唔到你個O Camp啦。」我婉拒Sell我果個飛機頭靚仔。
 
「唔緊要喎，格離就係提款機！我帶你去禁錢啦！」警訊問號？
 
「其實係咁既，上堂都會識到其他人，我想睇下仲有咩O Camp報下。」


 
「點同呢，人地開學已經埋晒堆，你係O Camp可以識到第一班朋友，咁到時開學都唔驚無人陪你食飯啦。我地又有咁多師兄師姐可以俾Source你幫到你交Assignment！」
 
「我行一轉再決定啦。唔該你呀。」
 
我一路講一路行，同佢講Sayonara Oh Sayonara Oh 。。。
 
 
好辛苦先至可以經過多一行。
 
呢條木人巷真係。。。好難行呀。。。