一個書生既Player故事: 一二三

如常既一日，我今日又同江柏琪去咗廢校。

我發現林書生係一個死毒撚，已經可以每日都淨係返學放學去廢校都生存到。

「唉好攰好想訓。琴晚老豆又掟野鬧人，搞到我無覺好訓。」江柏琪個黑眼圈好深，琴晚一定過得好辛苦。

「對腳好痕。搞錯呀，冬天都會有蚊咬。」

「下？點會有蚊。你睇下有無蚊爛！」我扮作變態佬想揭起佢條裙。



「妖，行開啦你！」唔夠訓既江柏琪好燥底。佢推開我之後自己拉起條裙係度數蚊爛。

粉紅色突起咗一撻蚊爛，又真係俾蚊咬喎！

我每次見親佢既腿部都被裙遮住。唔睇都唔知，佢成隻腳都係紫色，雙腳內外都瘀咗一撻撻。

「。。。」我好細心咁觀察佢腳上面既瘀痕，用凝重既語氣話：「你對腳。。」

「咩阿？」江柏琪用一個唔耐煩既表情回應我。



「點解會瘀晒既？」你唔好同我講係蚊爛阿！我唔撚信你嫁！

「邊有瘀姐，蚊咬。」

「大姐，你當我傻的嗎？」我指住手掌咁大撻既瘀印：「我未撚見過咁大撻蚊咬囉。」

「你快啲從實招來，點解會有咁多撻印係度！」

「仆親囉！有次碌咗落樓梯就成隻腳撞瘀晒。」



「此話當真？」有啲奇怪，江柏琪唔會蠢成咁掛。

我一方面希望佢講既野係真，另一方面卻懷疑佢講大話。你知嫁，佢硬係唔鐘意講真果句俾我知。

「唔係你老豆打你呀嘛？」我單刀直入問佢。

「唔。。唔係呀。。」

「拿，一睇你個心虛樣就知你講大話。」我繼續：「幾時既事呀？」

「。。上星期囉。。佢成日都咁嫁啦，我都慣。」

「佢點解要打你？搵咩打成你咁？騰條？」

「佢飲醉酒我講粗口小佢咪搵衣架Fit我囉，屌佢老味。。」江柏琪話：「妖，講起就燥。我唔係好想再講，你咪撚再問啦。」



「。。。」

全場陷入一面尷尬既寧靜，長達五秒。

「不如你搬過黎啦。」我將心入面既諗法講出黎，打破沉默。

「咩話？」

「不如你搬過黎同我一齊住啦。」我試著很理性地將我充滿私心既慾望解釋：「你咁住落去都唔係辦法嫁，成日俾人打。」

「你傻撚咗呀？我同你喎？」

其實見佢長期留係廢校唔返屋企都知有原因，佢屋企既環境應該差到狗也不屌先要咁做。



既然我屋企空咗出黎有空間可以幫到佢，何樂而不為？

「你識唔識煮飯？」我問。

「好難唔識喎。」

「咁岩啦，我屋企而家差個人煮飯同做家務。你黎我屋企做工人當交租。仲有陪我玩篤促我溫書，家陣我成日自己一個，好頹。」好聲氣叫佢搬入黎佢一定唔會應承，係要用激將法講野江柏琪先會受。


「傻嫁咩你，我點同屋企交代？唔止老豆打死我，呀媽打埋一份都似。」煩惱既位係點樣同屋企交代，江柏琪似乎都對可以逃出屋企既提議感到心動。

「下次佢再打你，你嬲到離家出走去人地度訓唔返去囉。我諗你實試過啦！大把方法搞掂啦。」

我話：「你上黎我屋企睇下先再決定？」



「好。。」江柏琪放軟說話。