一個書生既Player故事: 一一零

分手後無耐，我就unblock咗溫梓柔既電話。


直到今日放學，分咗手成兩年無傾過計既溫梓柔突然間sms我，我就知有事發生。


溫梓柔：【Zoe佢地將江柏琪既袋掉咗響垃圾桶....仲話：而家有人媾好巴閉啦！江柏琪無講野，好嬲咁走咗出課室】


誓估唔到，我幫江柏琪啤住Zoe呢一下並無幫助到佢，反而俾多咗個理由啲八婆去蝦佢。




呢件事某程度上係因我而起，我唔可以坐視不理。

男生天生就鐘意保護弱小，我好想可以拯救江柏琪出火海，好想做一位英雄。



我走去4A班房，係垃圾桶度搵到江柏琪既袋。




「邊個做既？」我舉起個袋問4A班既人。


當然，全班人係我面前都唔敢出聲，個個係度食花生。


「敢做唔敢認？」我走去Zoe面前，好串咁話：「係咪你？」




「唔係喎。」Zoe唔敢望住我。


「我警告你，唔好再玩野，我唔擔保會做D咩。」我輕輕同佢預告，兇下佢。


「想點呀你？係人地班地頭咁串？」Tiger出聲想幫Zoe解圍。


「點呀？咁快出黎護主？」我話：「我林書生份人最講道理！佢真係無做過既話，我唔會搞鳩佢既！」吹水大會開始了。


「你講大話無用，我問下在場既人就知。」




我拍枱，大聲咁問Zoe：「你而家認定唔認？」


「。。。」Zoe俾我突如奇來既一拍嚇到成個人彈起，唯有死死地氣認衰：「係我做嫁，咁點呀？」


我拎起Zoe既帆布袋，一野係窗口掟落街，趺左落學校花園既泥度。白色既帆布袋俾泥土沾得污穢不堪，為江柏琪出返一口氣。


「咁你Feel下咁樣俾人蝦係咩感覺！」


除左靠惡，我唔知咩方法先可以解決到佢地之間既矛盾。




唔通咁大個人仲報串俾訓導玩記缺點咩，都無人驚啦！


但我知道退讓只會助長呢班人去欺負江柏琪！先前客氣換來既係佢地既得寸盡尺！我唔要見到咁！懦弱係保護唔到重要既野嫁！


「我唔理，聽日你同我搵江柏琪道歉，如果唔係我會再搵你算帳。」


講完我就拎住江柏琪個袋，頭也不回咁出左班房。


我覺得我正話真係型到爆，可惜江柏琪睇唔到啦！