一個書生既Player故事: 一零七

我：【江柏琪～】
我：【江柏琪～】
我：【江柏琪～】
琪：【江你老味】
我：【江你老味個江呀】
我：【你今日放去唔去廢校呀？】
琪：【唔去】
我：【我地一齊放學呀】
琪：【同你好熟牙？】
我：【咁惡既你=(】


 
自從識左佢之後，我既校園生活又變得多姿多彩左。
 
因為江柏琪，打打鬧鬧既兩個月入面，令我返學有左期待既動力，佢都開始接受左我係佢既世界出現，開始肯同我正正常常咁傾下計。
 
如果要形容我同佢之間既關係，我會話：我同佢玩緊一個追逐既遊戲。

我係一個狩獵者，而佢就係我既獵物。

 


如果江柏琪早過我放學，佢就會以九秒九既速度離開學校，就唔會去廢校度。
 
我偷影埋佢校既上堂時間堂。如果我早過佢放學，我就會係門口捕住佢，咁呢，佢為左唔俾我知佢住邊，就會帶我去廢校度做。。。愛做的。。。。功課。
 
風雨不改，每次都做到天黑，佢要我走左，另轉頭佢先肯走。

總之就係唔俾我知佢住邊。

 
 


江柏琪好少講關於佢背景既野。
 
我對佢所知既係佢成日燥底講粗口鬧我、有點孤僻、唔識同人溝通、反社會人格、口硬要面其實好開心既性格。。。
 
呀，有次我地去音樂室 Hea，原來佢識得彈琴，仲話自學左不能說的秘密入面既四手聯彈。果日佢心情好，竟然肯教我。

我都係苦學左成個禮拜先識得呢首歌。
 
我由一個音樂白痴變做識得一首隨身行李既臨記音樂家。
 
「我想學結他嫁，不過我無錢買結他呀。。」言談間，佢提及過佢想學結他既願望。
 
「你想學咩歌？」
 
「星晴，每次聽完心情都好好。」佢閉上眼，好滿足咁微笑。


 
我就諗，如果有日，我學識左結他再教佢彈星晴，佢應該會好開心，呢位周董Fans會同我講：「音樂白痴林書生都有識結他既一日！！OH Shit！！等朕免為其難俾你教下啦～～」
 
而讀精英班既佢並不算勤力，因為江柏琪同我一樣都係一個Deadline fighter，可以用好短時間高效率咁做野。

我地Test period都Hea hea地咁溫左一兩日書。

平淡既日子，無需要做D咩，有喜歡既女仔陪伴總是幸福的。