一個書生既Player故事: 一零六

遇見江柏琪既第三日，我正式宣布林書生已經做咗一粒煩膠，陰魂不散。
 
Lunch time就完果陣，我去4A班搵江柏琪。

妖，個死毒撚竟然孤僻到坐多愁善感近窗邊既單丁位。
 
只見佢拎住條鎖匙諗住去開Locker，我同佢既眼神對到正一正。

佢又西我面望向第二度。
 


我懶理學校好嚴厲既規定（入人地班房係要被人記名）、無視4A班同學既目光，逕自走到江柏琪既座位，坐響度等佢。
 
「呀同學，你係咪入錯班房？」江柏琪後面一位個樣子生得幾綜藝既男同學問我。

我果斷無視咗佢。

 
江柏琪返到黎好嬲，大叫：「妖彈開啦你！坐咗我個位呀！」
 
「俾你電話號碼我咪讓返俾你！」我樂此不疲。


 
「咁你留係度等呀Sir趕你走啦！」
 
「喂，你地真係無江柏琪電話嫁？」我問佢旁邊啲同學。
 
佢地都好尷尬咁搖頭，話無。
 
「嘩睇唔出江柏琪你平時唔聲唔聲，收埋個靚仔喎！」遠處有個樣子中上講野把聲好尖既八婆大叫。
 
我望住佢好奸咁笑，細細聲話：「你再唔俾電話我，就會好麻煩嫁啦。」


 
佢好嬲咁講：「9xxxxxxx，你老味！」
 
「聽唔到喎。」我聽到既。
 
「講咗一次就唔再講！你快啲走！」
 
我做口型同佢講咗聲「拜拜」就走咗。
 
係我走咗出門口後幾秒，我聽到4A全班係入面大叫「Wow」、「江柏琪你好識玩呀」、「4C班林書生都黎抄你牌，威啦你。」
 
當下本人聽到表示爽到翻天，哈哈。