一個書生既Player故事: 六十五

今日係我地級班際決賽既日子。同前兩場唔同，觀眾既數量Triple上升，籃球場上同學校走廊都企滿晒人。對面2D班整咗牌；好彩我地班都唔輸蝕，有王家欣同陳詩詩仲好有心機咁整咗幾個Fans牌，大大隻字寫住：Scholar、KaLok、Kit、2C！是咪好MK先？

Wohooo～有Fans呢件事係好有虛榮感。

集千萬人既注目於一身，今次隨時上位，全校都認得我啦。

我係咪可以考慮下參選學生會或者社長？想多了。

快啲Chok返個靚樣係度做熱身先。



唉我覺得自己應該要操返啲肌肉俾人睇。

幻想住自己著住籃球背心，流晒汗係肌肉度，仲唔睇到班女濕晒？

見到好多熟悉既身影，不過都係搵唔到阿婷，唔知佢係唔係度呢？


「咇。」哨子一響，比賽開始。

2D班係籃球陣容，無論身高同技巧都比我地略勝一籌。



一開場唔夠半分鐘佢地就好進取咁搶波直衝我地籃板底射入咗一分，個頭開得唔靚，大大打擊我地既士氣。

全個比賽都被對方控場，想去邊都無辦法得心應手，經過黎手就被人偷咗個波。我終於感受到被人屌打既果種無奈。


半場未完5:1。

2D班諗住又以快打慢跑直衝去我地籃板底下，我成功偷咗個波掉俾中場既肥傑。



佢以最大既憤怒值一野就將個籃球掟向2D班既籃板。


咪住。。好似唔對路喎。。


佢一個大Air越過咗塊籃板，打落一樓課室既動物園玻璃，「丫！！」伴隨住遲來既尖叫聲，果塊玻璃頓時碎撚咗。

我地全場O撚咗嘴，個下巴都唔識收返，唔該幫我托一托個下巴呀。

。。。。。。。。。。。。。。。。。。。。。。。。

無奈 x 1000000000

身為肥傑既隊友我都覺得柒到想搵洞捐，媽呀我唔想認我識得你阿。



「哈哈哈哈張俊傑你好柒呀！」全場都係度喪笑。

「犯規仲唔吹佢罰球啦！」「上位啦張俊傑！」

「繼續啦！」球證吹雞。

結果我地即刻無乜心機打，俾我最後零秒出手入左球，8:3完場。

同2D同學輕拍手臂既禮儀作結。

輸都輸得型仔呀林書生。


溫梓柔為我遞上毛巾，我將冰水由頭淋到落身散熱休息。



「屌你老母死肥傑。。頭先你果球Air柒撚到。。」羅嘉樂一路抹汗已經一路講。

「笑死我地。。」「差少少就嬴！」「你地打得好好啦！」其他同學都圍住我地討論岩岩場波，並無責怪我地輸左。

我一望走廊就見到阿婷同佢既朋友走緊返房室。

阿婷舉起左隻姆指，做左個口型：「掂呀。」

我都向佢報以一個微笑。