一個書生既Player故事: 六十四

好快就到咗班際。

低年級既初賽無乜人黎睇，基本上只有對賽果兩班既同學會睇。

我地唔叻，只係對面既2A班無乜人鐘意打籃球，加上係身高方面，我同羅嘉樂佔咗好大優勢，三兩下手勢就贏咗2A班，仲負碌咁贏咗2E班入咗決賽。對勝負沒有太大慾望，只求唔好係全校面前柒既我，反而表現不錯。輕鬆得來既勝利我無乜感覺。

我無叫過溫梓柔黎睇我打班際，但佢每場都會極速十分鐘食完個頹公仔面就黎睇我打波，仲會買晒水、運動飲品俾晒我地全隊人。羅嘉樂佢地成日都讚溫梓柔係一個娶得過，好賢良淑德既女仔。

為咗保持良好既形象，我係眾人面前會對溫梓柔微笑多謝佢。但當外人走晒，「欵。。多謝你，我快手返去換衫上堂先啦。」轉個頭我就會好快走咗去。



其實我應該開口同佢講分手，但佢對我真係太好，好到無咩可以挑剔佢既地方，我講唔出口。我希望佢可以知難而退，唔好再痴住我呢個仆街，我唔想開口講啲迫佢聽啲好難聽既說話。

「喂阿婷～」換完衫一出黎又撞到阿婷：「做乜企係男更衣室出面？想偷窺我換衫？」

「肯定係咁啦。你岩岩打完班際？」阿婷問我。

「係呀。。乜你無睇？」唉，傷心咗，我以為阿婷會記得黎睇。林書生，no one give a shit，你唔好咁多幻想啦。

「無阿。。我唔記得咗。。你地班贏咗定輸咗？」一箭射穿我既心。。



「贏咗，後日決賽，最後一次機會，你一定要黎呀。」

「咁叻仔！好啦！我應承你一定黎睇！等同你慶祝。」阿婷笑一笑：「快啲返去上堂啦。」

「係既prefect～」阿婷既背影總係好吸引我視線，好想可以攬實佢，聞下佢身上淡淡既沐浴露香氣。