一個書生既Player故事: 五十二

自拖咗佢手之後，溫梓柔對我更加痴纏、更溫柔，由廿四孝女友變做四十八孝既老婆。所有大小事我都唔需要擔心，隔個禮拜就整啲手作禮物、甜品、Note俾我，甚至我想請返佢食野都好難，簡直係大爺咁樣。

我地keep住text，我唔打波既日子就一齊放學。從佢對我既態度、望我堅定而仰慕既眼神，我感覺到佢有幾鐘意我，甚至比起林敏兒或者丁丁更鐘意我。我同佢去街會拖住手，會攬，會錫，會同佢講Bb話哄佢，相處同一對情侶無分別。

唯一欠奉既，係我無俾過女朋友既身份佢。我想有個人陪我，俾我拖，俾溫暖既感覺我。根本就無諗過要表白，叫佢做我既女朋友。始終差緊啲感覺，想點都勉強唔到自己。

我地維持咁樣既關係差唔多兩個月。

終於，有一晚，我地係當日我同林敏兒拖手果個海皮散步。



我拖住溫梓柔，佢係街燈下停底，問我：「林書生，其實我地。。係咪拍緊拖？」

「。。。」我望住佢，頭腦一片空白，剎那間露出咗一秒好復雜既表情，我唔知點答佢。

「你覺得呢？」我以退為進，微笑好溫柔咁答佢。

「由拖手果一日，我就當咗你係男朋友。。我地做緊拍拖既事，但。。又好似差緊一個肯定。。有時想叫你男朋友，但你又無正式講過我地係男女朋友既關係。我唔知你明唔明我想講咩。。定係你覺得拖咗手就唔需要表白？」我明，佢想迫我表白嘛。好難得，溫梓柔連珠發炮咁講咗好多佢既諗法。

「我。。以為拖咗手就等於表白。」其實唔係。我講咗個大話。



「咁即係，我係你承認既官方女友啦喎？」溫梓柔鬆咗一口氣。

我拖佢、攬佢，做晒情侶會做既野，我搵唔到理由去拒絕佢。更何況，如果我拒絕佢，就會成為一個玩弄感情既人渣，所以我唔可以咁做。

我攬住佢，摸摸佢個頭話：「係呀，溫梓柔係我林書生既官方女友。」

就係咁，佢成為左林書生第二個女友。

『我都唔知應該用咩態度去面對溫梓柔。我好迷惘，好矛盾。但我會盡力去做好一個男友既角色，令自己鐘意你多D。』係床度，我同自己講。



我：【早抖啦女朋友<3】我Send左個SMS俾溫梓柔。
梓柔：【嗯，係都係呀。男朋友。】
梓柔：【我愛你】
我：【我都係】我。。真係講唔出我愛你。。

唉，唔知林敏兒而家過得點呢？