一個書生既Player故事: 七

『鈴鈴。。。』

睜大對眼。。諗住起身。。。

點解出面咁凍既。。。

『鈴鈴。。。』

仲係好凍。。。感覺好迷糊。。



我起唔到身。。。

都係繼續訓下啦。。



進入夢鄉搵周公就一睡不醒。

到醒返既時候已經係中午十二點。



「Shit！今次大獲啦！點解會唔記得起身返學！」我坐起身大叫。一起身就感覺到頭暈暈。

「死啦，我要買冰紅茶俾林敏兒呀！」知道我唔記得返學時我既反應唔係開心，而係醒起林敏兒，我諗我真係痴咗線！

「你講緊乜呀？」呀媽問我。

「我應承咗同學買冰紅茶俾佢，病咗就買唔到啦。。我要返去呀。。」講完我就準備換衫返去。

「你同我坐底！唔準返！病好先準返去。」



「唔得呀。。林敏兒無得飲會好唔開心嫁。。」

「邊個林敏兒呀，自己唔識買野飲嫁？一定要你買？」

「係呀，一定要我買。我買同其他人唔同架。」因為我每日都買俾佢，佢會期待嫁！

「人細鬼大，十歲人仔就學人追女仔！」

「邊有追！」我鐘意佢咋嘛。。事實上我唔知拍拖係乜，無乜concept。

最後我都係屈服於老媽子既淫威之下，無返到學。

唉，訓又訓唔好。

林敏兒，你不如放過我俾我抖下啦，我唔想咁掛住你。



你快啲打電話黎啦。



「鈴鈴。。」五點鐘，林敏兒就打黎。

「林書生！做咩詐病請病假！」林敏兒一打黎就好惡咁話。

「咳咳。。無囉。。我真係病嫁。。一起身就發燒。。」我加多兩錢肉緊詐病呃假紙咁既款。我覺得我幾有潛質加入藝員訓練班。

「都叫咗你著多件衫嫁啦！不聽敏兒言，吃虧在眼前。你病成點呀？無事啦嘛？」哈哈好可愛呀你。我最鐘意就係俾你哦，令我覺得你好緊張我咁。

「唉。。我知錯啦。。以後都聽晒你話。。好似爸爸要聽媽媽話咁。。」



「你。。你講咩啊。。咁咪即係要我同你結婚。。」林敏兒突然怕醜，把聲都變得溫柔咗：「講返正經野先。我幫你抄咗家課呀。今日要做數學練習14，聽日要用A簿交。仲有中文閱讀理解P.58-60。我做晒嫁啦，陣間講答案你知。同埋我已經幫你做左每日一篇啦。」

女仔真係唔同啲，我感受到佢既細心。相比之下呀傑呢啲粗人真係唔會咁樣關心我，應該左一句虧佬，右一句廢柴就算數，莫講話打電話抄筆記，佢可能連我無返到學都唔知添。

霎時間，呢個林敏兒令我有啲感動。雖然佢通常都係被動接受果個，成日笑我串我又搵我笨呃我買冰紅茶俾佢，原來個心底都係會關心我對我好。正所謂施比受更有福、施恩莫望報，我付出咁多心機都只係單純想對佢好，日行一善幫自己積下福咁（真係咩？不如再吹大啲。。），無諗過回報，原來有回報係咁關心既一件事。

響呢個moment，我好想佢出現係我眼前，攬住佢。。弊，我唔應該對一個同學有呢啲奇怪既幻想。。林書生，你係咪病到傻咗？你到底係度諗緊啲乜野？

「好感動啊。。多謝你呀林敏兒。。同埋今日買唔到冰紅茶俾你。。Sorry啊。。」我從混亂既思緒入面返回現實。

「唔洗多謝。當係答謝返你平時D冰紅茶。無拖無欠嫁我地。」

「洗唔洗講到咁絕。」講咁白真係令我有d 傷心。。。。

「講下笑姐。咁認真做咩。」一D都唔好笑囉好嗎。