一個書生既Player故事: 五

由想同林敏兒講野、每日送冰紅茶、傾電話一步一步咁發展，我個心總係想要求更多。

人類係好難滿足既生物。一旦達到某個checkpoint，佢想得到既野只會多唔會少。

我講唔出原因。大概呢D就係電視劇成日講既「鐘意」。

平時我都係同呀傑放學，而林敏兒就同王家欣一齊放學。

同一間小學度讀既通常都係街坊，大家住同一區距離好近。





「林敏兒，不如放學今日一齊走？我想帶你去食雞蛋仔。」我扮作無何謂咁問佢。

「我想食，不過我約左家欣喎。」林敏兒臉有難色。

「咁一齊走囉？我叫埋我6B個老死呀傑，介紹你地識。」

「好呀。」



「你地去食雞蛋仔？我都想去，不如一齊？」全班最靚仔既狗公何諾軒聽到話想加入我地。我啤一啤佢，心諗，你同我爭野食？請問我約林敏兒放學關你叉事呢？

「好呀。」王家欣一副心心眼既樣子應承左何諾軒。人算不如天算，林敏兒定力好都無用，算漏左佢個 frd。



一路上，我都係同呀傑同行。林敏兒、王家欣就同何諾軒一齊行，有講有笑。

何諾軒好有型咁拎左張十蚊紙出黎，買左價值$10既雞蛋仔，仲遞俾林敏兒同王家欣食。



我望住銀包果張十蚊紙，心諗，你個R分怪，你咁樣我算D咩。。。

於是我轉移策略，買左個格仔餅，仲扮晒好食咁：「嗯！個格仔餅真係超好食。呀傑你快D試下。」

林敏兒聽到我話好食，即刻問：「真係嫁？我想試下。」

我遞俾林敏兒試食。女仔都係鐘意甜野嫁啦，一睇就知岩佢口味。

「真係好好食啊。」

「請你食啦。我買過個。」我拎左我D積蓄出來買多個格仔餅俾自己，講真都有少少肉赤。我望住狗公何諾軒，露出一個勝利者既笑容。哈哈，而家林敏兒拎住係我食過既格仔餅，我地間接接吻呀，你呢隻狗公恨唔黎嫁啦。

「好呀。」林敏兒秒速就拎左我個格仔餅去食。

「大食鬼。因住肥死你。」我不忘疾佢一句。



「林敏兒咁瘦，大把Quota啦！」何諾軒駁我嘴。

「咪係，何諾軒就最知我心！」林敏兒好自豪咁答我，搞到我心入面不是味兒。

「係呀係呀，何諾軒最知你心，我就咩都唔知。」我嘀咕。

我地兩個好似左右門神（大兵）咁夾住林敏兒，王家欣同肥傑就係後面好無奈咁吹水食我地花生。



何諾軒一路行一路問林敏兒：「林敏兒，你口唔口乾呀？想飲咩野？我去買。」

正當我想話冰紅茶既時候，林敏兒卻回答：「唔。。珍珠奶茶啦。。」



「你係度等我呀。」何諾軒就走左去買，表現非常積極。



「我仲以為你會話想飲冰紅茶。」我話。

「呢排飲得多左，都要轉下口味嫁。」

「鐘意日日飲唔得咩？」

「咁。。你鐘意食雞翼都唔會每日三餐都食雞翼啦下話？」

佢又講得有道理。但心入面總覺不是味兒。

原來林敏兒除左冰紅茶，都會飲何諾軒買既珍珠奶茶。。。





我地送左林敏兒同埋王家欣兩個女仔返去，就各自返左屋企。

放左學睇完套卡通仲打電話俾林敏兒一齊做每日一篇。

「天氣報告話聽日突然間趺到13度，記得著多件衫呀。」林敏兒臨收線仲特登提我，好warm呀。