電腦無啦啦多左d唔知咩既檔案係度(上): 第二十三節

趕到番去之後，呀力同miki神色都非常凝重
「咦，你地黎到喇」miki雙手一合說道
「到底點解lapallo數字又會上升既?」肥康直接切入問題核心
「頭先我睇番個錄影，suki入左另一間房訓左之後，呀樂番過黎一次，佢見到suki訓左，咁佢又再一次離開呢間屋，但因為我地只有係lift隔離裝左鏡頭，而冇係走廊安裝鏡頭，所以我唔知佢會唔會係經樓梯走左人，過左冇幾耐，lapallo個數字就增加左，係你地黎之前，佢加左成四次…」呀力簡短地講左佢留意到既野
「唔通係個txt檔講既地址出錯? 真正既”歷史控制器”可能唔會黃大仙果棟樓，而係隔離?」我提出質疑
「呢個可能性係有，但我最驚係點解txt果度明明寫住係果個單位，但係事實上又唔係，令我係度諗會唔會係呀樂有能力改變規則，令到txt檔裏面既野全部都唔可信」呀力個樣嚴肅左好多，因為佢知到如果呀樂真係可以修改哂所有檔案，咁我地一路以黎知到既野，可能全部都係錯既…
「其實呀樂唔需要咁做，如果真係知道邊個得到左歷史控制器，佢可以立即抹消左呢段歷史，大可以唔洗咁麻煩，特登改呢d細節，陰比邊個睇呢」肥康提出一個有力既解釋
「你呢個講法都好有可能」呀力諗左諗
「順帶一帶，頭先再睇日記既時候，我注意到一樣野，就係呀樂冇提過lapallo既文字加密，而可以直接修改項目，你地唔覺得奇怪既咩?」呀力忽然講d嚇人既出黎。
我同肥康都震左一野，諗翻起又係喎，莫非一開始既lapallo係完全冇任何既咩密碼，而且又係冇加密?




肥康疾左一疾，徐徐地講左一個幾得人驚既推論「會唔會…我懷疑將lapallo文字加密既係另有其人…，至於原因我未諗到…但願呢個唔係敵人啦」
呀力好快就否定左
「咁點解呢個人要幫我地文字加密先?如果係敵人就唔會留低個檔案比我地，我反而覺得有可能係自己人做。」
「自己人做?唔通係suki?定係失憶前既肥康?」我回憶起檔案既加密係肥康有份做
「唔排除有呢個可能性」呀力點一點頭
「但依家無論點猜度都推論唔到真相出黎，我諗我地要黎多次偵探遊戲」呀力露出奸笑既樣
「你係唔係路呀?又玩多次，我死都唔濟」我耍手擰頭
「你唔覺事態已經好嚴重咩，呀樂改左咁多次歷史，我地依家都未知佢搞過d咩黎，如果由佢繼續放肆，我真係唔知會有咩後果」呀力一面認真咁講
我冷靜左幾秒
冇錯，依家我地對呀樂所做既乜都唔知，而且連佢真正改變歷史果部”歷史控制器”係邊都未清楚，再者suki又比佢唔知點解鉗制住，要知道哂一切直接面對面既衝突可能係最好既辦法…




我仰起個頭，望住身高達180公分既呀力
「我了解個情況喇，今次行動只許成功不許失敗」
我同呀力互相擊一下掌，又再佩戴番個耳機，微型米高峰，兩個人都係一身黑色長褸，裏面放左小小工具係度
「肥康!通訊果邊靠哂你喇」突然間我覺得自己有d荷里活大明星上身咁
「咁miki就負責繼續監視呀樂一舉一動，睇佢幾時番入屋同埋有咩可疑行動，同大隻康一路同我地保持聯絡，而大隻康我想拜託你做一樣野」呀力好快咁指派每個人既岡位
「係咩野呢?」肥康奇怪地問
「我想你上網搵資料，搵下會唔會呢個世界發生左d咩變化，有可能會搵到呀樂進行緊一個咩個陰謀」
「呢層冇問題，點解要我做，而唔搵miki小姐呢?佢閱讀能力應該好過我」肥康追問
「原因好簡單，你仲記唔記得”author”資料庫既登記?」呀力重提呀樂日記上所描寫既lapalloedit檔案
「我記得，咁係咩意思呢?」




「只有成為author，咁佢記憶中既歷史先唔會比”歷史控制器”所影響」呀力臉帶笑意，但滲出一點既無奈
「我明白喇，因為係資料庫裏面只登記左呀樂，suki，我同埋街市仔，只有我地先分辨到咩先係原來既歷史」肥康摸住下巴稀疏既鬚根回答
「面對”歷史控制器”玩弄我既記憶，我真係覺得好無奈」呀力苦笑左一下
呀力係呢個時候靈機一觸
「呢個lapalloedit會唔會就係”歷史控制器”所講既鎖匙呢?」
面對呀力呢個閃電式既發言，我地一瞬間都覺得可能性好大
「如果係咁，我地只要拎番呢條鎖匙，咁我地就可以知到更多歷史，甚至連呀樂做過d咩，我地都好可能係歷史控制器入面睇到哂。」呀力再次展現佢無見一排既溝死女笑容