電腦無啦啦多左d唔知咩既檔案係度(上): 第二十二節
「不如我同肥康依家去圖書館搵下日記裏面既日子，睇下呀樂做過d咩，睇下有冇咩頭緒」我見依家大家都好攰，於是諗個方法出黎換換心情，出去抖下氣都好
「咁我同miki就留係大本營呢一度，繼續監示呀樂既一舉一動，同埋分析下佢既日記仲有咩特別既地方未被發現」呀力已經企左起身
分工完成之後
我同肥康就離開department 去左學校既圖書館
資料方面，我同肥康打算先從報紙入手
「搵報紙算好嫁喇，起碼唔洗好似雲海咁，去圖書館慢慢扭菲林，搵番d陳年舊事，我諗都係搵下呢年睇下呀樂做作d咩先」我提議
「你記唔記得呀樂係日記提過佢父母車禍既」肥康問道
「係呀，做咩咁問，唔通有咩特別?」
「我見呀樂報復心咁重，唔知對過呢位醉駕司機做過d咩，突然間好似有d興趣想知添」
「有道理，我記得佢父母出意外果個日子係上年8月29 日」
「我地就搵下呢日之後果幾日有冇咩特別野」
我地幾經辛苦，將成疊報紙搬左出黎，然後搵左個房開始我地既作戰
不過睇番一年前既報紙，有好多野都好感觸，好多所謂既大事我都唔記得左，我諗應讓唔多關呀樂事，香港人本身就係善忘…或者呢個就係香港人典型既特性啦
肥康眼力超好，好快係港聞版既一角搵到一細格關於車禍既報道
「8月29日，一輛貨櫃車失控撞上兩位途人，造死兩人重傷，現正在瑪嘉烈醫院深切治療部留醫，肇事司機懷疑醉酒駕駛，導致他人受傷被拘補，現正送往警局接受問話並等候保釋…」
「呢兩個受傷既人冇估錯應該就係呀樂既父母」肥康指住呢篇報導
「唉，意外都冇人想嫁，但又唔怪得呀樂既」我嘆左口氣
睇左同一日幾份報紙，都係冇乜新料，內容都係講貨櫃車撞傷人
不過之後果日既報紙就有野睇喇
肥康好快搵到一份報導出黎
標題大大隻字寫住
「因果報應 撞人司機翌日被撞」
我同肥康睇到呢個標題都面面相覷，呆左幾秒唔郁
內容大概講述番呢個司機係保釋左之後，由於懷疑佢有濫藥既習慣，傻傻下就衝左出馬路，之後就比架巴士撞到，仲要捲埋入車底，報紙形容到係輾到成個人血肉模糊。
我睇到呢段報導驚訝到講唔出聲，mak大個口完全超出我想像範圍
肥康亦都十指合上，望住篇報導良久不發一語
因為我地都睇到10月1日果陣既日記，呀樂寫住”司機我要你陪葬”既說話，計番個時間，真係超過左一個月，能夠進入改寫既時間。
「睇黎呀樂既仇恨比我地想像中既大」肥康緩緩道出
「不過改寫歷史唔係好似有規則既咩?」我忽然諗起「The Rule Of History」
「 1. 操作意識的機會只有一次，而歷史調節引發的意識改變不在此限制內。
=13px「2. 承上，在個人意志和操作上如有矛盾，程序將不被執行，或由歷史自我調節…」
「根據呢兩節既形容，如果個人意志同佢既行動唔配合，咁樣應該改寫唔到，我咁諗岩唔岩?」
「你既分析係岩既，咁係建基係有個人意志果陣嘛，依家呀樂就係襯呢個司機濫藥果陣走出馬路自殺，咁樣應該冇違反個守則」肥康嘗試去解答呢個問題
「咁如果佢冇濫藥習慣，係咪代表唔可以控制到佢?」我突然有個疑問
「照道理應該係，我諗呀樂會唔會已經悟出方法去控制人呢?我地不如睇下之後d日子仲有冇大事發生啦」肥康又開始搵佢d報紙
係之後十月5號10號分別係呀樂既日記都有寫d奇怪野，我地會覺得佢應該做左d野
10月5日
把垃圾掃掉，真舒服
10月10日
又一批垃圾…不過都消失了，做正義的事往往那麼暢快
…
我地立即睇番報紙
但唔見有死人…
「畢竟呢個歷史器唔係”死亡筆記”，唔係用黎殺人，因為佢既能力仲大，直頭係改變哂一切，所以呀樂唔一定殺左人，反而殺人分分鐘仲難搞過改變歷史令人消失」肥康一路睇10月5號既報紙而我睇緊10月10號既報紙
係5號其中一份報紙，肥康發現左一樣特別既野
「xx省xx市市長的榮休，深得百姓擁戴下結束他的光輝事業…在他任職期間曾經清理過不少貪污官員，其清廉的作風，務實的處事贏盡xx市市民的掌聲…」
「xx市…你有印像嘛?」肥康個樣有d疑惑
「咦?! 等我諗諗先，呢個市曾經有過暴動，因為市政府貪污好勁，上訪既農民又受到壓迫對待，咩強姦案，毒打案，都好似有過，最印像深刻係有條村曾經因為清拆事件而自焚…」
肥康笑左笑「我都冇你咁清楚，我只係覺得呢段新聞有d假，話哂呢個大國成日都醜聞滿天飛，依家話佢有個市好清廉真係好似睇緊李力持既笑話」
我怔左一怔
「唔通呢個都係呀樂搞既鬼?」
「極有可能，當一個人有左權力，覺得自己乜都做到既時候，有可能會以為自己係上帝自己係判官，我見佢日記都有寫咩世間既不公義實在太多，我相信佢有可能睇左呢篇報道，於是將所有野改頭換面，意圖令大國走上正道。」
我瞪大雙眼
「咁呀樂佢係做緊好事喎」
「哈哈，我就唔係咁樣認為，每個人都有自己既意識，每個人都有自己既自由意志，你依家咁樣格硬被人操縱，用絕對既干預，你唔覺得好有問題咩?」肥康以反問既形式回答
「改好佢又有咩問題? 如果我有能力，我可能一樣會咁做」
「咁呢個都可以算係一個神學上既問題喇，哈哈，好多人唔相信有神，因為佢地覺得上帝唔出面阻止壞事既發生…所以呢個神唔係大愛，如果出左手，同呀樂所做既有冇分別?」
「唔!如果係我地唔知既情況下，改好佢又有咩問題?」我大膽發問
「即係係你唔知既情況下做乜都得? 呢個根本問題重點唔在於你知定唔知既情況，而應該諗一諗，有外力既情況去干預呢個世界，咁樣岩定唔岩」
「哈哈，其實點先為之干預? 國家擁有核武，一樣係一種干預，一種要脅，冇野係話岩定唔岩」
「so you got the point，我都認為冇得話咁做岩唔岩，哈哈」肥康放低手上既報紙
係短短既時間入面，我地似乎離左題，係度討論形而上學既問題，係咁哲學性既討論裏面，我地各自既心裏都好似對呀樂有多一層既了解…
呢個時候，呀力既電話打黎，我將佢設定為免提
「喂?! 街市仔同呀康你地係咪仲係圖書館?」呀力用急促既語調問
「係呀!係咪呀樂果邊發生咩事?」
「lapallo既數字又再增加左…」
「姐係呀樂佢又再一次改變歷史喇?」
「應該係」
「咁你係咪係mon果度見到佢改野，有冇辦法知道佢改左d乜野?」我有d好奇
「……，呢個正正係我打比你既原因，因為數字改變既時候，佢根本唔係屋企」
「咩話?!唔係屋企?咁佢點改變歷史呀，佢都冇電腦用」
「呢層要再研究，不如先番黎集合再睇下我地下一部既部署係點先」
「好啦，我同肥康番過黎先」
「…」
我立即望向肥康，肥康亦表示佢明白
於是我同肥康立即番department匯合呀力同miki