電腦無啦啦多左d唔知咩既檔案係度(上): 第九節

係呀力同suki傾得興高彩烈之時
呀力無端端同我講
「街市仔，不如你落街買d野飲番上黎，大家都講到口乾」
話屌你，搶撚完我女神，仲要我幫手打雜幫你地買野飲，你於心何忍
「我要殺死呀力呢個仆街!!!!」唔知點解腦海響起呢句說話
跟住suki好溫柔咁話「唔該哂你啦」
我怒火瞬間降哂溫，好，我比面女神先唔同你計咋
一路去7仔，一路都好唔甘心
「咁樣格硬搶我女神都有嫁，唔通your face真係your fate?」
呀力又高大，又靚仔，又係天才中既天才...越諗越唏噓




我隨便買左幾枝可樂，幾罐藍妹就番番去肥康基地


「咦?道門開左既?我出去果陣明明關實左」
裏面既燈又熄哂，氣氛好唔尋常
我放低d飲品即刻衝入屋裏面，見到肥康、miki同呀力都訓低左
成條死屍一樣，郁都唔郁，唔係死撚左掛?
「屌你，幫你地買野飲竟然訓覺?」
唔係喎，點解好似少左個人咁既，suki呢?!
我大叫suki個名，可惜毫無反應…




肥康個基地好大，但一眼可以望哂，suki睇黎真係消失左


「死喇，呀力!肥康!」我係咁拍佢地都唔醒
好彩我跟過老豆學過下按穴，即刻按佢地既人中穴
「啊~」一陣呻吟過後，呀力肥康同miki依次醒番
我一野拍落呀力塊面「喂，suki呢?」
「下，咩suki，suki唔係度咩?」呀力個樣傻下傻下咁
「點解我地會訓著嫁?」我都係第一次見到岩岩訓醒既肥康
miki突然醒起「丫，我記得喇，suki頭先話咩咁岩隨身帶左d香薰，見我地攰攰地就不如點下」




「係呀，之後我地就覺得好眼訓喇」肥康個樣清醒番哂


嘩suki曉放毒咁霸氣既咩，點解佢要咁做?
「我都覺得呢個suki有d古怪嫁喇」呀力搔一搔個頭
「下?suki做左d咩」我驚問
「頭先同佢傾計果陣，見到佢心不在焉咁款，好似係咁望去部電腦果度
個感覺好似好急想做一d野咁樣，我以為佢唔習慣同陌生人傾計添」
「咁都唔代表d咩嫁喎」
「當我約略講哂成件事既來龍去脈，佢不但冇驚訝既感覺，仲要問我有冇備份個file，咁你話代唔代表d乜野丫?」
我女神suki係呢一刻真係變左恐撚怖suki喇，suki搞乜鬼呀，我好唔認識佢呀，事實上我對佢既認識真係好少…最多咪whatsapp過幾次…
「咁可疑既情況底下，我答左佢只係呢個基地有呢個file」
呀力唔單止係天才，仲係讀心神探，我不禁對佢肅然起敬
到底suki點解要咁做呢?






呀力跟住一個蜈蚣彈彈左起身，衝左埋去電腦果度
「果然!」呀力面色沉左一沉
「咩事呀?」我都去埋去個mon果度
個lapallo file消失左...
30,000TB既檔案冇哂，十足十玩完清爽版咁清爽
肥康衝左過黎，然後鍵盤戰士上身
「硬碟果邊好似損壞得好徹底，唔可能再復完」
到底suki做左d咩...
「唔洗驚定d黎，係我黎大隻康呢度之前，我已經叫佢SD左個file比我，d檔案係department 個server果度
問題係果堆file唔會再自己增長，我亦唔知果d file可唔可以影響到歷史
始終太多野都未清楚」呀力若有所思
「我地係咪唔應該再插手呢件事」miki帶點尖聲問
「係未了解到真相之前我係唔會罷休」呀力噴左口氣
呀力冇左之前淡定既笑容，一面認真咁講




「照咁睇，suki既目的係要消滅我地個file，如果佢知道我地仲有back up，佢一定會再返轉頭」
「不如咁，我地去學校既department睇下d file點先啦」肥康提議
我吸左啖氣
「我認同肥康既建議，要del哂d file好定繼續深入了解，都要去一去嫁喇，miki小姐係咪?」
miki點左點頭。


一行四人好快抵達學校
由於呀力受到幾個老闆照顧幫手做research，所以佢有鎖匙可以入到去department server果度
呀力飛快咁開左個file "lapallo 113212"數字冇變，但個file 好似冇再有新既file產生
「唔知d file仲有冇功用呢」我忍唔住開口問
「呢層未知，不過單野我地仲未討論完」呀力開左個txt檔黎睇
「頭先我同suki傾藏文果陣，我問佢果d亂碼係唔係密碼黎，我見到佢眼神有d變化，
雖然時間好短暫，但已經盡收我眼底。」呀力托住頭chok住講
「即係點?」




「你等我一等」呀力好快咁輸入左d野
「我嘗試將d亂碼變成藏文編碼先...」
翻譯過後，所有字變左一d冇規律既英文字，同之前肥康亂咁自動偵察編碼差唔多
「咦，又係呢d 騎呢英文喎」我將之前肥康試過既野講出黎
「呢d會唔會係文字加密?」呀力望向miki果度


「唔...咦，係 Vigenère cipher」miki驚訝咁講
「咩v..ciper?」我不解地問
「呢個係一種文字加密既方法，最簡單我地可以用一個表黎對應唔同既字母 
我簡單舉個例，如果你想將apple加密，你可以先諗一個英文出黎，通過對表
再變成密文，例如apple變成april，密文就係aegtp，睇落就好唔規則，不過
我地再對番個表就可以發現，呢個加密其實唔難」
miki講野既時候不忘將佢既食指放係佢下巴...又扮cute真係好難頂
「如果你要翻譯哂全部野，要幾耐?」呀力問




「但係，再深入調查會唔會好危險?」miki顫聲地問
「你應該調轉黎諗，如果你真係可以乜都唔理，全身而退，咁段片有你個樣點樣解釋? 如果係命中注定要發生既野，你點逃避都冇用，不如積極d去面對，係咪?」
呀力唔單止tum 女神技術一流，睇黎連中女都殺得死。
Miki遲疑左一陣，然後點一點頭
「寫個program可以好快搞掂，不過成30,000TB可能要d時間都唔定…」


我係佢則邊睇下佢所謂解密既表，居然係一幅好似好簡單既圖
「密碼學真係博大精深，比著我見到呢d咁既亂碼我真係唔識解番出黎
諗到果條友真係痴線」
「有時越簡單既野，係d人搞到好複雜姐，」miki一邊準備一邊坐低
miki好快就搵左個位開始寫佢個program，當佢每翻譯完一個txt檔佢就會傳送過黎呀力果邊。


當我打開第一個txt 既時候，我發現左一樣不得了既野


「The Rule Of History...」第一句就彈左咁既野出黎
歷史既規則?...
唔通係"歷史控制器"既使用方法...
如果翻譯哂所有文字，我地係咪可能會知道更多既野?
呀力雙眼慢慢開始發光，睇黎真相離我地唔遠...