電腦無啦啦多左d唔知咩既檔案係度(上): 第四節

好奇怪，明明接觸緊一d好似恐怖，好違反常識既事，
但我冇驚既感覺，反而好想了解固中既真相，肥康同我係求知欲呢一方面真係好似。
我離開左肥康屋企之後，就用手機sd左個email比professor hung，
洪教授係學識好淵博既教授，我曾經有幸上過佢既社會心理學，又上過佢既中美關係研究。
最重要係，佢識得既語言真係多不勝數。


夜晚既時候，洪教授比左回覆。
內容大概係講
「你段片講緊既果陣語言有d似古藏語，相似度達到差唔多50%，




我嘗試比少少猜度你參考，我聽得出既詞彙有歷史既見證人，
歷史既洪流，真神既指示...都係一堆好奇怪既說話...如果有興趣你可以搵相關既書籍」
有關段片既資料，洪教授都係了解到咁多。
我直接將封email forward比左肥康。


襯肥康係破密方面搏殺緊，我就去左圖書館翻查資料
有關古藏文既資料實在太少，可能要追溯番去天城文或者要讀一讀梵文
望住一堆咁既騎尼字，真係頭都暈埋
係我拎出黎既其中一本書係講藏傳佛教既轉世靈童，




其中有一句令我印象特別深刻
「公元14世紀，部份高僧占卜到托布加溪卡的一位幼童，將會成為活佛的轉世
，這位轉世靈童被發現時，曾經講過一句莫名奇妙的說話，提到宇宙的創制者，
什麼是未來，未來由他掌握...」
不過有關既書真係少得可憐，我嘗試查下學校既圖書館
如果打藏語，活佛，轉世靈童呢d關鍵字，藏書量比公共圖書館既多
我二話不說就起行番學校。


依家正值學校既假期，學校本身已經冇乜人，更加唔好提圖書館。




當我搵到相關資料果列書櫃既時候，我竟然見到一個好pure 好true既女仔係度搵緊書
呢個女仔好有氣質，身裁幾勻稱，一面認真仲幾有書卷氣，絕對係高登仔眼中女神中既女神
雖然心急搵書，但性更急嘛
位靚女望左過黎，睇黎發現左我及緊佢
大驚之下，虎驅微震，但好彩我有d急才
「hello，其實呢，我對你手上果本書有d興趣...」
女神望左我一眼，露出一個小酒窩「係咩?我仲以為好少人會鐘意睇呢d書」
oh!yeah!得米
「最近研究緊藏文，果d喇嘛野呀，睇到頭都痛埋」我略現痛苦狀
一瞬間女神雙眼好似發光咁「我都無朋友會研究呢d野，不如有時間傾下?」
係呢個時候，我覺得自己一直低估自身既吸引力...
我chok一chok樣 「我叫街市仔，有冇whatsapp呀，得閒傾下計?」
交換電話後「咦，你叫suki? 個名好襯你喎」
與此同時，我不自覺諗起呢句說話最近好似講過唔只一次
suki銀鈴般既笑聲「我有野做走先啦，再見喇」




望住suki既背影，我忽然有d悵然若失。


係書櫃拎左幾本書出黎，搵左間自修室坐低慢慢細閱
但感覺都冇乜進展，太少相關既野喇...
不如wtsapp 下suki，碰下運氣都要既
更重要既係，同女神wtsapp係無比既幸福
我慢慢從褲袋拎出電話既時候，電話震動...唔通suki仲心急過我?


「hi，我係miki呀，琴晚我見有d時間，我試下再改下個avi檔，
影像果度有d進展，呀康叫我比你睇下段片，依家你用手機一樣可以播」
居然唔係女神suki，而係中年miki...唉，人生就係咁，我好似有d看破紅塵
段片壓縮到得番3mb，所以好快就sd完
我禁一禁檢視影像，段片就隨即自動播放




段片果然清晰左好多好多，片中依稀分辨到係一個光頭既女人，而佢係度做緊d動作
有時指天篤地，口中喃喃有詞，聽到既說話同上次冇乜分別，我估聲音果度已經完整破解哂
片中既女人遠黎越遠，景象一變，周圍變到好多熔岩，d岩漿不斷流動，彷彿係進入左煉獄既世界
鏡頭一轉又見番個女人，佢坐左係遼闊既地上面，周遭乜野都冇，佢微合雙唇
發出又尖又長既叫聲 「吱.....」而且越黎越細聲
當再聽唔到任何聲音既時候，片都跟住完結。


果度撲朔迷離感，突兀感不斷浮上黎
我問miki「果個光頭女人果d動作係咪手語黎?」
「唔係，手語絕對唔係咁」佢比左個好肯定既答覆
「我覺得佢有小小似瑜伽既動作，因為我平時都有玩開」miki仲整個好cute既icon出黎
真係你老母丫，幾十歲人仲扮可愛
據我所知印度瑜伽同西藏又有d關係，或者可以問一問suki...
「唔該哂你miki」呢一刻我真係多謝佢，




人越大，越少人會陪你做鳩野，成年人一定就要變得實際?遇到覺得有意思既野玩下就係浪費時間?
到底咩先係浪費時間真係值得斟酌...
「唔洗客氣，我對呢d密碼學既野都好有興趣，話唔定遲d出論文有用...」
「哈哈...」就係咁就完結我地之間既話題