我被初戀女友瘋狂報復: 外傳:第七話

「喂,佢地仲未上嚟既?」我地八個為左睇日出,漏夜行上山,但劉家雄同林慧勤卻中途脫隊...
「可能佢地匿埋一邊,吓...打war game喇...」帶頭既志豪開玩笑講。
「唔好佢地喇,仲有幾耐先到呀?」家儀唔耐煩咁問。
「就快嫁喇,行多十分鐘左右喇...」其實係十分鐘前啟明都講過同樣既說話...
「喂,好悶呀,有無啲歌仔聽下呀?」
「開個收音機你聽喇...」志豪攞左個平時公園阿伯攞開既收音機出嚟,「不過好似唔係收得咁好...咦?得左...」
「嘩!咩台嚟嫁?播埋啲舊歌既?」志華講。
「依首好聽呀...」一路無出聲既志玲突然開口,「細個好鍾意聽依首嫁,仲記得中間有段讀白,講男主角趕去見女主角,點知遇到條濕滑既公路同個粗心大意既司機,從此佢地就陰陽相隔...」
濕滑既公路...粗心大意既司機...
「好慘啊隻歌...咦?羅小柔,你做咩呀?」我被家儀既問題拉回現實,「做咩眼紅紅咁既?唔夠訓呀?」




「吓?可能掛...佢地咁耐仲未到,我想返轉頭睇下佢地做咩呀...」講完我已經擰轉身落山...
「阿萍啊,你最近有無見過陸綺珊呀?」
「無喎...講開又講,佢最近都無返嚟學會喎,唔知佢做咩呢?」
「哦...唔該...」果日之後,已經幾日無見過陸綺珊,連食晏去佢班房都搵唔到佢,甚至電話都唔聽,我腦海不禁幻想佢同爸爸既對話,我好掛住佢...
「羅小柔...」Miss Yip突然係我後面叫,搞到本來畫緊畫既我嚇左一跳,仲畫左出界,「你近排...有心事?」
「吓?唔係啊...我無野...」
「無野?你睇下你幅畫...」幅畫係以班房為背景,係班房裡面淨係坐住一個女孩,而我只係畫個女孩既背影...
「成幅畫...我覺得個女仔好寂寞,你睇下個女仔...自己坐埋一邊,低住頭...唔知係喊定傷心緊...」被Miss Yip一講,我一時情感湧上心頭...
「吓?唔係...我一時...諗返尋日睇套戲,所以先畫出嚟啫...」我抑壓住情緒,為左令Miss Yip唔好咁擔心,我仲講左大話...
「其實唔只依幅...最近你既畫都係,無左以前既喜悅,換嚟既係...悲傷...孤寂...」




望返幅畫既女仔,我心裡卻聯想起陸綺珊一個人既時間,佢背負左幾多,究竟佢而家係邊?做緊咩?點解唔返學?
「就算你點樣,我都係你身邊,假如我唔記得點愛你,你記著提醒我...」
我...我好掛住你...我好想見你啊...
「聽講陸綺珊爸爸出左意外,佢要照顧屋企所以返唔到學...」Miss Yip係我耳邊講。
「Miss Yip...」佢點一點頭,我立即執埋啲野,離開學校,跑去陸綺珊屋企...
雖然個天落緊雨,但我無理會,我個心淨係想見陸綺珊。
一路上,我不斷回憶我地第一次相識,佢送左幅畫俾我...本來整蠱同學既陷阱卻誤中副車而被Miss Yip罰企...聖誕節我地係街頭擁吻...係南丫島既海灘,我地遺留左一幅未完成既畫...一切一切,就好似走馬燈咁閃過我腦海...
「孖辮妹!」一把聲音突然進入我腦海,將我拉回現實,我東張西望找尋聲音既來源及聲音既主人,「依邊呀!」
我望向對面馬路,發現一個揸住藍色遮既女仔停左係度望住我,佢慢慢將把遮放落嚟,而面孔正係我一直盼望既人--陸綺珊。
我地兩個對望,四目交投,我地個心好似連繫住一起,無論相隔一條馬路,唔用任何語言,都無辦法阻止我倆心走近。時間彷彿停止一樣,寧靜得四周沒有任何動靜一樣,同時令我地忽略四周一切...




一道白影將一切吞噬...我既陽光...我既色彩...以及...我既愛情...
「今日旁晚六時左右,一輛白色輕型貨車疑因天雨路滑收掣不及,於大角咀撞倒一名正橫過馬路十六歲女生,更被倦入車底,消防員救出時處於昏迷,送院後情況嚴重,貨車司機通過酒精呼氣測試...」
「咦...佢地係度呀!」我係山腳見到劉家雄佢地,而我身邊卻係從後追住我,要求一齊搵佢地既志華。
劉家雄將食指放在唇前,示意我地唔好嘈醒正挨係佢身訓著既林慧勤。
「我地都係唔好阻住佢地喇...」志華係我耳邊細聲講,於是我就同佢行開一邊。
望住佢地互相依偎,不禁回想一年前既自己,而眼角...