我被初戀女友瘋狂報復: 外傳:第六話
「小柔,你去邊呀?」正當我準備出門口時卻被媽媽叫住。
「我去邊唔關你事...」自從果件事開始,我同媽媽少左講野,連對佢既態度都改變。
「唔關我事?你幾咁樣同我講野嫁?」媽媽激動地講。
「你唔俾我鍾意女仔嘛?我而家就同男仔去渡假屋,仲要兩三個添啊...我聽你話做返個正...正常人啊!」激動既我一支箭衝出門口,我唔知媽媽果刻有咩反應,而我眼角卻有啲淚水浸出...
「唔好喊...唔值得喊...」我係心裡對自己講...
「醒左喇...」我行出房,見到陸綺珊拎住份早餐由廚房行出嚟,「食早餐啦!」
「幾點呀?」我抬頭望個鐘,原來已經九點,「你唔使返學呀?」
「你件校服仲未乾呀...」佢將份早餐放係檯面,行近我身前捉住我雙手,「而且尋晚見你咁樣,我點敢行開唔係你身邊?就趁而家為自己放日假輕鬆下...啊,你想去邊呀?不如去離島丫,好唔好呀?」
見到佢咁輕鬆積極,連我都俾佢感染埋,「我想去南丫島呀!」
「好,就去南丫島,嚟...食左早餐先,跟住同你買新衫,再去南丫島!」
「嗯...」
「你訓陣先丫尋晚都無點訓,船到左我叫醒你啦!」
「唔使喇,我想睇下風景...」睇住隻船慢慢開出,高樓大廈慢慢宿細,消失於眼前,感覺就好似要遠離塵囂,脫離世俗...
「你點呀?好啲未呀?」落左船,陸綺珊已經頂唔順坐左係攔杆度...
「俾多五分鐘我...」佢已經抖左三個字左右,「我而家仲好似係船度浮下浮下咁...」
「你幾耐未搭過船呀?」
「上次係小五果時去大嶼山...」
「我買啲話梅俾你喇!」
過左兩個字,佢終於復活,亦開始我地既南丫島之旅...
「好舒服呀!」今日天氣好好,萬里無雲,我地吹住海風行到沙灘。
「尋晚仲好大雨,估唔到今日咁好天!」望住蔚藍既天空,我心情豁然開朗。
「依啲叫雨過天晴嘛!嘩...」陸綺珊突然訓左係沙度,「好舒服呀!喂,一齊啦!」
「咁污糟,訓完又成身沙...咪搞...」無論咩時間佢都咁樂觀開朗。
「嚟啦...嚟啦...」佢係咁搖我隻手,搞到我有少少動搖,「嗱,你再唔訓係度,我就...我就掟你落海!」
「喂,你唔好亂嚟...喂...救命呀...」說時遲那時快,佢已經抱起左我跑到海邊,掟左我落水。雖然果時已經過左四月,但啲水仍然好凍,而佢就企係海邊哈哈大笑。
「濕晒喇,衰人...」我唔服氣咁向佢撥水,而佢又向我還擊,最後我地當然由頭濕到落腳...
「唉...好攰啊...」我地坐左係沙灘上,望住海天一色,一望無際既大海,「可惜我地無相機丫,個景咁靚...」
「咩無啫,嗱...」佢用手指整左個長方形當相機對住我,「笑下啦...」
「啊,有喇...」我攞左枝樹枝係沙上面畫,但係沙上畫比我想像中難...
「得唔得啊你?」佢哄埋嚟想幫手畫。
「你...唔問我尋晚...發生咩事既?」
「而家唔好講依啲野住...喂,你條孖辮好難畫呀,不如剪左佢喇!」
「你個頭就剪...我留左好耐嫁...」我對孖辮係細個媽媽教我紮留到而家...
「畫完都攞唔到,不如行去第二度囉?去風車山囉!」
「嗯...」
於是我地就留低左幅未完成既畫就離開。我地手拖住手,但途中都無出聲,其實我好想同佢講尋晚啲野,但佢都無機會俾我講...
「嘩...你睇下,幾似玩具...」上到風車山,佢指住對面岸既建築物講,的確,雖然依度唔算好高,但景觀還算開揚...
「啊...啊...」我對住對面岸大嗌,將心裡既鬱結宣洩出嚟,「我係唔正常嫁...啊...」
沒有回音...
霎時間,一雙手從後將我緊抱,溫暖由背後傳來,佢係我耳邊輕聲講左一句,之後錫左我面一下...
我轉過身,唔理旁人既目光同佢擁吻,果一刻我只希望時間可以停止...
「小柔,你去左邊呀?擔心死我同媽咪喇,去學校又搵你唔到,電話又唔聽...」一返到屋企,爸爸媽媽已係客廳度等,爸爸更一輪嘴講野,搞到我一時間唔知點答佢好...
「世伯...佢尋晚係我屋企過...今朝佢唔係咁舒服,所以今日無返學,俾佢抖下...搞到咁夜先返嚟,唔好意思...」綺珊見我無咩反應,上前幫我解圍。
「哦...咁你無事嘛?」爸爸摸一摸我額頭,「依位係...」
「我係佢朋...同學...」綺珊窒左一窒,驚我地既關係曝光...
「嗯...小柔,你同媽咪返入房先,我有啲野想同你...同學傾...」爸爸面色凝重,我有一絲唔好既預感...
「小柔...今次係媽媽唔啱...對唔住...但係...」入到房,媽媽已急不及待講左一大輪野,我只以機械式咁點頭回應,內容係咩我完全無在意,我在意既係爸爸同綺珊講左啲咩,仲有頭先係樓下我同綺珊既對話...
「帶我走...」
「走?走去邊?」
「唔知...總之帶我離開依度...或許去無人識我地既地方...」
「小柔...你同我都知道唔可以逃避現實,而且我地年紀仲細...就算走左...我地之後點?點樣生活?」
「嗯...你講過唔會放手嫁...」
「好...我地拖住手,一齊入去...」