入村: 入村(上)
返鄉下，相信大家都好有經驗，主要都係探下親戚咁！又有邊個估到，返一返鄉下會為我地招黎殺身之禍。
話說，我媽咪有成19年冇返過自己既故鄉，自從佢嫁左黎香港。除左係因為黎左香港，忙於為生活拼搏外，亦因為返鄉下路途遙遠，要搭一日一夜既火車先會到達，更大既原因係因為有左我地3兄弟姊妹，帶住我地3個小朋友唔方便長途跋涉，而且係我地唔同既成長階段，佢都要專注係我地身上，行唔開。直到今年暑假，我地3兄弟姊妹都中學畢業，媽咪決定帶我地一家人返鄉下睇下。
而家我婆婆已經過左身，鄉下只剩底公公，同另外一d親戚。咁多年來，即使媽咪遠在他鄉，但佢都每晚打電話比公公噓寒問暖，每隔一段日子亦都會寄錢返去比公公。
今次，我地一行5個人(老豆，媽咪，呀哥，細佬），搭左一日一夜火車，終於到步。到步之後，仲要搭的士入村。我地5個人叫左架的士一齊搭入去，入到去已經4點幾，只係4點幾，天色就已經好昏暗。而車駛到遠處就已經見到公公企左係門口等我地。媽咪同公公久違19年冇見，即使有日日通電話，都難解思念之情，佢地一見面就抱埋一齊，我見到佢地兩個都眼泛淚光，場面感人，而我就抬頭望向天，令眼淚唔好流落黎，就發覺，呢到4點幾，月亮就已經出左黎。
抱左一陣，媽咪同公公就即刻帶我地去拜訪其他親戚，去到佢地屋企門口寒暄幾句。一路係呢條村到行，細佬突然問左句：「家姐！呀哥！你覺唔覺呢條村啲人都用奇異既目光望住我地？」
的確係，我都留意到，佢地見到我地，都會不停望住我地。而媽咪聽到細佬既問題，就笑住咁答，呢條村係劉家村，全村既人都互相認識，係會對我地呢啲少見既人覺得好奇既！咪望多兩眼囉！
「哦！呀哥！家姐！你覺唔覺得我地好似《潛行空間》套電影入面咁呀？」細佬笑住咁講。
「咁我地要快啲逃走啦！佢地已經發現我地！」呀哥又笑住咁應。
(註：《潛行空間》係一套講夢既電影，講人可以進入人地個夢偷資料或者植入意識，但每個人既夢入面都有防衛機制，當發現外來既入侵者，就會開始攻擊，咁就同我地而家受村民注目既情況好似。)
雖然媽咪既解釋好合理，但我始終因為村民既奇異目光而覺得好唔舒服。尤其，之後我地經過一間屋，我見到有個婆婆係門縫到偷望我地，仲對住我笑，令我不寒而慄。
當應該拜訪既親戚都拜訪完之後，已經9點，我地準備搭返車出出面既賓館住。因為黎個時已經知道農村環境唔太好，會有啲污糟，驚我地唔習慣，就一早book定賓館，準備呢幾日係個到住，朝早再入返黎陪公公。但媽咪因為同公公實在太耐冇見，決定留底係到瞓，叫我地4個出去住。但我唔肯，係都要媽咪同我地一齊出返去住賓館，而老豆媽咪就叫我唔好咁任性，媽咪同公公咁耐冇見，要陪下公公。但我唔係因為想同媽咪一齊，所以唔比佢留底，而係岩岩村民既舉動仍然令我好不安，我怕⋯⋯於是，我陪媽咪留底左，而老豆、呀哥同細佬就搭車出左去住賓館。
當我同媽咪係公公屋企梳洗好，準備瞓覺既時候，我見到公公將出面既大門落橫木鎖上不得止，仲上左一個大大既鎖，令我不禁聯想到佢唔係唔比人入黎，而係唔比我地出去。
註：農村屋結構係大門同入屋之間隔左個好大既前院，廁所設係前院。
而我半夜起床去洗手間既時候，聽到門口傳黎鐵鏈拖拉地面既聲音，我透過門縫望向門口，竟然見到一個牛頭人身同馬頭人身既人係出面拖住條鐵鏈係到行。我比眼前既景象嚇到深深咁吸左啖氣，就係個一刻，牛頭人身另過黎我個方向，佢既視線係穿過門縫，同我對望。
嚇到我醒左，原來係發夢。陽光由窗到透左入黎，原來已經天光，我起左身梳洗一下。食完早餐之後，我whatsapp呀哥，問佢搭車入返黎未？佢覆我係個到行下先，夜d先再入黎。於是我就同媽咪周圍行下，再搵d親戚傾下計，而我發覺呢度既人都好純樸，非常友善，每家每戶都有老人家，都有仔女在旁照顧，大家都傾得好開心。我好奇咁講左句：「我以為而家啲人已經唔再做農業，大部份都出城工作，估唔到呢條村咁多人留係到陪父母。」但佢地聽到呢句說話之後，面色即刻沉左落黎，但我唔知自己究竟講錯左啲咩！唯有講過另外一樣野。
以上為細妹角度
-----------------------
以下為呀哥角度
係賓館一早起床，我地即刻梳洗食早餐，準備搭車入村。我whatsapp呀妹問佢起身未，但得一個剔，冇收到，睇黎佢仲未起身。但我地都截左的士入村，同司機講：「去劉家村」。司機同我地講冇呢個地方。我老豆話係因為呢個地方偏僻，所以冇咩人知，於是照上車，但教司機點開過去，明明老豆同我都認得條路，但架車兜嚟兜去都搵唔到條村，打比呀妹又唔通。最終我地終於去到似曾相識既個個路口，我地都好肯定轉彎之後就係目的地。但，一轉彎，我地只見到一個個墳墓排列係旁邊，中間就形成一條車可以通過既通道。
「點解會咁架？明明就係呢到，我都認得！」細佬咁講。
但司機就驚恐咁回應：「你地唔好嚇我呀！呢度畢嬲都係墳場黎架！唔係咁邪呀麻！」
「呢到畢嬲都係墳墓？」我驚訝咁講。
「係呀！我都係聽人講，呢度係老人墓，每個都係冇仔女照顧既孤獨老人，一個又一個咁孤獨老死，而變成呢到既老人墓！不過我都係當故仔聽下！」司機答我。
我開左道車門，準備落車睇下，細佬捉住我，叫我唔好落車，但我都落左去睇。我一面沿住通道行，一面望向周圍。突然，我呆左咁企係一個墓面前，劉仲文（1935-2006），相入面個個就係呀公，佢係10年前已經死左？
待續～
有興趣可讚黑柴Facebook
同步更新
https://www.facebook.com/%E9%BB%91%E6%9F%B4-879053098899020/