溝女的聖地──補習社: 81
我手拎住部手機，但係Billy眼瞓到乜柒都睇唔到。
「係咩！？」佢一邊打住呵欠一邊返埋佢。
我講咗出嚟都覺得自己On9！
係喔～我做咩唔打電話呢？
柒咗。
第二朝執曬啲嘢，我勁趕，俾班fd屌到我半死咁制......
「屌你啦Water，琴晚又唔撚執喎。」Alex條友句句串到行。
佢份人除咗啲之外，份人都好好，仲好有義氣，所以好多人都由佢，有時仲當係笑話咁笑。
「我琴晚同fd傾電話呀嘛!!」我解釋。
「咁好心你咁朝早執啦!!」
喱個時候我仲執緊嘢架其實。
「失眠呀嘛，就天光嘅時候先瞓咋屌你!!」
「唉屌 ! 無撚用架你 ! 」Billy同Alex異口同聲咁講。
我發覺，上咗大學之，少咗好多中學花名，好多人都叫自己英文名，咩A for Alex，B for Billy，C for Cat呀之類。
就連我叫呀水，佢哋都笑咗好耐，覺得我個名好柒，所以幫我改咗叫Water。
Alex仲話「雖然叫Water都好柒，但點都好聽過叫呀水，哈哈。」
彷彿，叫英文就威水啲，有型啲，高級啲咁。
係大學入面都有人叫花名嘅，乜伯乜仔之類嘅都尚在人間，可惜已經買少見少。
忽然間好懷念中學叫人花名，仲有時啲花名係自己起嘅，仲會記得好清楚。
依家......我仲記得好多fd嘅花名，但係大學，真正上心嘅名，少之又少，但未至於話無。
我仲記得我幫呀楊改咗個花名，叫——撚楊。
我成日「撚揚」、「撚楊」咁叫佢，叫到佢嬲，之後我就淆底，無再叫過了。
我同佢哋班友屌下屌下咁返到香港。
係上機前，Kitty已經同我講佢到咗機場，我心諗洗唔洗咁快呀？我仲有排坐喎。
但佢話唔介意，無所謂啦，反正佢都等咗咁耐囉......
唉...佢唔到都到咗啦，可以點姐。
一落機，熄咗飛行模式，就好幾個Kitty嘅whatsapp彈出嚟，不外乎到未，到咗同佢講之類。
好明顯，我真係無咩朋友。
一班朋友出去嘅時候，係接機大堂就聽到Kitty大嗌我個名，「呀水~~~~~~~」
佢遠遠咁行埋嚟，我身邊嘅朋友見到佢，眼神已經閃出異樣嘅光茫，然後意思係話，「你？」
我連忙解釋，「佢咪就係琴晚同我傾電話嗰個女仔囉 ! 」
「唔怪得你傾咁夜啦 ! 」Billy成塊面都係醋意，好燥。
Amy個眼神更加唔同添，帶點敵意同仇視。
其實我覺得你應該輸得心服口服呀，因為佢係Kitty。
今日嘅Kitty化咗個妝，唔濃，睇落更加靚咗咁。
只不過我真係唔鐘意女仔化妝，我始終認為，以前唔化妝，單純嘅Kitty係最為完美，無論樣定性格，都係一流。
只見Kitty茫然咁望住我班fd ，我就連忙幫佢哋介紹。
「佢係Kitty，我琴晚走出去傾電話嗰位。
Alex條粉友一個箭步衝咗上前，企係我同Kitty中間。
「原來你就有Kitty，Water有同我提起過你呀，話你好靚女，估唔到真係，而且仲靚到咁。」
我同大家分折下喱個句子嘅含意。
Alex咁講簡直可以令佢立於不敗之地，原因如下：
1.佢話我有提起過Kitty，間接話俾Kitty聽，我其實好關心Kitty，連佢身邊嘅朋友都知。
2.仲話我讚Kitty靚女，似係幫我講緊好說話，但最尾嗰句，就將自己拉返埋嚟，一個借力打力，兜個圈讚自己同時又讚埋我同埋Kitty，一箭三鵰。
3.唔好睇佢講到好輕挑，好老土，低B先會受。女人就係咁低B ! 明知禮貌都當真。
Kitty臉上泛起些少紅潤，相處咁耐，我都知佢怕醜架啦。
當你覺得好老土，好柒嘅嘢，女仔就係最受喱一套。讚兩下就真係當自己女神。
就好似無論邊個講你靚仔，就算你知佢係講笑，你都會暗爽，及猜想，「我無返咁上下料，人哋點會拎我嚟講笑？」但事實係點我永遠都唔想知。
總結：Alex喱句真係堅料，假到仆街，但勝在見效。
佢嘅口才就好似功夫咁，可攻亦可守。
成班fd個個都搶住同Kitty傾計，除咗Amy。
Alex個三寸不爛之舌，好順利就打入Kitty個話題度，傾得興起。
「你份人真係有趣嘅姐，哈哈。」Kitty笑道。
佢嘅笑容笑得好燦爛，我心入面唔知咩滋味咁。
以前喱種笑容係得我先睇到，依家見到佢俾其他人整到笑，就好唔想咁。
我目無表情咁望住佢哋。
因為我笑唔出，我扮唔到輕鬆咁同佢哋有講有笑，我以為自己做到，但點知原來我做唔到....
「我同呀水都係時候要走啦......」
然後Kitty行過來翹住我隻手。
「WOW!!!」眾人齊聲嘩然，「咁我哋唔好阻住人哋啦，哈哈 ! 」
佢哋都算識做，但我就呆住，因為我唔明Kitty翹手嘅意義。
佢哋成班友齊嘩嘩咁走曬，得返我同Kitty。
Kitty都好識趣咁鬆開我隻手，然後笑容瞬間被拉下。
「仲好唔開心？」我柔聲問，儘管我不解頭先Kitty嘅所作所為。
「嗯...」佢低頭道。
「咁你頭先仲扮到好開心咁？」我知道，強顏歡笑真係好辛苦。
傷心唔係最辛苦，最辛苦係你明明好難受，卻要笑面迎人，將自己嘅唔開心收到最底。
「唔想係大家面前唔開心，反正我都習慣架啦 ! 」
「我由細到大係屋企都係咁，唔開心都要開心，如果唔係爹地媽咪會唔開心。」
我聽到都覺得好心up，高級教育就係要咁嚴格。
但依家我從頭先嘅表現睇落，佢真係做得好好。
可能換轉其他港女，一早已經衝咗埋嚟拉咗我走，留底一班頭上有好多問號嘅fd。
但另一方面又覺得Kitty屋企好慘無自由。
「咁你依家想去邊？」我哋仲徘徊係機場度，未走住。
「你肚唔肚餓？洗唔洗食啲嘢？」我估唔到Kitty喱個時候仲關心我。
「唔洗呀......我唔肚餓。」
「係呢，你等咁耐洗唔洗食啲嘢呀？」我唔清楚佢身體咩狀態，琴晚搞到咁，都唔知佢琴晚點過。
「唔洗呀...我等你嘅時候都食咗嘢啦。」Kitty淺淺地笑。
「咁你想去邊？我陪你呀..」今日我主要任務，就係要令Kitty開心返 !
「嗯......」Kitty左想右想，「去你屋企放低啲行李，再陪我去一個地方呀 ! 」
都好呀，依家拎緊咁多嘢，一陣Kitty出咩事，我啲行李就要留係度架啦。
我哋係機場搭咗一班直到我屋企附近嘅巴士，一上車嘟卡，負擦咗錢。
「屌 ! 」我都幾大聲咁講，自然反應自然反應。
我都唔記得咗之前嚟機場已經負咗錢，頭先又唔記得增值，掛住同Kitty傾計。
後面嘅Kitty已經拎咗一張50蚊，放咗落個投幣箱度，十分之有型地說：「我幫佢俾。」
一道光茫從巴士上層照落Kitty度，神跡呀 !
Kitty順手嘟埋個八達通，成300幾蚊 !
對於我喱啲窮撚嚟講，通常八達通都唔會超過一百蚊。負咗錢一係入50，一係入100，再負再入，所以個數字好少會上到100，有時會嘅，同老豆老母出街唔夠錢佢哋都會幫我入多啲。
上到車我還返俾Kitty，「唔該曬。」
Kitty有禮地接走我手上嘅50蚊，「客咩氣。」
然後唔知係咪等我攰得制，定係琴晚折騰一輪好攰，好快佢就進入夢鄉。
我頭先係機上面瞓咗好耐，所以依家坐車好精神，然後Kitty又再坐係我身邊。
喱種記憶好新鮮，有點新鮮而又熟悉嘅感覺。
就好似你好耐無食一樣嘢，就以我為例好啦，大家樂嘅焗豬排飯，我有好長一段時間無食，再食返嘅時候，曾經覺得好食，依家都一樣，感覺好似好熟悉，但因為太耐無食而感到陌生。
一種若隱若現嘅感覺。
如今，Kitty熟睡係我隔離，依舊文雅，而且睇落佢真係好攰嘅樣。
我係車上面打下機過下日神，點知打到最高潮位，我忽然間聽到Kitty好細聲咁發開口夢。
我聽就好細聲，但我戴緊耳機，應該真實嚟講，係幾大聲下。
我連忙除咗一邊耳機，仔細聽，但同時又打緊機。
「唔好走.......唔好.........走。」
一個老土情節又再出現，我無放係心，應該都係忘唔到佢ex。
「Selina.......」
果然 !
但隨之而來係一個令我放低手機嘅說話。
「呀......水.....」
究竟你想點？掛人哋嘅同時又掛住我？
好複雜......我無諗過我同Kitty之間嘅關係會咁複雜。
如果一段關係入面，只係得兩個人，所有嘢都可以好簡單。一旦加多咗個人，事情就會變得複雜。
我好懷念以前同佢簡單而又快樂嘅日子。
算，我都係唔諗咁多，再睇下點啦......