溝女的聖地──補習社: 加速篇41-45
我好熟悉咁帶住Kitty係屋苑入面左穿右插，成功帶咗佢嚟到屋企門口。
我拎出自己屋嘅鎖匙，但淆到呢插鎖匙窿都插錯。
「喇、喇、喇」一連串拉閘嘅聲音，同Kitty屋企用「咇」嘅聲音相比，我哋已經差成大截。
開咗門，我就同Kitty講，「入嚟呀。」
我一開門咋嘛，老媽子已經係屋企入面大嗌：「仔！你咁早返嚟嘅？」
Kitty已經係門口除咗鞋準備入嚟。
「你唔係話今晚會……」老母已經行到門前，見到一個陌生嘅女子企係佢面前，有啲不知所措。
「伯母你好。」幾驚你話hi auntie呀。
Kitty彬彬有禮咁講。
係陌生人或者唔熟悉嘅人面前，Kitty都好有禮貌，好有修養。
「哦～Hi」老媽子唔知如何應對。
「哎…入嚟坐呀…唔洗客氣架。」老媽子好熱情咁招呼Kitty。
另一邊廂，我老豆出現啦。
老豆幾乎全身赤裸，淨係著住條孖煙通係屋企四圍走。
死啦，我唔記得咗老豆係屋企慣咗唔著衫，無論冬天夏天都好，都係一條底褲四圍走。
我有問佢，「乜你唔怕凍咩？」
我老豆好神氣咁同我講，「怕凍嘅，唔好叫自己做男人﹗」
老母話最鐘意我老豆咁剛強，但唔知點解生到我咁......
我係咪佢哋執返嚟？
不過唔緊要啦，最大問題係當前應該點樣解決。
我同Kitty坐係我哋屋企嘅摺凳上面，我哋連一張似樣嘅沙發都無...
淨係得一張木造嘅長椅，而我老豆老母就坐係上面。
我老豆經過頭先嘅尷尬，已經著返件衫。
頭先Kitty呆咗咁望住我老豆，良久才叫咗聲「世伯好。」
都係我老母醒目，識得擋係老豆面前，然後係後面，用手撥兩撥，叫我老豆走開。先化解咗呢個危機。
「死仔，帶條女上嚟都唔通知聲。」我老豆一嘢敲落我個頭上面。
「嚟唔切同你哋講呀嘛。」你估我同咗你哋講，你仲俾唔俾我帶上嚟呀啦？
其實頭先已經諗好咗個藉口架啦，同Kitty商量過，就係用離家出走呢個理由﹗
「Kitty因為佢屋企嘅問題，所以今晚借住一晚！」我斬釘截鐵咁講，一洗我係屋企人心中毒撚嘅形象。
你哋個仔都帶女返嚟呀，仲要係靚女！
「呀仔，你今晚做廳長啦！」老豆吃笑地說。
「你哋咁順攤？」我屋企人都算保守架，好細個嘅時候（中一、中二嘅時候）就同我講，中學唔好拍拖。
到咗高Form嘅時候，就無咗回事。
「屌你，你有人要已經執到啦！」老母老實不客氣咁係外人面前串自己個仔。
「呀…唔好意思呀…我哋平時唔係咁架，哈哈。」老母呀，你講出嚟有無人信呀？
「呀水…佢係？」老豆問我。
「佢叫Kitty，中文名叫程雪。」我順便幫Kitty介紹埋我老豆老母。
後尾諗返，其實呢個根本係多此一舉。
「呀雪，原諒我哋粗人，唔識講英文呀，我哋就叫你呀雪啦！」老豆和和氣氣咁同呀雪講，一改佢狂傲嘅性格。
「唔緊要呀世伯。」Kitty一入到嚟，一直都好拘緊。
「呀雪，呀水佢就交俾你照顧啦。」老母嚴正聲詞地道，彷彿都默認咗Kitty就係佢哋女婿咁。
只見Kitty兩頰通紅，含羞答答咁，雙手工整有禮地擺係跟前。
我哋真係好似見緊家長咁。
我哋差嘅，只係一個名份。
但背後，係兩個唔同嘅世界。我同Kitty嘅世界係無辦法融入，呢樣我自己清楚。佢會唔慣呢種低下嘅生活，我會唔慣Kitty嗰種上流生活嘅壓迫感。
勉強拉埋一齊，只會生活得更痛苦。總有一日，Kitty會返去佢嘅世界入面，我哋終需要向現實低頭。
「伯母，我同呀水唔係嗰種關係啦…」Kitty害羞地撥一撥佢嘅劉海。
但我清楚，係啲廢老面前，你講乜嘢都係無用。
「得啦，後生仔嘅嘢我哋唔會理架啦！」老豆已經準備返入房。
「話唔定你哋過埋今晚就係呢？嘻嘻。」我老媽子陰陰嘴咁笑住返入房。
沿路兩老仲有講有笑咁話，「洗唔洗準備埋安全措施俾佢哋呀嗱？」我老豆細細聲同老母講。
但佢哋嘅細細聲只係平時我哋同人講嘢嘅音量，換言之只不過係佢哋講嘢大聲。
「痴線咩！講埋曬啲咁嘅嘢。」老媽子教訓老豆。
咪臭系！係Kitty面前講埋呢啲嘢，一陣我哋如何是好？
一諗起，我心如鹿撞，撞嚟撞去。
「唔幫佢哋做安全措施，我哋咪有得抱孫囉！」老媽子講呢句嘅時候中氣十足，似係故意講俾我哋聽。
一山還有一山高……
剩底尷尬嘅我哋。
我同Kitty返入房，我諗緊有無衫可以俾Kitty更換之際。
Kitty嘅手機響起上嚟。
手機上顯示係Home。
我同Kitty你眼望我眼，唔知點算好。心諗依家已經搞到咁，好似太遲。
我諗我同Kitty嘅想法係一致，就係──後悔。
「點算呀？」Kitty一臉徬徨。
我頭先真係太過自私，依家冷靜啲諗下，就覺得後果可能比想像中嚴重。
手機嘅鈴聲越漸急促，我哋亦都越嚟越焦急。
加速篇15
我哋任由手機嘅鈴聲繼續響，直至成間房回復平靜。
沉默一會之後，我問佢，「你驚唔驚？你驚嘅話我依家就送你返去。」
經過我思索一輪之後，我決定咗。
「我驚呀……」Kitty將手機緊緊地握著，放係胸前。
「咁我依家就送你返去！」我拎出門三寶，銀包手機鎖匙，準備好出門口。
男人只要有銀包手機鎖匙就出得門口架啦。
「但係…」Kitty擋咗係房門口。
「我 唔 想 返 去 。」
Kitty講完出嚟之後，露出佢嘅招牌笑容。
然後佢拎部手機出嚟，熄咗部電話。
係呢間狹窄嘅房間入面，只剩底我同Kitty。
我間房無咩特別，只係得一張床，仲要係鐵架床。一張毫無美感可言嘅書枱，同埋一個無乜衫嘅衣櫃。
「你間房好整齊喎！」聽Kitty呢句說話，似係發自內心。
我第一次俾人讚間房整齊，由細到大老母都話我間房亂。
「可能無咩嘢係度，先覺得整齊啦。」
「我第一次入男仔房咋！」
「吓？上次係你屋企嗰個青梅竹馬呢？無入過咩？」我問道，青梅竹馬嘅關係唔係好好嘅咩？
「我爸爸同佢爸爸好姐，唔代表我要同佢好架嘛，係咪？」Kitty所言甚是。
Kitty見攰，坐咗係床邊。
我都一陣坐埋落去，但我同Kitty嘅距離唔係好近，幾乎一個坐床頭，一個坐床尾。
聽到Kitty咁講，我個心即刻安心啲，佢話無嘢就當然無嘢啦。年輕嘅我就係如此單純，人哋話乜就係乜，完全唔知呢個世界嘅謊言何其多。
「你話無就無啦﹗」我別過臉去，今日換我怕羞啦。
老實講，由Kitty入我間房開始，就一路怕羞到依家。
Kitty沿住床頭爬過嚟，眼睛定住呁問我，「你呷醋呀？」Kitty笑笑口問。
從佢嘅表情睇得出，佢好得戚。
「咩啫，我邊有。」估唔到男仔原來都有口事心非嘅時候。
唔知點解，我想逃離呢個尷尬嘅地方。
「我沖涼先啦﹗」然後就自己搵衫去沖涼。
臨出房門嘅時候，我偷望到Kitty調皮咁摀住嘴笑。
我快快手開房門，我怕我會忍唔住......
我一開門，就撞正我老豆老母。
佢哋似係走咗唔遠，成個TVB啲劇情咁...唉，無佢哋咁好氣。
「老婆呀，咳...咳...上次啲藥你放咗係邊呀？」我老豆咳住咁講。
「好似係電視上面個櫃度呀。」佢哋一邊講，一邊用隻眼偷望我。
我係你哋生架，郁下條尾就知你哋想點啦﹗
我無視佢哋，徑自走入沖涼房。
係沖涼房入面，我先鬆一口氣...
我除好曬衫，望一望自已硬到好似條鐵咁嘅巨龍。
忍得真係好辛苦。