溝女的聖地──補習社: 36

我哋匆匆咁埋咗單，就走去搭船。

最早嗰班船都要8點半，我哋入咗去裡面等，但Kitty已經心急如焚，趕住要返屋企。

但我想拖住佢...拖住個時間咋！唔好諗多...我未有咁嘅膽...

我連行入去嘅步伐都故意拖慢，Kitty叫咗我好多次「行快啲啦」，但我都一意孤行，咁樣就可以見多佢少少。

就算只係少少都夠。



「咁急返去做咩呀？」我係船閘口問佢。

「你唔明架啦，遲返去好大鑊架！」Kitty臉上好焦急，流曬汗咁，明明依家仲係冬天。

「我呀爸一向都好擔心我，我遲少少返去都唔知會變成點...上次為咗食飯遲咗返去......」Kitty係度吞吞吐吐咁，唔通嗰晚遲下返去，發生咗啲咩事？

我有啲擔心。

我腦海中好自然咁浮現出「獸父」、「鬼父」，等等嘅嘢，無性暴力，都有暴力咁啦。



係咪將Kitty......

我即刻諗起套電視劇，個老豆成日望佢個女，然後將佢姦撚咗，唔記得咩名啦，但我諗起都覺得心寒。

「咩事呀？」我戰戰兢兢地道。

「唉...」Kitty嘆一口氣，「算啦，你唔知好過知，反正都過咗去啦。」
 
Kitty講到咁，我都唔好意思再問落去。



畢竟佢嘅家事我管唔著，即使我係佢男朋友，都無權干涉。更何況...我咩都唔係...

我依家只係希望Kitty識得保護好自己咋。

「你保護好自己就得啦。」我直道自己嘅心底話。

「嘻嘻﹗我梗係識得保護好自己啦。」Kitty用雙手摀住自己胸前，雙眼充滿著挑逗嘅眼神。

屌你，真係以為我唔敢揸落去？

Kitty唯一嘅敗筆，就係無一個姣好嘅身材，但佢嘅性格﹑樣貌，都足以彌補呢個缺點。

Sor9ry，我真係唔夠膽，你叫我去拖佢隻手，我都唔敢啦﹗仲叫我去揸佢個波？

不過講真，無邊幾個男人可以忍受到呢個挑逗嘅表情，除非無能啦。



「你......你真係呢。你唔俾其他男仔食就奇啦﹗」我打趣地道。

「你好驚我俾其他男仔溝咗去咩？」Kitty調皮地道。
 
「驚架，唔驚就奇啦﹗你咁靚女，上到大學嘅時候一定好多男仔埋手嘅......」你話我杞人憂天又好，咩都好啦，就算依家Kitty係我女朋友，都難保有一日佢唔會俾其他人溝走。

我定一定神望住Kitty完美無暇嘅側面，我心裡暗暗盤算著......

我寧願溝唔到Kitty，都唔想依家溝到，但俾帽我戴。

我諗嗰種痛，會係比溝唔到高出10倍，甚至100倍吧？

「遇上一個自己鐘意嘅難呀嘛...」我估唔到Kitty會同我嘅想法咁一致。



Kitty一講到感情事，就會超級認真，完全唔似講笑。

上一秒仲係談笑風生，下一秒就變得嚴肅。

「如果拍拖，唔可以到老嘅話，我寧願單身。」出自Kitty把口，成句嘢就好似變咗權威咁。

「你諗下，如果拍咗3年拖，好認真咁付出感情，但只要一句分手，所有回憶，嗰三年時間就好似付諸流水咁，咩都無，只要諗下我都覺得可怕。」

第一次我覺得，我同Kitty個心係如此的近。

Kitty將自己內心想法同我講，係有啲突然，但至少俾我知道佢點諗。

而且我覺得佢講嘅好有道理，有啲嘢光係諗下，都感覺到痛。

究竟Kitty點解會有咁深嘅領悟呢？我唔明。係咪女仔天生定佢真係經歷過某啲嘢？


 
「呀水，我唔係唔想拍拖......除咗時間唔啱之外，我更害怕未知數。」Kitty終於講出佢心入面害怕嘅嘢。

「未知數？」我唔明，對我嚟講，呢個字唔陌生，但我就完全get唔到佢咩意思。

「將來好多嘢都會變，但係變成點，我哋控制唔到。」Kitty語音未落，我哋就俾人叫上船。

成個話題俾人硬生生咁整斷咗。

相信好多人都試過，行街傾偈嘅時候，總會俾其他事打斷下，然後想返去嗰個話題就難上加難。

我正正遇到呢個問題﹗

上到船，一坐低，Kitty已經拎個耳機出嚟聽歌，然後小睡片刻。



唉...仲諗住傾落去架嘛...依家咁樣傾條鐵咩？遲下想找機會傾就難啦...

開船嘅時候，Kitty都無起身嘅意欲，我都諗住開耳機嘅時候，Kitty用隻手禁住咗我隻手。