「奇幻，純愛」《我，總是會愛上妳》: 流浪

晨哥：「你準備好啦嘛？」

我：「唔好用一個咁沉重既語氣講啦好嘛，你咁搞到我唔驚都變驚啦晨哥。」

晨哥：「哈哈，都係循例講兩句啫。你知啦，無得返轉頭架嘛，一旦開始左就只是成功或者失敗兩個結果，無得退出或者放棄。」

我：「都係個句啦，由一開始我就無選擇既權利。」

晨哥：「喂…」

我：「唔做就一定會好快死.咁即係我只可以做啦。」

晨哥：「屌，唔好諗呢D啦，不如諗下好返之後做乜好過啦。」

做D乜呀…我又真係好似無諗過呢個問題添。

我：「好返之後…如果可以的話，我想有一個小朋友。」

晨哥：「小朋友…係因為Chase同Nicole？」

我：「一部分啦，而且有個小朋友感覺好似會好好，睇住佢大…睇住佢拍拖結婚。」

晨哥：「咁咪遲D同Ada生返個囉，反正之後大把時間。」

我：「啊講起佢…佢為左俾動力我，話咩我好返之後就同我結婚喎，真係搞笑。」

晨哥：「咁咪好囉，咁我就叫Ellie要更加落力啦，我都想睇到你地結婚。」

我：「哎結婚咁麻煩…而且我都唔知自己可唔可以俾到一世既幸福佢。」

晨哥：「咁既然佢而家揀得你，即係話佢覺得你可以俾到幸福佢啦，俾d信心自己啦。」

咁講又好似有d道理，啊我諗到啦我想去流浪…

我自己係心入面講，但講到一半就訓著左。

啊…係麻醉藥呀？

到我再一次張開眼既時候，我發現自己身處係另一個地方。

呢度係…邊度？

要點形容呢度好呢…都無得形容啦，呢度暗到仆街，乜柒都睇唔到。

但奇怪既係，明明環境漆黑一片，正常應該會伸手不見五指，但我居然仍然可以見到自己既身體。

呢度係…夢境？

我諗都係啦，睇電視動畫就見得多，估唔到我都會經歷到呢d事。

按照劇情發展，而家應該…

啊屌，都未講完就已經黎左啦？

一段段記憶既碎片開始出現係我眼前。

啊，果然係咁呀…全部都係佢既記憶…

由佢細個，到佢中學，識Cherry，拍拖，分開，重遇，失憶，結婚生仔種種事。

段段對佢非常重要既片段好似落雨咁灑落係我眼前，好多好多，多到我唔想再睇。

正正係我合埋眼之際，有一道強光照左埋黎，道光甚至強到眼皮都完全無用咁，我被迫擰埋一邊，想話避開道光。

但出於好奇心，我最後都係開返眼，望左去道光度。

道光所在之處積聚左頭先係我面前跌落既記憶片段，原來已經堆出左一座小山丘。

道光到底係想我點呀…想我面對呢D野？

唔知咩事，我居然伸隻手埋去堆片段度。

但係，我隻手都未掂到堆野，堆野居然突然自己爆開，一瞬間就變成一堆玻璃碎。

我望住呢堆玻璃碎，唔知俾咩反應好。

應該要點好呢我？好似大文豪咁影低呢段野放上網？唔得啦我而家係係夢入面，邊有電話影相？

呀話時話，D人成日係夢入面唔會痛，其實係咪真架呢？

難得有呢個機會，不如實證下？

我執起其中一塊玻璃碎片，打算MK D，試下𠝹手。

仆街如果真係會流血會痛咁點算？呢度得我一個，無人幫到我架喎。

就係我猶豫既時候，神奇既事又再一次發生了。

堆滿一地既碎片居然自己組合返，形成左一個畫面。

最後連我手上既個一塊碎片都飛左埋去，令到個畫面變得完整，成為一個片段。而片段入面只有一個人。

果然夢入面就真係乜都有可能啊…不過…

我明白既。

我：「嗯…」

我再一次張開雙眼，無錯，係再一次。

今次，我知道自己唔係再係夢入面，我係返左黎現實。

點解我咁確相？因為我見到自己身處係一個熟悉既環境。

西貢既獨立屋，呢排我都係係呢度過活。

唔？點解左手咁重既，好似有野壓住我咁…

我望左過去我既左手邊，然後就笑了。

唔怪得隻手會咁重啦，原來係你責住我…真係吖咁訓對條腰唔好架嘛…

估唔到訓醒前最後一刻見既係你，醒左之後第一個見既又係你。

我講既係邊個？而家會咁對我既人咪只有佢一個。

頭先最後出現既片段，全部都係佢，而家我既世界入面就只有佢一個。

Ada。

我伸出另一隻手，輕撫佢個把秀髮。唔知點解咁做令我好安心，好有實在既感覺。

晨哥：「佢咁樣已經三日喇。」

哇屌！你幾時出現架！？

我而家先發現到晨哥原來挨住係牆邊，個心當堂離一離。

咪住先…

我：「你話三日..？」

晨哥：「唔？係呀佢已經係你床邊陪左你三日有多喇。」

我：「唔係，我意思係我訓左三日？」

晨哥：「哦，你就唔只三日了，你訓左成個星期啦。」

哇屌，成個星期咁多…

晨哥：「你見點呀，試下郁下個身，睇下有無邊D地方唔舒服。」

我按晨哥既指示去做，試下郁下D手手腳腳，一切都正常。

但諗落，好似有d野唔係好岩。

我未做手術之前D手腳都活動正常架啦。

我用一個唔知點既眼神望向晨哥，見到佢捂住個嘴係度偷笑。

我：「晨哥…」

晨哥：「唔好意思我自己都一時唔記得左，不過唔緊要啦，你睇下，有意外驚喜啦而家。」

意外驚喜？你講乜野呀..

Ada：「嗯…」

屌，原來係指呢樣。

可能係因為我頭先郁身郁勢，整醒左Ada。

佢好似一時之間load唔到發生咩事，傻傻咁望住我。

哈，訓覺訓到流哂口水都有既。

我好自然咁伸隻手埋去幫佢抹走d口水。佢就係呢一刻捉住我隻手。

Ada：「我…係咪發緊夢？」

我：「呃…你應該唔係發緊夢，我估。」

咦咦咦？你想做乜呀師兄，冷靜d呀師兄！！

佢捲起左我既衫䄂，一啖咬左落去。

我：「呀！！！」

我痛到即刻叫左出黎，大聲到我估全屋都會聽到。

我：「你做乜無啦啦咬我呀！」

我一邊摸自己頭先比佢咬個個位，一邊同佢講。

屌，成個牙印係度，好痛。

Ada：「吓，d人話發夢唔會痛架嘛，咁我咪試下咬你，睇下你會唔會痛咪知到底係咪發夣囉。」

唉…都唔知應該由邊度開始吐糟好。

Ada：「Sorry呀係咪我咬得太大力呀…」

佢而家先走黎捽我隻手，都唔知好嬲定好笑。

不過，點都嬲唔落佢架啦係咪先，佢都係為我緊張啫。

我用另一隻手一下攬住佢，仲輕掃佢個背脊。

我：「係吖你唔係發夢呀，我已經醒左喇。」

佢無應我，只係繼續留係我既懷內。

或者呢一刻，言語已經係無需要喇。

晨哥：「呃…打擾你地感人既重逢真係唔好意思，檢查都係要做既。」

晨哥…

我以為檢查會係一堆醫生護士黎同我check呢check路，點知原來唔係。

佢地只係帶左我去照機，之後就放左我返房。

不過當我再一次返到間房個陣，Ada已經唔見左人。

晨哥：「佢比阿欣捉左去傾計啦。」

我：「屌，點解你成日神出鬼沒架，知唔知咁好易嚇死人？」

晨哥：「吓，我一直都企係度架喎，係你太留心搵Ada先留意唔到我啫。」

屌佢又好似岩，不過…

我：「點解你會知道我係搵緊佢？」

我好快就後悔問左呢條問題了。我居然一時唔記得左我眼前既係邊個。

佢係一個可以洞察一切既人，我問佢呢條問題簡直係低能。

晨哥：「睇你個眼神就知啦，好似係度搵緊野咁，而呢度又有乜野可以俾你搵？係得佢架啫。」

我：「OK YOU WIN，我真係唔夠你講。」

我一邊自言自語，一邊行去梳化坐低。

我：「咁你係咪有野想同我講？」

晨哥：「哦？你又知既？」

我：「無啊，直覺啫，硬係覺得你係有野想同我講先使走Ada啫。」

晨哥：「聰明，不過等多陣先，等埋佢黎先。」

佢？邊個佢呀？

不過我無問出口，只係聽佢既說話去做，等。

等待既期間，我同晨哥都無講過野，大家都只係坐係度等。

係一個咁安靜既環境等待唔知乜野，原來係一件咁可怕既事。

快d黎啦唔知邊位…

「喀擦。」

就係我如坐針氈之際，房門終於打開左，有一個人走左入黎。

入黎既人係Ellie，仲拎住一份文件之類既野。

晨哥：「好啦，人齊啦可以開始喇。」

終於可以開始喇？佢到底有D乜想同我講呢？有D緊張添。

Ellie：「你可唔可以話俾我地知，係你訓著既呢段期間係咪有發過D乜野特別既夢？」

特別既夢？

我：「點解你地會咁問？條問題咁奇怪既。」

Ellie：「eh…應該點講好呢…我地偵測係你醒之前你既腦波有不尋常既波動…」

聽唔明，完全聽唔明。

晨哥：「即係話我地發現你係醒之前你個腦應該遭受到刺激，我地想知個個刺激係咩。」

「如果個刺激係你都唔知係乜的話，我諗我地要留你係度多一陣，我怕你日後會出事。」

哦原來係咁…刺激…發夢的話…

我：「特別既夢的話有啊。我發左個好奇怪既夢。」

我：「可以呀，個夢而家諗返都覺得奇怪，好多以前以前既回憶好似落雪咁灑係我面前，堆起一座小山。」

「當我想去伸手去掂堆回憶個陣，佢地又好似爆玻璃咁散哂落地。」

「之後又無啦啦自己合返埋，形成另一段回憶，跟住我睇完個段回憶就醒左啦。」

聽到我講完之後，佢地兩個都愣住左。睇黎係我講既野太抽象喇。

Dead air…點算好呢…

我：「eh…」

我只係開左個頭，晨哥就突然開聲，強行打斷左我既說話。

晨哥：「得喇，我明白喇，咁應該無乜問題架啦Ellie，唔需要太過擔心。」

Ellie：「嗯，我諗都係啦，點都好啦，除左呢樣之外其他數值都顯示你而家身體一切正常。」

「所以，我諗我可以講呢一句。」

「恭喜您，你好返啦。」

我…真係好返？

我：「咁我…係咪唔會死啦？」

晨哥：「我諗我地幫你做既手術唔係幫你改造成不死人。」

「不過，一時三刻唔會死既，除非你無啦啦出咩意外啫。」

我：「呃…明白喇。」

Ellie：「咁如果無乜其他問題的話，我就返出去先喇。」

晨哥：「嗯，麻煩你啦Ellie。」

Ellie：「唔麻煩，我都有義務去了解發生左咩事既，你地慢慢傾啦。」

講完佢就走左，又再次留低我同晨哥兩個。

屌，我都要搵個理由離開呢度先，實在太尷尬了。

正正係我企起身既時候，晨哥又開聲了。

晨哥：「對於個夢，你有咩解讀？」

我：「哇大佬你連解夢都識呀？」

晨哥：「唔係既，只係聽到你既形容之後就諗到少少啫，你自己都應該諗到少少架。」

何止少少，我完全明白個夢講乜啦。

我：「大慨又係叫我放低一D唔屬於我既記憶，去留心返身邊既人啦。」

晨哥：「醒目喎，咁你打算點做。」

點做呀…呢層我又未諗過喎，話哂我都只係岩岩醒。

我：「可能…同佢結左婚先掛？話哂之前應承左佢。」

晨哥：「係啊，咁當係慶祝你結婚，呢件野就送比你啦。」

佢講完就唔知係邊度拎左個盒出黎，仲扔左比我。

我拎上手一睇，發現原來係一部相機。

我：「呢個係…」

晨哥：「用佢去睇下呢個世界啦。」

用佢黎睇呢個世界呀…？好似都唔錯喎。

我手多多開左部相機，鳩㩒左兩下，發現左一張相。

呢張相係我訓係床上，而Ada則係旁邊守候。

晨哥：「啊，個張相係我影架，見到個構圖咁好就忍唔住影了。」

唔知點解見到呢張相我就忍唔住滴左兩滴眼淚。

晨哥：「嘛，我都唔阻你休息啦，有咩需要就叫我啦，係咁先。」

講完佢就好瀟灑咁離開左，直頭不帶走一片雲彩咁。

之後好長既時間都無人再走入黎我房，直至黃昏我都係一個人係房。

見到黃昏我先發現時間過得如此之快，亦係見到黃昏我先郁起上黎。

因為覺得窗外既黃昏好靚，我拎住部相機走左出去𤅟台。

「喀擦！喀擦！」

估唔到我影既第一張相會係黃昏。不過都唔錯吖，反正影得咁靚。

Ada：「你…點呀？」

呃，點解我身邊既人總係神出鬼沒。

我尷尬地擰轉身，面對佢。

而家先留意到佢既衣著，原來佢一身白色連身裙，好似一個天使咁。

天使定女神呢？算啦，都係差唔多啫。

佢既神情有少少哀傷，我估都係係度擔心緊我既狀況啦。

我唔知應該點開口好，所以我選擇左以行動代替說話。

我再次舉起相機，將佢攝入鏡中。

嗯，構圖好好，佢既表情亦好有感覺，當然，呢一切都係我個人主觀感覺啦。

「喀擦！」一聲嚇到佢花容失色，成個人震左一下，場面非常有趣。

Ada：「部相機邊度黎架？」

我：「嘛，係晨哥送比我架。」

我一邊拋部相機一邊講，咁好似好型，但其實我好驚跌左部機落地，認真矛盾。

Ada：「點解晨哥會無啦啦送部相機比你既，賀你好返？」

晨哥做既野可以用三言兩語就解釋得到架咩。

我：「佢話叫我拎住呢部野去睇下呢個世界喎，同埋佢話呢部相機係當係我地既…」

屌，好尷尬添。點講得出口啊真係吖。

Ada：「唔？當係我地既咩呀？」

屌，唔好迫我啦，好難為情吖真係。

Ada：「阿新？」

我：「佢話當係我同你既結婚禮物呀！！」

我用一個前所未有既音量去講呢句說話，甚至可以話係震撼性既聲音。

唔知係咪因為太震撼既關係，佢一時間無任何反應，只係呆呆咁望住我。

過左大概一分鐘，佢先慢慢咁講左幾隻字出黎。

Ada：「結婚..？我同你…？」

頂，咁搞到我更加尷尬。好啦，一於扮傻搏過骨啦。

我：「哈哈哈哈，無啊見你之前話我好返就同我結婚，所以我而家咪…不過我都知你係講笑架啦，當我無講過啦哈哈哈哈。哇個黃昏好靚！」

我講完一大串野之後就即刻擰轉身，對住個黃昏舉起相機。

但我遲遲都無按下快門，因為我隻手緊張到震到阿媽都唔認得。

「邊個話係同你講笑架。」

咦？

我部相機俾佢從後一手搶走左。我好自然咁擰轉身睇下咩事。

就係我轉身呢一下，我聽到「喀擦！」一聲。

佢用我部相機，影低左我。

佢影完之後就放低左部相機，等我可以睇到佢既表情。

佢笑緊，仲笑得好開心。

Ada：「岩啦，同我結婚，以後永遠都同我一齊啦。」

「阿新。」

講完，佢就行前左一步，一下將我地既距離縮到好短，我甚至可以聽到佢既呼吸聲。

不過之後我咩都聽唔到了。

因為…

佢錫左落黎。

呢一刻，我既世界好似完全靜止左咁。

錫左幾耐？唔清楚，只係覺得好似過左好耐。

直至佢退開，我既感官先完全返哂黎，聽到聲音。

我聽到拍手聲，係門口方面傳黎。

拍手既人係晨哥，佢同阿欣一齊企左係度。

仆街，佢地係咪睇到哂？

晨哥：「估唔到一入黎就見到你地係度咀咀呀，係黃昏下咀咀真係特別有情趣。」

「阿欣我地不如都咀下咯？」

阿欣：「正經少少啦你。」

屌，佢地果然睇到。好尷尬呀仆街！

晨哥：「好啦，咁我正經返先啦，恭喜您兩位拉埋天窗。」

「YES，我一定係第一個祝你地結婚啦。」

呃，唔識點俾反應佢。

Ada：「我地仲未結架，我隨時可以唔嫁比佢。」

阿欣：「你會咩？」

三個字，收左Ada皮，佢即刻無聲出。

我係佢後面睇到哂呢一切，差d就忍唔住笑左出聲。

我行前左一步，用我既左手，搭住佢左邊膊頭。

我：「我唔會放佢走架啦。」

聽到我咁講，Ada佢好似好開心，挨住個頭埋黎。

晨哥：「真係一個好畫面呢。」

晨哥一邊講一邊拎出電話影低我地，我地無反抗，由得佢影。

晨哥：「咁個婚禮，你地想點搞？」

呃…呢個問題我又無諗過喎。

Ada：「我打算註冊就算啦，低調D。」

阿欣：「低調D唔係唔好，但話哂係人生大事，起碼都要著下婚紗入教堂啦。」

Ada：「吓但係咁又要洗好多錢架喎…」

晨哥：「錢就唔係咩問題啦，我出。」

我：「我結婚，但係錢就你出？好似唔係幾好喎…」

晨哥：「有乜問題啫，最緊要係你地開心，一於咁話啦，三日後就搞有無問題？」

三日？咁快？我連佢既父母都未見過喎，一黎就要佢地嫁個女比我？

Ada：「我無問題吖。」

吓？？

我：「你…唔洗同你父母講聲先咩？」

Ada：「佢地已經唔係度lu。」

Shit…

Ada：「所以而家我得返你一個架啦，你要好好照顧我呀知唔知。」

我：「當然，我一定會。」

忽然間，我感到自己背負起一份責任。

我一定要好好照顧佢。

呢三日，我地都無見面，晨哥話要保持神秘感喎。

所以我係完全唔知佢著婚紗係咩樣，不過咁仲好，令我更加期待。

晨哥為我地準備左一間小教堂，風景好好，風吹埋黎亦令人好舒服。

黎參加呢場婚禮既人唔多，不過咁正好符合我地既期望，低調。

黎既人應該唔超過二十人，都係得晨哥阿欣仲有阿明佢地。

但令我非常意外既係，美星居然都黎左。

見到佢，我當堂嚇左一跳。

美星：「恭喜你呀，Proto Zero。」

我：「多謝家…美星姐。」

美星：「無所謂啦你鐘意點叫就點叫啦，都係一句啫。」

「以後你要好好照顧人啦，知唔知？」

我：「知道！」

美星：「乖！」

佢一邊講個乖字一邊起勢咁捽我個頭。

呼…婚禮要開始了。

啊…果然同預期既一樣，好靚呢…

講緊乜？當然係話緊著婚紗既佢啦，靚到好似識發光咁。

當佢行到黎我身邊既時候，我個心跳得比之前任何一刻都要快，好似就快要跳出黎咁。

Ada：「我…靚唔靚？」

我：「靚，當然靚啦，全場最靚係你添呀。」

Ada：「口花花，不過你今日都好型。」

我：「嘻嘻，多謝。」

講完我地就係咁多人面前交換左戒指，簽左字，正式成為一對夫婦。

當然，唔小得kiss啦係咪先。

結婚原來係一件咁神奇既事，交換左戒指既一刻心態就已經唔同左，覺得自己好似真正有一個家咁。

無錯，我有自己既家了。

新婚生活係點？好美滿。

雖然我地無去咩新婚旅行，留左係香港，但都係好開心。

我地日日都係埋一齊，有時係我陪佢返去餐廳幫手，有時則係佢陪我去影相，總之我地就係形影不離。

我好似晨哥講既咁，拎住佢俾我既相機去睇呢個世界。

Eh…唔可以話係世界既，睇香港囉。

呢幾個月黎，我帶著部相機同Ada走遍幾乎全港九新界，影左成千張相。

每張相對我黎講都好有意義，佢地好似幫我記錄緊我既生活，我既足跡咁。

亦係有佢地，我更加感受到自己既生命。

呢D相，係我留下既足跡，係我活過既證明。

晨哥佢地好似都好喜歡我既相咁，話同我出本攝影集咁話。

我唔好意思拒絕佢地既好意，而且我可以有自己既作品都係一件開心事，所以我就欣然接受左。

係出版既同時，另一件開心事又來到了。一浪接一浪咁黎。

Ada話佢有左。

我當初聽到呢個消息真係開心到不得了，開心到幾乎跌倒。

我真係無諗過自己咁快就可以做爸爸。

不過，亦係因為咁，我做左一個決定。

Ada：「你話…你想去流浪？」

我：「嗯，我想去更多既地方，影更多既相，記錄同睇呢個世界。唔想只係局限係香港。」

Ada：「咁不如我同你一齊去啦。」

我：「唔得，你而家有左就應該安心養胎啦，唔好同我四圍去。」

Ada：「咁不如…等個BB出左世之後我地一齊去？

」

我：「等BB出左世之後我就要做一個好爸爸，無辦法再去咩流浪lu，所以只可以趁而家。」

Ada：「不過我唔想我自己一個人..

」

我：「放心啦，就算我地分隔幾遠都好，有呢樣野係度我地就係連埋一齊架啦。」

我一邊講一邊指住手上既戒指。

就算我講到咁，佢既表情仍係十萬個不願意，仲開始流淚，睇得我好心痛。

我忍唔住伸手抹走佢既眼淚，仲輕撫佢既面頰。

我：「我一定會返黎既，我應承你。」

佢無即刻答我，而係緊緊咁捉住我個隻停留係佢臉上既手。

Ada：「你返黎之後就唔準再離開我，唔準再掉低我一個人，得唔得？

」

我：「得，我應承你。