「奇幻，純愛」《我，總是會愛上妳》: Proto Zero
係個件事之後過左幾耐呢？好似已經兩年？時間過得真係快，快得可怕。
呢段時間都無乜同佢地聯絡，唔知佢地而家咩情況呢？
算啦，可能佢地都唔想我去打擾佢地既生活。
有咩想知既，都係去問晨哥啦。
不過，返到黎既感覺真係好。
熟悉既空氣，熟悉既土地，呢一切都令人好安心，就好似發夢咁。
美星：「歡迎你地返黎喎。」
我：「美星？點解你會係度？我應該無話你知我今日機架。
」美星：「先生，你記得你唔係自己一個人去架可？」
Cherry：「嘻嘻，係我話俾家姐知架。」
我：「哎…點解要講啊…」
Cherry：「唔緊要啦，而家家姐黎接我地唔好咩？」
我：「又唔係話唔好既只係…咪住先。」
「你黎左的話邊個睇住Chase同Nicole？
」Chase：「跟埋黎咪唔洗睇住囉。」
Chase！！！
見到呢個衰仔，我就忍唔住即時放低哂手上既野，上前抱起呢個衰仔。
我：「你高左唔少咁喎靚仔。
」Chase：「喂我今年十歲架啦，放低我啦好無。」
我：「十歲啦？生左日啦咩？
」Chase：「過左喇…
」我見佢講個陣擰咩左塊臉，唔俾我睇佢咩表情。
正一傻仔，你生日我又點會唔記得呢。
我輕輕咁放低左佢，之後係個背囊度拎左一盒野出黎。
我：「嗱，你既生日禮物呀。」
佢無出聲，只係呆呆咁拎住盒野。
Nicole：「哎，點解細佬有禮物我無架。
」頭先一直圍係Cherry身邊既Nicole一見到Chase有禮物就即刻行左埋黎我度，好似D狗仔見到你身上有野食就埋黎圍住你咁。
我：「點會無左你個份呢我既公主。
」我好似聖誕老人咁又係個袋度拎左盒野出黎交俾我既公主。
同Chase唔同既係，Nicole接過禮物之後就好開心咁跑返去Cherry，向Cherry炫耀自己既禮物。
兩個都好可愛呢。
美星：「喂我個份呢咁。」
我：「屌你幾廿歲人仲要乜禮物呀。」
哇好彩Cherry聽唔到我講粗口啫，如果唔係又會打我。
Cherry無打我，但係美星有。佢一下打左落我個頭度。
美星：「咩叫幾廿歲人呀！本小姐我仲好後生！
」年齡永遠都係女人既禁忌領域。
我：「好喇好喇知你後生啦，你D禮物係個喼度呀，返去比你啦。」
美星：「算你有我呢個家姐心啦。」
挑，都唔係我想買比你既，係Cherry話應該買比你咋。
之後我地五個就坐美星車返屋企，返去個個兩年無返過既屋企。
放低哂D行李之後，我好似睇酒店房咁係自己屋企遊蕩。
嗯，所有野都無變。所有野都同兩年前既一樣。
都係屋企最好。
嗯？呢本係…？Proto Zero..？
我係書檯上發現左一本我未見過既書，打開一睇，原來係一本攝影集。
但係點解我會有呢本書？而且個書名..
美星：「啊你已經見到本野嗱？」
我：「喂，入黎要敲門呀小姐。
」美星：「你都無閂門，洗乜敲啫。
」Cherry：「你地係度做咩呀？咦lulu你手上個本係咩黎？
」我：「嘛…我都唔知呀，一返黎就見到檯面有呢本野啦。美星你知道呢本野？」
美星：「梗係知啦我放係度架嘛，本野係阿晨交俾我既，話係Proto Zero既攝影集，想送一本俾我地咁話。」
Proto Zero既攝影集？佢而家玩攝影呀？勁喎。
我隨意咁翻閱本攝影集，衰鬼，又真係幾靚喎。
我：「咁你知唔知佢而家點？」
美星：「咁我又無問喎，阿晨都無提。」
晨哥無提…？唔…好似有d古怪。
我：「傻婆。」
Cherry：「喂呀家姐係度架唔好咁叫我啦，做乜呀。
」我：「你肚唔肚餓？」
Cherry：「eh…少少啦…
」聽你既語氣就知唔係少少啦。
我：「咁你洗個臉換件衫啦，我地出去食野。」
Cherry：「好呀，去邊度食？
」我：「去Ada間café。」
Cherry：「咁呀，你等我一陣，我去喼度拎返D佢地既禮物先。」
我：「嗯，慢慢啦，有咩要幫手就叫我啦。」
Cherry：「開個喼啫，我自己搞得掂架啦。」
佢一邊講一邊離開書房，仲好好手尾咁閂埋門。
而家間房只係得我同美星。
我合返埋攝影集，放係檯面。
希望我既直覺係錯架啦。
美星：「做咩呀你？係咪有咩…」
我：「可能係我心多，我硬係覺得Proto Zero出左事。」
「見到呢本攝影集同你話晨哥係交俾你個陣隻字不提Proto Zero既情況個陣我就開始咁諗。」
美星：「咁你話去Ada間café食野就係為左睇下…」
我：「嗯，麻煩你車我地去喇。」
美星：「無問題，不過你都係時候考慮下喇。」
我：「唔？考慮D乜？」
美星：「考慮下考返個車牌。」
我：「多事。」
再一次，我地一車五個人出發，過左大約半個鐘，我地去到Ada間café。
我地都未入到去間café，就已經feel到有D唔妥。
企係門口既waiter見到我地五個之後表情出現相當大既變化，仲即刻跑返入去店入面。
唔通生意好差？見到客開心到即刻跑入去報告？
應該唔會掛…？D野都叫好食，應該唔憂無生意架。
Cherry：「唔好諗咁多無用既野啦，入去睇下咪知囉。」
你又知我諗緊乜？不過你岩，有咩想知入去睇下咪知囉。
不過，我連門口都入哂，就已經遭遇到另一個事件。
Ada衝左出黎，表情仲相當高興。
要點形容呢個表情好呢？應該係期待緊D野掛我諗。
但係呢個表情都只係維持左好短既時間，好快佢就變得好失望，甚至可以用垂頭喪氣去形容。
Ada：「乜係你地呀…」
Cherry：「係呀，我地都係岩岩落機，見肚餓所以咪上黎囉。」
Ada：「嗯，咁快D坐低啦，我而家就叫廚房整野比你地食。」
佢講完之後就頭也不回咁行去廚房。
Cherry：「睇黎同你諗既差唔多喎傻仔lulu。」
Cherry佢一邊拖住兩個細路行一邊講，表情都有少少唔開心。
講唔開心，我都係。
我並未跟隨佢地四個安安份份咁坐低，我選擇左係café度四圍行。
兩年無黎，呢度好似唔同左。
整體感覺仲係同以前一樣，令人感到好舒服好安心，但係可以明確感受到變化。
餐廳多左好多相，一張一張咁痴係牆上既一塊board。
出於好奇，我走左埋去睇呢d相。
原來係你啊…
牆上既相十居其九係Proto Zero同Ada既合照，每張既背景都唔一樣。
如果我既推測無錯的話…
「請問…」
唔？係頭先係門口個個waiter喎。啊，我知佢黎搵我既用意啦。
不過，唔係佢咁樣叫一叫我我都feel唔到餐廳瀰漫住一種奇怪既感覺。
我feel到有人望住我，仲係唔只一個人。
我擰轉身，發現餐廳入面幾檯客都望住我。
我：「係咪有咩事？
」Waiter：「呃…我想問你係咪識我地老闆？
」條問題咁既，你想知道d乜呢小姐。
我：「老闆係指…佢定係佢？」
我先指左係廚房方向既Ada，之後再指向相入面既Proto Zero。
Waiter：「呃…佢。」
個waiter都好似我咁指住張相既Proto Zero。
我：「嗯，我識佢，我今次黎都係想見佢。」
waiter：「恕我冒昧，我想問下你地係咪兄弟？因為你地真係好似樣搞到我頭先認錯左..累到老闆娘空歡喜一場…」
哦？睇黎我可以係佢口中探到D野bor…
我：「嘛，都算係兄弟既我地，係某種意義上。係呀，好多人都話過我地似樣。」
「係呢，你話累到老闆娘空歡喜一場係咩一回事？你老闆又係邊度？我有野想搵佢。」
waiter：「呃…」
佢既表情有D難堪，仲伸個頭去望廚房，似乎係警戒緊Ada。
我：「放心啦我唔會講俾其他人知喎。」
waiter：「好啦，其實老闆佢係一年前就已經…」
Ada：「魯路修。」
仆街！！突然係我背後講野嚇到我呢！！
一聽到佢把聲，我幾乎成個人彈起。
我：「唷..有咩事呢..咦？」
我一邊講一邊擰轉身，發現佢拎住兩碟野。
Ada：「黎幫手拎啦，唔好餓親你老婆同對仔女呀。
」我：「哦哦…好。」
我接過佢手上既碟，再一次擰轉身，發現頭先同我傾計既waiter已經唔見左人。
走得真係快呢。嘛，算喇一陣再算。
我慢慢咁同佢兩個人拎住D野食行去Cherry佢地度，之後大家都坐低左。
野食放低哂，但無一個大人動手食，只有Chase同Nicole呢兩個小朋友食。
大家你眼望我眼，好似等緊人開口。
最後，開口既人係Ada自己。
Ada：「你地黎應該唔係為左食飯咁簡單..？
」佢既語氣，散發住一種令人不由自主咁為佢擔心既感覺。
Cherry：「Ada…
」Ada：「佢的話，已經唔係度喇。」
我：「佢去左邊？」
我講左呢四個字之後大家都望住我，尤其係美星條友，佢用一個「你做乜撚野呀」既表情望住我。
點解我會咁問？因為我知道Proto Zero應該仲未死。呃，正確黎講應該用生死未卜會好D。
聽完佢咁講，再加上之前佢同個waiter既反應就令我有咁既諗法。
加上「已經唔係度」呢句野本身又唔係明確話佢死左。所以我先會咁問。
Ada：「我仲以為你第一句說話會係Sorry添哈哈。」
我：「哈，無人可以係我面前講大話架。」
美星聽到我地既對話之後顯得好混亂，而Cherry則微笑住咁飲咖啡。
睇黎聰明既佢已經意識到係咩一回事喇。真不愧係我老婆。
Ada：「嚴格黎講我無講大話喎，佢的確已經唔係度。」
佢又用返個個憂愁既語氣講野，令人莫名地心酸。
到底Proto Zero發生左乜事呢？
Ada：「莫講話佢去左邊，其實佢而家係生係死我呢個做老婆既都唔知。」
Cherry：「你地..結左婚啦？」
Ada：「嗯，我諗都已經有年半喇啦。」
美星：「邊個求婚架？
」講呢d野就咁興奮，女人。
Ada：「呃，其實係我求婚既…因為佢當時情況好差，我想俾D動力佢所以咪…」
我：「情況好差？咩事？
」Ada：「係晨哥為佢準備既療程，話係…係更改返基因排序同細胞既..詳情我都唔記得了。」
「總之之後佢就好返，我就按照承諾同佢結左婚啦。」
哇，聽落係一個好浪漫既故事。
不過點解我覺得Proto Zero係被迫同Ada結婚架呢哈哈。
Cherry：「咁既然你地都結左婚，點解佢會…」
Ada：「大約係一年前左右，我記得係係晨哥幫佢出左本攝影集之後，有一日佢同我講話想自己出去睇下呢個世界。」
咦，句野咁熟既。
我無意咁望左過去Cherry度，點知原來佢都係度望緊我，大家四目交投之後即刻明白大家都係度諗緊同一件事，大家都笑左出黎。
Cherry：「你無叫佢帶埋你去咩？」
Ada：「我當然有喇，不過佢唔比，因為當時我其實已經…」
我：「shhhhh…聽唔聽到？好似有BB仔喊聲咁。」
Ada：「唉呀！
」一聽到我咁講，Ada就好緊張咁企左起身，一支箭咁跑左去。大家都唔知咩事。
但過左一陣，大家都呆左。
Ada抱左個BB返黎。
大家…Eh…唔可以用大家既，除左我同Chase之外，佢地一見到個BB就好興奮，圍住個BB係度傾計。
Nicole：「個BB係…？
」Ada：「係啊，係姨姨我既囡囡啊。」
Cherry：「幾多個月喇？
」Ada：「差唔多五個月喇。」
Cherry：「咁佢知唔知佢有個女？
」我：「傻婆，Ada頭先話左係阿新走個陣自己已經有左，阿新就係知道咁先唔俾Ada跟埋去架咋。」
Cherry：「收聲呀，男人都係無本心，個個都想dup低個老婆走左去。
」Chase：「笑。
」吖仆街仔Chase。塞你一拳先。
Ada：「哈哈，佢知架，佢仲係我生之前Whatsapp左BB個名比我，之後仲有寄postcard返黎添。」
我：「咁BB叫咩名？」
Ada：「雨晨，林雨晨。」
我：「意思係雨後既晨光啊…？
」Ada：「你又知道既？
」我：「無啊，斷估啫哈哈。」
雨晨。應該同時代表住佢自己既經歷啦我諗。
經過左咁多風風雨雨，最後終於雨過天睛，仲建立到自己既家庭，猶如見到晨光咁。
嗯，真係一個好名。
我諗如果佢親眼見到自己個女的話一定會好開心。
Proto Zero，你既幸福等緊你返黎領取呀，快d返黎啦。
「乞嚏！
」「邊個講我壞話呢…屌泰國真係好撚熱…
」「嘛，諗落都係時候返香港了。」
「係時候返去見我兩位天使。
」